Obhumu mo‑meremo ghe Ryobha
3
Bhahiiri bhaane,
eriibhagha rino neere bhowaanyu ntesiikiire na niinyu kinya abhaato bhano bhaghukangatu na Akörö Ahörëëru.
Amare nesiikiire na niinyu kinya abhaato bhano bhaghukangatu na simoka yaanyu e masari,
wiiki kinya ebhengʼwerere mo‑bhokumi bhoonyu na Kirisito.
2 Ebhengʼwerere mbeekunyo amabhëërë agheene,
bhetaakuhaabhu ebhiinyakurë bhe bhantomonkoro.
Hangʼu hangʼu eni nebhaheere ameeghi amahoho gho kubha moore mokeere ghuköngʼëri.
Koru ibheere mokeere ghuköngʼëri,
3 gho kubha mokeere morakangatu na simoka yaanyu e masari.
Kana,
aribha ghate yaanyu ndeenyi‑ho eriihari ne eriihë,
ghayo ghataakwërëki kubha mokeere morakangatu na amangʼana gha se na kumanya kinya abhaato bha mo‑se?
4 Neghosiikëra hangʼu gho kubha omooto woose nakobhugha ghaghaache,
umu nakobhugha kubha,
“Eni n‑o Bhawuro,”
owonde nakobhugha kubha,
“Eni n‑o Abhooro.”
Kana,
ibheere ghayo ghataakwërëki kubha,
mokeere moraköra kinya abhaato bha mo‑se?
5 Mbe,
ibheere,
Abhooro n‑niwe?
Na neeni Bhawuro n‑niwe?
Itu n‑abhatamishi bhano Eryobha retotomiri kobhatoori inyu momokumi Yesu Kirisito.
Omooto woose naghuköra emeremo ghino ahaabhuru no Omutëmi.
6 Eni nyeemiri chaatëtërë,
Abhooro akahomeerera amanche,
amare Eryobha niryo rekumëri na ghokori.
7 Mbe,
uno akwemi chaatëtërë taanyi egheghiro,
koru uno akohomeerera,
amare Eryobha rino reghokori niryo re ghwitëngʼëru.
8 Uno akwemi na uno akohomeerera bhoose mbarëngʼiine,
Eryobha ndekomuha omooto woose atuho yaache,
kurëngʼaana na kinya bhuno aköriri emeremo gheeche.
9 Neghosiikëra hangʼu gho kubha eni na Abhooro ntoghuköra emeremo ghino ghe Ryobha haghirohamu,
na niinyu n‑omoghondo o Ryobha moonyi,
wiiki n‑anyumba yaache moonyi.
10 Gho ghareeya ino Eryobha reheere,
eni nyabhëkiri obhoroso kinya omwabhëki omukaari na uno anyi na amangʼiini,
no omooto owonde nakwabhëka ighoro e bhoroso bhuyo.
Amare ibheere,
omooto woose amööhërëri bhoheene,
kebhuno akwabhëka ighoro e bhoroso bhuyo,
11 gho kubha obhoroso bhuno mbumariri kwabhëku n‑Yesu Kirisito omwene.
Taanyi‑ho omooto uno aghotora kwabhëka obhoroso obhonde.
12 Ighoro e bhoroso bhuyo,
omooto naghotora kwabhëka gho sahaabhu,
kwo bhyoma,
hamu kwo mabhohe gha riighori ikoro,
na kwo mete,
na kwo bhunyaaki,
hamu kwo mato,
13 ne emeremo ghe mooto woose ngekorighibhu kubha nibhu gheere.
Orosiko ruure ro ghoteneru ekiina emeremo ghyose ngeghotooru haheero,
gho kubha emeremo ghe mooto woose,
ngekurëngu kwo mororo o ghotenera ekiina.
14 Erabha emeremo ghe mooto gherasaagha,
omooto uyo naghosongʼaana atuho.
15 Erabha omoremo o mooto orahe,
hayo nakobhori atuho,
amare iwe omwene naghotooribhu,
nangabha n‑kinya omooto uno ahoniire ro kinyonyi ghusöha mo‑mororo o ghoteneru ekiina.
16 Kana,
moteeche kubha inyu n‑Erisëngërö re Ryobha moonyi,
na kubha Akörö e Ryobha neghwikara moose yaanyu?
17 Ibheere,
aribha omooto arasari Erisëngërö re Ryobha,
omooto uyo,
Eryobha ndekomusari,
gho kubha Erisëngërö re Ryobha n‑itööbhiyu,
ne Erisëngërö riyo niryo inyu.
18 Omooto wowoose ghate yaanyu atingʼiina kubha naanyi na amangʼiini.
Aribha omooto akwirighi kubha naanyi na amangʼiini mo‑se ino,
ngʼoni abhe muraghaanu kubha abhönë amangʼiini gha hëënë.
19 Akörë hangʼu,
gho kubha amangʼiini gha se ino,
n‑gha ghighëëghë ambërë e Ryobha.
N‑kinya bhuno yandëkuru mo‑Mandëkö Amatööbhiyu kubha,
“Eryobha ndekobhaghööti bha mangʼiini mo‑bhongʼiini bhoobho.”a
20 Wiiki yandëkuru mo‑Mandëkö Amatööbhiyu kubha,
“Omutëmi neeche amiihëëbhö gha bha mangʼiini,
kubha ghataanyi no obhwëra.”b
21 Ibheere omooto wowoose atiihacha gho kubha iwe n‑omughëndi o omooto nyarebhe,
gho kubha itu bhoose Eryobha ndetotooriri kobhatoori inyu,
22 ibhe neeni Bhawuro,
abhe n‑Abhooro,
hamu Keebha.
Wiiki Eryobha ndebhaheere ebheghiro bhyose kobhatoori,
bhibhe bhe hano mo‑se,
hamu obhuhöru,
hamu oroko,
bhibhe bhino bheenyi‑ho ibheere,
hamu bhino bheekubha‑ho,
bhyose m‑bhebheenyu.
23 Amare inyu,
m‑bha Kirisito,
nawe Kirisito n‑o Ryobha.