Motabhatenera ekiina abhakumi bhaghëndi bhaanyu
14
Momughënëhi omokumi mughëndi waanyu uno ataamara aköngʼëri mo‑bhokumi bhooche.
Motahakaana nawe ighoro e miihëëbhö ghaache gharaanga koghwana na ghaghaanyu.
2 Omooto uno aköngʼiiri mo‑bhokumi,
nakorighi kubha naghotora kurë ghyokyose kiire.
Amare owonde uno ataamara aköngʼëri mo‑bhokumi bhooche,
naghwituuri kubha naghwisherereru kurë chaanyi echeene.
3 Omooto uno akurë ghyokyose kiire,
atamutaraaha uno akurë chaanyi.
Omooto uno akurë chaanyi,
atamotenera ekiina uno akurë ghyokyose kiire,
gho kubha Eryobha ndemwisheriiri kebhuno anyi.
4 Iye toonyi no obhotoro bhobhoose bho ghotenera ekiina omutamishi o mutëmi owonde.
Omutëmi waache niwe eche aribha omutamishi waache nataasiri hamu tiyaanyi.
Wiiki omutamishi waache naghuköra bhoheene,
gho kubha Omutëmi Yesu naanyi no obhotoro bho komotoori abhe araköra hangʼu.
5 Omooto umu nakorighi kubha orosiko nyarebhe ndoonyi no obhwëra ghokera orosiko oronde,
amare omooto owonde nakorighi kubha chaasiko choose nchetuubhiine.
Omooto woose abhe araköra kebhuno obhongo bhooche bhokomotoma.
6 Omooto uno akorighi kubha orosiko nyarebhe ndoonyi no obhwëra ghokera chaasiko echende,
naghuköra hangʼu kubha amuchömëri Omutëmi Yesu.
Omooto uno akurë ghyokyose kiire,
naghuköra hangʼu kubha amuchömëri Omutëmi Yesu,
gho kubha naakurë gho koriitabheri Eryobha.
Owonde uno akurë chaanyi echeene,
naghuköra hangʼu gho kubha nakwënda ghuchömëri Omutëmi Yesu.
Uyo woose nakoriitabheri Eryobha.
7 Neghosiikëra hangʼu,
gho kubha taanyi‑ho omooto ghate yiito uno amanyiri gho ghiri yaache omwene,
koru uno aghoku gho ghiri yaache omwene.
8 Eriibhagha rino toonyi abhahöru,
ntokumanya gho ghiri e Mutëmi Yesu.
Wiiki eriibhagha rino tooghoku,
ntooghoku gho ghiri e Mutëmi Yesu.
Gho ghayo,
aribha toonyi abhahöru hamu tokuure,
itu n‑abhaato bhaache toonyi.
9 Kirisito ꞉naakuure na koryoka,
kubha abhe Omutëmi o bhaato bhoose,
abhaku na bhano bhaanyi abhahöru.a
10 Ibheere,
iye n‑niwe uno oghotenera ekiina omokumi mughëndi waacho?
Na niiye ngwake oghutaraaha mughëndi waacho?
Itu bhoose ntokwimeerera ambërë e ghetumbe ke Ryobha,
na ghoteneru ekiina.
11 N‑kinya Amandëkö Amatööbhiyu ghakobhugha kubha,
“Omutëmi Waryobha abhugha,
ˆNekaraheri,
omooto woose nakobhuna ebheru
ambërë yaane,
no omooto woose naghongongi kwo roreme rooche.”b
12 Gho ghayo,
omooto woose ghate yiito,
naghwitonda omwene ambërë e Ryobha.
Uno aköngʼiiri mo‑bhokumi atamutaraaha uno ataamara aköngʼëri
13 Gho ghayo,
totighe ghotenerana ekiina.
Twishererani ghotigha ghuköra ghyokyose kino gheghughëri omokumi mughëndi wiito oghu kobhe hamu ghuköra amasari.
14 Kurëngʼaana na ameeghi gha Mutëmi Yesu,
nyeeche kwo bhuhëënë kubha,
ghetaanyi‑ho ekiinyakurë ghyokyose egheghonchu.
c Amare aribha omooto akorighi ekiinyakurë nyarebhe n‑gheghonchu,
hayo niho ekiinyakurë kiyo gheekubha gheghonchu ghokooche.
15 Gho ghayo,
aribha iye gho kurë ekiinyakurë nyarebhe ngoghughëri omokumi mughëndi waacho abhe na amacheeche mo‑motema waache,
hayo nookubha otaanyi no obhosiighi kwo mughëndi waacho.
Mbe,
otiishereri kubha,
gho nchëra e kiinyakurë keecho,
omobhori omooto uno Kirisito akweriire!
16 Egheghiro kino okorighi n‑ghichömu ghokoocho,
amare bhaghëndi bhaacho mbakobhugha kubha n‑kebhe,
otaghiköra.
17 Amangʼana amachömu mo‑bhaato bha bhutëmi bho Ryobha taanyi ighoro e kurë hamu kunyo,
amare n‑ghuköra ghano Eryobha rekwënda,
kubha no omurëmbë na kumanya gho ghuchömëru.
Ghayo ghoose ngaakubha kwo bhotoorereri bho Körö Ahörëëru.
18 Omooto wowoose uno akomukörëra amangʼana ghayo Kirisito,
nakorichömëri Eryobha,
wiiki na abhaato mbaghuchömëru nawe.
19 Gho ghayo,
twiköngʼi eriibhagha ryose ghuköra amangʼana ghano ghakurëëta omurëmbë na ghano ghaghuköngʼi bhaghëndi bhiito mo‑bhokumi.
20 Otasari emeremo ghe Ryobha gho kurë ekiinyakurë ghyokyose kino okwënda.
Mahëënë,
ebhiinyakurë bhyose mbeghwisherereru koreebhu,
amare n‑kobhe kurë egheghiro ghyokyose kino gheghotora komuköra omooto akörë amasari.
21 Ngʼoni otighe kurë anyama,
hamu kunyo adivaayi,
hamu ghuköra ghyokyose kino gheghotora komuköra mughëndi waacho akörë amasari.
22 Ibheere,
kino iye oghokumi ighoro e mangʼana ghayo,
ghabhe ghate yaacho na ambërë e Ryobha.
Ngʼoni omooto uno ataaghwitenera ekiina hano aghuköra egheghiro kino akorighi keenyi bhoheene.
23 Amare,
wowoose uno anyi na ahaho ighoro e kiinyakurë kino akurë,
uyo naghoteneru ekiina ne Eryobha,
gho kubha omooto uyo naghokumi kubha kiire aghuköra n‑kebhe ambërë e Ryobha.
Kinya omooto aghuköra ghyokyose kino ataaghokumi kubha n‑ghichömu,
hayo niho aghuköra amasari.