Mobhasooke abhakangati bha serekaare
13
Omooto woose nakwëndëru ghosooka abhakangati bha serekaare.
Mumënyë kubha,
Eryobha niryo rebhatooriri abhakangati bhayo mo‑bhukangati bhoobho.
2 Gho ghayo,
omooto wowoose uno akwanga obhukangati bhoobho,
nakoryanga Eryobha rino rebhatooriri mo‑bhukangati bhuyo.
Wiiki omooto araryanga,
nakwirëëtëra ghoteneru ekiina naryo.
3 Abhakangati bhataaghughëri omooto uno aghuköra amachömu atiine,
amare m‑bhaare bhaghuköra amabhe nibho bhaghotiina.
Gho ghayo,
aribha otaakwënda ghotiina omukangati,
ukörë amachömu,
nawe naghoghoghongi.
4 Omukangati o serekaare n‑omutamishi o Ryobha,
ne emeremo ghino aghuköra ngeenyi no obhwëra ghokoonyu.
Amare,
oraköra amabhe,
nokomotiina!
M‑mahëënë kubha naanyi no obhotoro bho kobharööna.
Gho ghuköra hangʼu,
naakubha omutamishi o Ryobha na kohikeerani ghukarara kooche kwo uno aghuköra amabhe.
5 Gho ghayo,
mokwëndëru kobhasooka abhakangati.
Motabhasooka gho kubha moghotiina ghukarara kwo Ryobha,
amare mobhasooke gho kubha mweche bhoheene mo‑metema gheenyu kubha,
Eryobha ndekwënda mubhe moraköra hangʼu.
6 Wiiki,
nikyo gheghughëri inyu morareha erighööti.
Abhakangati hano bhaghwiköngʼi ghuköra emeremo gheebho,
n‑Eryobha bhaghukörëra.
7 Gho ghayo,
mubhe moraköra amangʼana ghano mokwëndëru kobhakörëra.
Aribha onyi na asiire erighööti,
mbe,
orehe erighööti.
Wiiki aribha mokwëndëru ghosooka omooto,
mbe,
momosooke.
Obhosiighi nibho anchëra e kohikeerani emeghiro ghe Ryobha
8 Motabha na asiire yoyoose no omooto,
amare asiire ino moonyi nayo n‑e ghosiighana okwene.
Uno amosiighiri omughëndi waache,
uyo niwe akohikeerani emeghiro ghe Ryobha.
9 Mööhi,
emeghiro ngekobhugha kubha,
“Otataara,
no otiita,
no otiibha no otiighomba egheghiro ke mughëndi waacho.”
a Amare,
emeghiro ghiyo ne eghende ghyose ngighöötiine mo‑moghiro umu uno okobhugha,
“Omosiighe omwatani waacho,
kinya bhuno wisiighiri iye omwene.”b
10 Omooto uno amosiighiri omwatani,
taakomukörëra amabhe.
Gho ghayo,
obhosiighi nibho anchëra e ghosooka emeghiro ghe Ryobha.
11 Mubhe moraköra ghayo ghoose,
gho kubha mweche,
asa e kobhooka koru mo‑chandöörö nimariri kohika.
Mööhi,
eriibhagha re bhotoori bhwito mboonyi haghuhe na niitu,
ghokera hano tusëëmiri komokumi Yesu.
12 Ibheere,
obhotiko ˆbhokiihereekerera na amake ˆghaghatingʼi.
Gho ghayo,
totighe amaköri amabhe ghano ghahaaköru mo‑kengʼuuri,
na tughöötë ebhiröönërö bhe bhwero.
13 Tubhe na atëëmö inchömu kinya abhaato bhano bhamanyiri mo‑bhwero.
Totabha abhaato bhano bhaghuköra chanyangi che kehobhaaru no obhurëëbhi.
Totaköra obhutaari bho manga ghoghoose ghaare,
koru ghuköra amangʼana gha chaasoni.
Totabha abharööni,
hamu kubha ne eriihari.
14 Amare ibheere,
mo‑riimanya reenyu ryose,
mubhe morakangatu no Omutëmi Yesu Kirisito.
Motiishereri koru hasuuhu ghukangatu na simoka yaanyu e masari moratambana amiigha ghaanyu amabhe.