Emeremo ghe bhatomu
4
Abhaato bhatubhare kubha itu n‑abhatamishi bha Kirisito toonyi,
ntuhaabhuru emeremo ghe kuraghani angʼana e Ryobha ino ere ebhisuru.
2 Ibheere,
omooto uno ahaabhuru emeremo,
nakwëndëru abhe omuhëënë.
3 Amare ghokoone eni,
nteeghotereera nerateneru ekiina na niinyu,
koru nerateneru ekiina no omoteni o kiina o riibharacha.
Koru eni omwene nteeghwitenera ekiina,
4 gho kubha nteekorighi ghyokyose ekebhe mo‑motema waane.
Amare riyo retaaghughëri eni netabha ne eriisari.
Omutëmi Yesu niwe aghontenera ekiina.
5 Ibheere,
motighe ghotenera ekiina abhaato eriibhagha reeche rekeere kohika,
mughanye mbagha orosiko runo Omutëmi Yesu akuucha.
Iwe niwe akobhetoora haheero ebheghiro bhyose bhino bhebhisuru mo‑kengʼuuri na kwërëki bhino bheenyi mo‑metema ghe bhaato.
Niho omooto woose akubhöna aghongo ino emurëngʼaaniire,
koru kwo Waryobha.
6 Abhahiiri bhaane,
nebhughiri amangʼana ghayo ghoose ighoro yaane na Abhooro,
kubha tubhe eghetuubhaani gho ghiri yaanyu.
Kurëngʼaana ne eghetuubhaani kiyo,
mumënyë ghano ghaghughambu mo‑kirëngi kino,
“Motakera ghano ghaandëkuru mo‑Mandëkö Amatööbhiyu.”
Aribha moraghööta ekirëngi kiyo,
taakubha‑ho omooto wowoose uno akwihachera omooto umu na komutaraaha owonde.
7 Ibheere,
n‑niwe,
uno aghuköriri kubha mokoro ghokera owonde?
Taanyi Eryobha niryo rekoheere ebheghiro bhyose bhino onyi nabhyo?
Aribha nuhaabhuru,
ngwake okwihacha kinya bhuno tuhaabhuru?
8 Ibheere mokwirighi mumariri kubhöna ebheghiro bhyose bhino mokwënda!
Mumariri kwamiha!
Mubheere abhatëmi,
nangabha itu totaanyi abhatëmi!
Ngʼoni aribha mongabheere abhatëmi bha hëënë,
kubha itu tukangate haghirohamu na niinyu!
9 Amare neghwituuri kubha Eryobha ndetuköriri itu abhatomu kubha abhaato bha ghuchëëru ghokera bhoose.
Ntonga kinya abhaato bhano bhateniiru ekiina ghwitu.
Ntuköruru kubha abhaato bha ghusëku mo‑se,
ambërë e bhamarayika na mo‑bhaato.
10 Abhaato bhaaru mbaghotorighi kubha,
itu m‑bharaghaanu toonyi,
gho kubha ntokomuhökëri Kirisito,
amare inyu mokwirighi kubha moonyi na amangʼiini gho kubha mokomutambana Kirisito.
Itu ntokorighibhu kubha,
m‑bhatöbhu toonyi,
amare inyu mokwirighi kubha moonyi na changuru.
Itu ntoghutaraahu,
amare inyu mokwirighi kubha,
m‑bha ghosooku moonyi.
11 Koru eriibhagha ri ibheere,
ntoonyi na anchëra na anyööta,
wiiki totaanyi na changibho che ghwisha,
ntoghutëmu,
wiiki totaanyi na ha ghwikara.
12 Ntoghuköra emeremo ghiito gho ghwiköngʼi chwee kwo mabhökö ghiito itu bheene.
Hano abhaato bhaghototoka,
ntokobhiitabheri.
Hano bhaghotunyaaki,
ntoghoghumereri.
13 Hano bhaghotughamba kobhe,
ntokobhagharokeri bhoheene.
Koru ibheere,
ntuköruru kinya abhuusa e se,
na m‑bhaghonchu toonyi kwo mooto woose.
14 Nteekobhaandëkëra amangʼana ghano kobhasooki,
amare nekwënda kobhashaangʼi kinya abhaana bhaane abhasiighani.
15 Koru nangabha moonyi na abhaato bhaaru bhano bhakobharëra mo‑riimanya reenyu re Ghekirisito,
iso n‑umu.
Eni neeni iso gho Kirisito Yesu,
gho kubha n‑eni ꞉neebharaghaniiri Angʼana Anchömu.
16 Gho ghayo,
nekobhasasaama kubha,
mubhe moratambana eghetuubhaani keene.
17 Gho ghayo nemotomiri Timotewo,
omoona waane omosiighani mo‑bhokumi,
uno anyi omuhëënë mo‑meremo ghe Mutëmi.
Iwe nakobhahiiti ghano eni neghutambana mo‑bhughöötani bhoone na Kirisito,
ghano nekweghi abhaato ahaghiro hoose mo‑makanisa ghoose.
18 Ibheere abhande ghate yaanyu mbakwihacha,
gho kubha mbaghwituuri kubha,
nteekuucha wiiki iyo bhowaanyu.
19 Amare Omutëmi arasiigha,
nekuucha bhowaanyu ghano matiko.
Hayo niho nekwirigheri eni mwene,
amangʼana ghano bhakobhugha bhayo bhakwihacha,
na taanyi ghwisuncha amangʼana ghayo agheene,
amare wiiki kumënya koru changuru cheebho che bhokumi.
20 Neghosiikëra hangʼu gho kubha obhutëmi bho Ryobha,
bhotaakorighibhu mo‑mangʼana hangʼu,
amare ahanene n‑gho changuru.
21 Ibheere,
mokwënda nikörë bhu?
Kana,
niiche bhowaanyu na ahimbo?
Ghasi niiche mo‑bhosiighi na akörö e bhuhörëëru?