Obhutaari bhotaakwëndëru ghate e bhakumi
5
Mahëënë amangʼana ngasanchiri kubha,
mboonyi‑ho obhutaari ghate yaanyu,
obhutaari bho mooto ghutaara no omukari wi ishe!
Obhutaari bhonga bhuyo,
bhotaamara korighibhu koru mo‑bhaato bhano bhataryeche Eryobha.
2 Ngwake inyu mokwihacha?
Ngʼoni mongitumatiri na komoruusi omooto uno aghuköra ghayo ghate yaanyu!
3 Nangabha eni neenyi kurë na niinyu,
amare akörö yaane neenyi haghirohamu na niinyu.
Mbe,
ibheere,
nimariri komotenera ekiina omooto uyo,
kinya bhuno nengaköriri hano nengabheere iyo.
4 Eriibhagha moghwikomana kwo riina re Mutëmi wiito Yesu,
eni neekubha haghirohamu na niinyu mo‑körö,
na changuru che Mutëmi wiito Yesu,
ncheekubha haghirohamu na niinyu.
5 Momoruusi omooto uyo ghate yaanyu,
na komotigha mo‑bhukangati bho Rishambu,
kubha asughara yaache e masari esireekereru,
nawe omwene ache atooribhu orosiko ruure ro ghugharuka kwo Mutëmi Yesu.
6 Obhwihachi bhoonyu bhotaanyi no obhwëra.
Moteeche kubha eriisari rino n‑kinya ekimëra ghesuuhu kino kehaatöti anyongo yoose e bhotu?
7 Mbe,
mubhe moriiyeri,
gho nchëra e komoruusi omooto uyo omobhe ghate yaanyu,
kinya koruusi ekimëra ghe kare.
Hayo mookubha abhaato abhahë,
kinya omughaate omuhë uno otaanyi ne ekimëra.
Hangʼu nibhu moonyi,
gho kubha Kirisito,
Omoona o Ngʼöndu o Bhaasaka,
a namariri koruusibhu kubha amaruusi atotoori.
8 Ibheere,
totaköra anyangi yiito e Bhaasaka gho kimëra ghe kare,
nigho amabhe na amasari,
amare toyikörë kwo mighaate ghino ghetaaghotooreru eghetondori,
b nigho omukörö mwero no obhuhëënë.
9 Mo‑nyaarubha ino ꞉neebhaandëkiire,
꞉neebhabhooriire kubha,
motaghöötana na abhataari.
10 Ekebhune keene ghetaare kubha,
motaghöötana na abhataari,
na abhasööhu,
na amanyangara,
koru bhano bhaghusëngëra chasanaamu,
ino bhataanyi abhakumi.
Nengabheere hangʼu,
mongarëngʼaaniire koru mo‑se ino!
11 Amare,
kino ꞉nyëëndiri kobhugha n‑kubha,
motaghöötana no omooto uno akwibherekera omokumi,
ino anyi omutaari,
no omusööhu,
koru uno aghusëngëra asanaamu,
hamu omokobhooshani,
hamu omurëëbhi,
hamu erinyangara.
Omooto kinya uyo,
motiishereri koru ghusanga nawe mo‑ndaaghëra.