Abharuumi 15

Mbe, itu bhano tuköngʼiiri mo‑bhokumi bhwito, ntokwëndëru ghoghumereri abhaghëndi bhiito bhano bhataamara bhaköngʼëri mo‑bhokumi bhoobho. Tobhasakëri mo‑bhutöbhu bhoobho, na totaköra amangʼana ghano ghaghotuchömëri itu bheene. 2 Omooto woose ghate yiito, iköngʼi ghuköra ghano ghakomotegheri omokumi omughëndi waache, kwo mangʼana amachömu, kubha obhokumi bho uno ataamara aköngʼëri bhuköngʼë. 3 Koru woose, taaköriri amangʼana ghano ghakomotegheri iwe omwene chiri. Amare ꞉naaköriri kinya bhuno Amandëkö Amatööbhiyu ghakobhugha kubha,

“Amatoki ghano bhaghoghotoka iye Waryobha,

ngambwine eni, omwahöru waacho.”

4 Ghoose ghano ꞉ghaandëkuru kare mo‑Mandëkö Amatööbhiyu, ꞉ngaandëkuru gho ghiri e ghotweghi itu. Amandëkö ghayo ngaghotusakeri ghoghumereri mo‑nyaako yiito na ghotughambisani, kubha tubhe na amiitëngʼërö.

5 Eryobha niryo reghotusakeri ghoghumereri na ghotughambisani. Ibheere, neghusabha kubha, rebhatoori mubhe no obhumu ghate yaanyu, gho kubha moghutambana eghetuubhaani ghe Kirisito Yesu. 6 Hayo niho na niinyu bhoose moghotora koreghongi Eryobha, Taata o Mutëmi wiito Yesu Kirisito, kwo mukörö umu na kwo riiraka rimu.

Eryobha ndiisheriiri Abhayahuuti na abhaato bha matöngö

7 Ibheere, mubhe moriighënëhi inyu bheene kwo bheene, kinya bhuno Kirisito abhaghënëhiri inyu, kubha abhaato bhareghongi Eryobha. 8 Mohiite kubha, Kirisito ꞉niichiri kobhahökëri Abhayahuuti, abhëërëki kubha, Eryobha n‑de bhuhëënë, ꞉ndiiköriri gho nchëra e Kirisito ghoose ghano ꞉riiraghiri bhasookoro bhiito. 9 Wiiki ꞉niichiri kubha abhaato bha matöngö bhareghongi Eryobha gho changori cheeche. N‑kinya bhuno Amandëkö Amatööbhiyu ghakobhugha kubha,

“Mbe, neghoghoghongi ghate e bhaato bha matöngö,

neghokwembera emyembo ghe ghoghoghongi iye.”

10 Wiiki, Amandëkö ngakobhugha kubha,

“Inyu abhaato bha matöngö,

muchömëru haghirohamu na abhaato bha Ryobha!”

11 Wiiki, Amandëkö ngakobhugha kubha,

“Inyu abhaato bha matöngö,

momoghongi Omutëmi Waryobha.

Inyu abhaato bha matöngö ghoose mo‑se,

moreghongi chwee Eryobha!”

12 Koru omurööti Isaaya woose ꞉naabhughiri kubha,

“Omooto umu, koru mo‑rwibhoro ro Yeese nakuucha,

nawe naghukangata amatöngö ghoose.

Na abhaato bha matöngö ghoose,

mbakomwitëngʼëra kubha iwe nakobhatoori.”

13 Eryobha niryo toghwitëngʼëra kubha ndeghuköra ghoose ghano ꞉reeturaghiri. Gho ghayo, nekobhasabhera kubha, rebhahë omurëmbë chwee na ghuchömëru kwaru hano mokwëndërëra korekumi. Hayo niho mookubha ne eriitëngʼërö ikoro, rino moonyi naryo gho changuru che .

Ekebhune ke Bhawuro ghe kwandëka anyaarubha ino

14 Abhahiiri bhaane, eni omwene neenyi no obhuhëënë kubha inyu n‑abhaato abhahöriicho chwee, na moonyi no obhumënyi bhoose, wiiki moonyi no obhotoro bho korwachana inyu bheene kwo bheene. 15 Koru hangʼu, nabhaandëkiire amangʼana aghande mo‑nyaarubha ino kwo bhosubhesubhe, kubha nebhahiiti amangʼana ghayo. Niköriri hangʼu, kurëngʼaana na aghareeya ino Eryobha reheere, 16 kubha nibhe omutamishi o Kirisito Yesu kwo bhaato bha matöngö. Nihaabhuru emeremo ghe bhuchaama ghe kobharaghaneri Angʼana Anchömu koru kwo Waryobha, kubha bhabhe kinya amaruusi ghano ghakoretegheri Eryobha, ghano ghamusuru na Akörö Ahörëëru.

