Bhawuro ˆaghatomani amakëërani kwo bhaato haghare haghare
16
Nekwënda nebhahë amangʼana gha mosubhaati wiito Siibhi.
Iwe n‑omutamishia o riikanisa rino reenyi mo‑moghya o Kenkireya.
2 Neghusabha momughënëhi bhoheene,
gho kubha woose n‑omokumi o Mutëmi Yesu.
Momughënëhi kinya bhuno ekwëndëru ghate e bhakumi bha Yesu Kirisito.
Wiiki,
neghusabha kubha,
momusakeri ghyokyose kino akwënda,
gho kubha iwe woose ꞉naabhasakiiri abhaato bhaaru,
koru eni woose.
3 Momukëëri Bhirisira haghirohamu na omosubhe waache Akiira.
Bhayo n‑abhatamishi abhaghëndi bhaane mo‑moremo ghe Kirisito Yesu.
4 Abhaato bhayo ꞉mbiiruusiri ghoku gho ghiri yaane.
Mbarëngʼaaniire ghwitabheru,
taanyi eni mwene uno nekobhiitabheri,
koru abhaato bhoose bha matöngö mo‑makanisa ghoose,
mbakobhiitabheri chwee.
5 Wiiki,
mobhakëëri abhakumi bhano bhahaatëmëëranera mo‑nyumba yaabho,
haghirohamu no omosiighani waane Ebhayineeto.
Iwe niwe o mumbërë komokumi Kirisito mo‑mukööwa o Asiya.
6 Momukëëri Mariyamu uno iköngʼiri chwee ghuköra emeremo gho ghiri yaanyu.
7 Momukëëri Andironiko na Yuuniya.
Bhayo n‑Abhayahuuti abhaghëndi bhaane bhano ꞉bhaabhöhuru haghirohamu na neeni mwighërëcha.
꞉Mbaankangatiri komokumi Kirisito,
wiiki m‑bha sooko chwee ghate e bhatomu.b
8 Momukëëri omosiighani waane Amburiyaato,
omokumi o Mutëmi Yesu Kirisito.
9 Momukëëri Wuribhano,
omutamishi mughëndi wiito mo‑moremo ghe Kirisito,
na koru omosiighani waane Sitaku woose momukëëri.
10 Momukëëri Abheere.
Iwe naare omuhëënë mo‑masaki maaru gho ghiri e Kirisito.
Wiiki mobhakëëri abhaato bha mo‑nyumba e Arisitobhuuro.
11 Momukëëri Herotiwoni,
Omuyahuuti omughëndi waane.
Mobhakëëri abhaato bha mo‑nyumba e Narikiso bhano bhakomokumi Omutëmi Yesu Kirisito.
12 Momukëëri Taribhayina na Tiribhosa.
Abhakari bhayo mbaghwiköngʼi chwee ghuköra emeremo ghe Mutëmi Yesu Kirisito.
Wiiki,
momukëëri omosiighani waane Bherisiisi.
Uno woose n‑omukari uno iköngʼi chwee ghuköra emeremo ghe Mutëmi Yesu Kirisito.
13 Momukëëri Ruubho,
omwahöru o Mutëmi,
haghirohamu na nyina.
Nyina uyo nantooriri kinya omwibhori waane.
14 Wiiki,
momukëëri Asinkirito,
Bhureghoni,
Heerime,
Bhatiroobha,
Heerima,
na abhakumi bhoose bhano bhaanyi haghirohamu nabho.
15 Gho kumareereri,
momukëëri Bhiroroogho no omosubhaati wiito Yuuriya,
na Neereya no omosubhaati waache na Orimubha,
haghirohamu na abhakumi bhoose bhano bhaanyi haghirohamu nabho.
16 Mukëërani kwo bhosiighani bho Kirisito.
Abhakumi bha makanisa ghoose gha Kirisito,
mbakobhakëëri.
Bhawuro ˆakabhashaangʼi abhakumi
17 Ibheere,
abhahiiri bhaane,
ˆnekabhasasaama kubha,
mubhe miisho na abhaato bhano bhakurëëta obhwahukani ghate yaanyu,
abhaato bhayo mbakwënda ghusari obhokumi bhoonyu,
na mbakwanga ameeghi ghano ꞉mweeghuru.
Mwikare kurë nabho,
gho kubha ameeghi ghaabho ghataaghuye haghirohamu na ghano ꞉mweeghuru!
18 Abhaato kinya bhayo bhataakomuhökëri Kirisito,
Omutëmi wiito,
amare mbaghukörëra chanda cheebho abheene.
Mbaghosiikëra amangʼana amachömu gha ghotegheri,
amare bharangʼiina abhakumi bhano bhakeere bhataamara bhaköngʼëri mo‑bhokumi.
19 Abhaato bhoose mbooghwire kebhuno mokomosooka Omutëmi Yesu.
Angʼana iyo neghontegheri chwee.
Koru hangʼu,
nekwënda mubhe na amangʼiini chwee gho ghuköra amangʼana amachömu,
na motabha ni isörö ryoryose gho ghuköra amabhe.
20 Eryobha rino rekobhaha omurëmbë,
ndeghughëri moritachera haase Erishambu ghano matiko,
na kobhaha obhokindi ighoro yaache.
Aghareeya e Mutëmi wiito Yesu Kirisito,
ibhe haghirohamu na niinyu.
[Hawubhaabha.]
21 Timotewo,
omutamishi omughëndi waane,
nakobhakëëri.
Wiiki,
Abhayahuuti abhaghëndi bhaane,
Rukiyo,
na Yasooni na Sosibhaatiro,
mbakobhakëëri.
22 Koru eni Teritiyo,
omwandëki o mangʼana gha nyaarubha ino e Bhawuro,
nekobhakëëri kwo riina re Mutëmi wiito Yesu Kirisito.
23 Ghaayo uno eni Bhawuro neenyi awaache,
nakobhakëëri,
haghirohamu na abhakumi bhoose bha riikanisa bhano bhaghwikomanera awaache.
Wiiki Eraasito,
omotindeki o chambiiri o moghya uno,
c haghirohamu no omohiiri wiito Kwarito mbakobhakëëri.
Bhawuro ˆakareghongi Eryobha
25 Ibheere,
ntokoreghongi Eryobha!
Iryo ndeghotora kobhaköra mubhe moriiköngʼi mo‑bhokumi bhoonyu,
kohetera mo‑Ngʼana Anchömu ighoro e Yesu Kirisito ino neere neraraghani ghokoonyu.
Angʼana iyo neere ebhisuru korwera kare,
amare ibheere,
nehunyuuru,
26 na kohetera mo‑Mandëkö Amatööbhiyu gha abharööti,
angʼana iyo nimënyuru kwo bhaato bha amatöngö ghoose mo‑se.
Eryobha re miishe ghyose niryo rihatëkiri angʼana iyo iraghanibhu mo‑bhaato bhoose,
kubha bhayo bhoose bhatore komokumi na komosooka Omutëmi Yesu.
27 Eryobha eryene niryo reenyi na amangʼiini ghoose.
Iryo niryo ribhe reraghongibhu emiishe ghyose,
gho nchëra e Yesu Kirisito!
Hawubhaabha.