Ghusëmana ghate e bhakumi
6
Aribha umu ghate yaanyu naanyi na amasëmö ighoro e mokumi mughëndi waache,
ngwake akohira amasëmö ghaache mo‑bhano bhataanyi abhakumi na ghotigha abhaato bhano bhakorekumi Eryobha?
2 Moteeche kubha abhatööbhiyu nibho bhaghotenera ekiina ase ino?
Ibheere,
aribha niinyu mokuucha ghotenera ekiina ase ino,
ngwake motaaghotora ghotenera ekiina amasëmö amasuuhusuuhu ghano ghaanyi ghate yaanyu?
3 Moteeche kubha ntokobhatenera ekiina koru bhamarayika?
Aribha hangʼu keenyi,
mbe,
mokwëndëru ghotenera ekiina amangʼana gha riimanya re kira orosiko.
4 Mbe,
hano mokoreghesa ighoro e mangʼana gha riimanya re kira rosiko,
ngwake mokohira amasëmö ghaanyu mo‑bhaato bhano koru bhataaghosooku ne eriikanisa?
5 Neghosiikëra hangʼu kubha morighi chaasoni.
Kana,
ghate yaanyu taanyi‑ho koru omooto umu uno anyi na amangʼiini,
uno aghotora ghotena ekiina ghate e mooto umu no omughëndi?
6 Amare inyu,
moonyi na atëëmö e ghusëmana inyu bheene kwo bheene mo‑mabharacha,
koru mo‑bhateni bha kiina bhano bhataanyi abhakumi!
7 Ghusëmana kuyo ngokwërëki kubha mokeyuru inkongʼorimu.
Tengabheere ngʼoni,
komotigha omooto aghukörë kobhe hamu akuhökë obhwame bhoocho?
8 Amare ibheere inyu,
niinyu mokobhaköra kobhe na kobhahöka obhwame bhoobho,
wiiki moghuköra ghayo mo‑bhakumi abhaghëndi bhaanyu!
9 Moteeche kubha abhaato abhabhe bhataakobhughabha obhutëmi bho Ryobha?
Motingʼiina!
Abhataari,
abhaato bhano bhaghusëngëra chasanaamu,
koru abhasubhe bhano bhakomisi na abhasubhe bhaghëndi bhaabho,
10 na abhiibhi,
na abhasööhu,
na abharëëbhi,
na abhakobhooshani,
na amanyangara,
bhayo bhoose bhataakobhughabha obhutëmi bho Ryobha.
11 Abhande ghate yaanyu hangʼu moore.
Amare ibheere,
gho kohetera kwo Mutëmi wiito Yesu Kirisito,
na gho changuru che Körö e Ryobha,
obhobhe bhoonyu mbweghuru,
mbomusuru,
na kubhareru obhuhëënë ambërë e Ryobha.
Abhakumi bhamoghongi Waryobha mo‑mebhere gheebho
12 Abhaato abhande ghate yaanyu mbakobhugha kubha,
“Ntwishereriiru ghuköra ebheghiro bhyose bhino tookwënda.”
Amare eni nebhugha kubha,
taanyi bhyose bhino bheenyi no obhwëra ghokwito.
Wiiki mokobhugha kubha,
“Ntwishereriiru ghuköra ebheghiro bhyose bhino tookwënda.”
Amare eni nteekubha omusësë o ghyokyose.
13 Abhande ghate yaanyu mbakobhugha kubha,
“Hano tookubha na anchëra ntokwëndëru kuraaghëra,
gho kubha emebhere ghiito ngekwënda ebhiinyakurë.”
Hangʼu keenyi,
amare eriibhagha ndekuucha rino Eryobha reghugharura emebhere ghiito ghibhe ghetaakwënda ebhiinyakurë.
Motabhugha kubha nturëngʼaaniire ghuköra obhutaari,
kinya bhuno tokwëndëru kuraaghëra eriibhagha toonyi na anchëra.
Nekobhugha hangʼu,
gho kubha Eryobha retatëëmiri emebhere ghiito gho ghiri e bhutaari,
amare ꞉ndeeghitëëmiri gho ghiri e komuhökëri Omutëmi,
nawe Omutëmi naghoghetugha bhoheene emebhere ghiito.
14 Wiiki,
Eryobha ndeghotoryoki itu kwo bhotoro bhooche,
kinya bhuno remoryokiri Omutëmi Yesu koru mo‑bhaku.
15 Moteeche kubha emebhere gheenyu,
n‑ebhyemo bhe mobhere o Kirisito?
Kana,
moghwituuri moghotora kwimoki ebhyemo bhe mobhere o Kirisito,
na kobhighöötani no omobhere o musöngörëëri?
Naabha,
koru hasuuhu!
16 Moteeche kubha omooto wowoose uno aghöötiine no musöngörëëri,
nabheere omobhere umu nawe?
N‑kinya bhuno yandëkuru mo‑Mandëkö Amatööbhiyu kubha,
“Bhayo bhabhere mbaakubha omobhere umu.”a
17 Amare omooto wowoose uno aghughöötana no Omutëmi,
naakubha n‑akörö imu nawe.
18 Gho ghayo,
mwisache obhutaari.
Amasari aghande ghoose ghano omooto aghuköra ngaanyi anche e mobhere waache,
amare omooto uno aghuköra obhutaari,
uyo naghuköra amasari ighoro e mobhere waache omwene.
19 Moteeche kubha,
emebhere gheenyu n‑Erisëngërö re Körö Ahörëëru ino enyi moose yaanyu,
ino Eryobha rebhaheere?
Mbe,
inyu emebhere ghiyo taanyi ghe gheenyu,
amare n‑ghe Ryobha,
20 gho kubha moghoruru kwo riighori ikoro.
Mbe,
moreghongi Eryobha mo‑mebhere gheenyu.