17 Ibheere, hano nekorihökëri Eryobha gho changuru che Kirisito Yesu hangʼu, nekwihachera obhutamishi bhuyo. 18 Eni nteeghosiikëra angʼana yoyoose ayende, amare ghaare Kirisito aköriri kohetera ghokoone. ꞉Naaköriri abhaato bha matöngö bharesooke Eryobha, kohetera amangʼana ghano neere nerasiikëra ne emeremo ghino neere neraköra. 19 ꞉Mbaaruturu koresooka, gho kubha kohetera ghokoone mbarooche changuru che Kirisito mo‑bhyërëkërëri ne ebhiraghe. ꞉Neetoriri ghoghaköra gho changuru che Körö e Ryobha. Gho ghayo, ꞉niinaariri ahaghiro hoose kuraghani Angʼana Anchömu ighoro e Kirisito, korwera mo‑moghya o mbagha mo‑mukööwa o Iririiko. 20 Mo‑ghayo ghoose, neghwiköngʼi kuraghani Angʼana Anchömu ahaghiro hano abhaato bhataamara bharaghaneru angʼana ighoro e Kirisito. Neghuköra hangʼu, kubha netagharukera ghusëëmi emeremo obhuhë ahaghiro hano omooto owonde amariri ghuköra. 21 Kino neghuköra, n‑kinya bhuno Amandëkö Amatööbhiyu ghakobhugha kubha,

“Abhaato bhano bhataamara kuraghaneru

amangʼana ghaache, mbaghogharighi,

na abhaato bhano bhataamara bhaghooghu,

mbaghoghamënya.”

Amiigha gha Bhawuro ghuye Ruumi

22 Emeremo ghiyo, nighyo gheere gherahööchërëra mara kaaru kuucha bhowaanyu. 23 Amare ibheere, nimariri emeremo gheene ahaghiro hano. Na nibheere na amiigha gha kuucha bhowaanyu kwo meeka myaru. 24 Gho ghayo, neghwitëngʼëra kobhataarera na ghwikara haghirohamu na niinyu kwo riibhagha ighuhe, hano neekubha neraheta ghuye mo‑se e Hisibhaaniya. Neghusabha muuhë obhotoorereri bho koohiki Hisibhaaniya.

25 Ibheere, ˆneeghaye Yerusareemu gho ghiri e kohira obhotoorereri kwo bhakumi bhaghëndi bhiito bhano bhaanyi iyo. 26 Abhakumi bhano bhaanyi Maketoniya na Akaaya, mbarooche n‑ghuchömu koruusi omusörörö, bhabhatoori abhahabhe mo‑bhakumi bhano bhaanyi iyo Yerusareemu. 27 Nibho abheene ꞉bhiisheriiri ghuköra hangʼu. Amare m‑mahëënë kubha mbaanyi na asiire e kobhatoori, gho kubha abhaato bha matöngö bhano bhakumiri mbasangiri haghirohamu na Abhayahuuti mo‑rubhango ro ghotooribhu runo rohaahetera kwo Bhayahuuti. Gho ghayo, bhayo mbakwëndëru bhabhatoori Abhayahuuti kwo bheghiro bheebho. 28 Hano neekubha nimariri emeremo ghiyo ghe kobhaha abhakumi bha Yerusareemu obhotoorereri bhuyo, neghusëëma orughëndö roone ro ghuye Hisibhaaniya, na nekohetera bhowaanyu. 29 Kwo riibhagha rino neekubha neenyi hayo, nyeeche kubha Kirisito naghotwitabheri itu bhoose.

30 Mbe, abhahiiri bhaane, kurëngʼaana na ghughöötana kwito no Omutëmi wiito Yesu Kirisito, na kurëngʼaana no obhosiighi bhuno Akörö Ahörëëru etoheere, ˆnekabhasasaama kwo motema waane woose kubha, mwiköngʼi ghughöötana na neeni gho ghunsabhera kwo Waryobha. 31 Munsabhere kubha, abhaato bha mukööwa o Yuteya bhano bhakwanga komokumi Yesu Kirisito, bhataacha ghunkörëra amabhe. Wiiki munsabhere kubha abhakumi bha iyo Yerusareemu, bhiishereri ghosongʼaana obhotoorereri bhuno nekobhahirera koru kwo bhaato bha matöngö. 32 Mbe, aribha Eryobha rerasiigha, nekuucha iyo bhowaanyu gho ghuchömëru chwee, kubha nibhe ne eriibhagha re koweera haghirohamu na niinyu.

33 Eryobha rino rekobhaha omurëmbë, ribhe haghirohamu na niinyu bhoose. Hawubhaabha.