Mwiruusi korihökëri Eryobha
12
Ibheere abhahiiri bhaane,
mweche kebhuno Eryobha reghotorigheri changori.
Gho ghayo,
ˆnekabhasasaama kubha,
moruusi eriimanya reenyu kwo Waryobha.
Mubhe kinya amaruusi ghano ghaanyi amahöru,
na amatööbhiyu,
ghano ghakoretegheri Eryobha.
Ghuköra hangʼu,
niyo anchëra e hëënë e korisëngëra.
2 Moteegha chaasughara che bhaato bha mo‑se ino,
amare motighe Eryobha righarure emetema gheenyu,
kubha mubhe na amiihëëbhö amahë.
Hayo niho mokwegha kumënya kebhuno Eryobha rekwënda mukörë.
Mokumënya n‑amangʼana ghaahë ghano ghaanyi amachömu,
na ghano ghakoretegheri,
wiiki na ghano ghahikeriine.
3 Ibheere,
Kirisito naaheere aghareeya nibhe omotomu waache.
Gho ghayo,
ˆnekabhoorera omooto woose kubha,
atiirighi kubha nakurëngʼaanera ghokera kebhuno anyi,
amare abhe na amangʼiini.
Amare mubhe moriirighi kubha,
omooto woose nahaabhuru obhokumi bhuure bhuure ne Eryobha.a
4 Kinya bhuno mweche,
omobhere n‑umu,
amare noonyi ne ebhyemo bhyaru,
na kira ekyemo nkeenyi no omoremo waache.
5 Hangʼu nibhu na niitu toonyi.
Itu ntoonyi bhaaru,
amare ntubheere omobhere umu gho ghughöötana kwito na Kirisito.
Mo‑mobhere waache,
omooto woose n‑ekyemo ke mughëndi waache.
6 Gho ghayo,
ntoonyi ne ebhihaano haghare haghare,
kinya bhuno Eryobha ꞉reetoheere gho ghareeya yaache.
Omooto uno ahaabhuru ekihaano ghe koruusi obhurööti,
ahökëri ekihaano kiyo kurëngʼaana no obhokumi bhooche.
7 Omooto uno ahaabhuru ekihaano ghe kuhökëri abhaghëndi bhaache,
abhahökëri bhoheene.
Wiiki omooto uno ahaabhuru ekihaano ghe kweghi,
eghi bhoheene.
8 Omooto uno ahaabhuru ekihaano ghe ghughambisani bhaghëndi bhaache,
akörë hangʼu.
Omooto uno ahaabhuru ekihaano ghe ghusambaarukera abhaato,
abhasambaarukere kwo mukörö mwero.
Omooto uno ahaabhuru ekihaano ghe ghukangata,
akangate gho ghwiköngʼi chwee.
Wiiki omooto uno ahaabhuru ekihaano ke bheghongi,
abharigheri ebheghongi abhaato gho ghuchömëru.
Mosiighane
9 Mobhasiighe abhaghëndi kwo mukörö mwero.
Motighe kimu ghuköra amabhe,
amare mukörë amachömu eriibhagha ryose.
10 Mosiighane inyu abheene kwi inyu bheene kinya abhahiiri.
Omooto woose iköngʼi komosooka omughëndi waache.
11 Motabha abhatöbhu gho ghuköra emeremo ghe Ryobha,
amare mukangatu na Akörö Ahörëëru ghuköra emeremo ghiyo kwo mukörö woose,
b gho komuhökëri Omutëmi Yesu.
12 Muchömëru gho kubha moonyi ne eriitëngʼërö re kubhöna ghoose ghano Eryobha ꞉reebharaghiire.
Moghumereri mo‑nyaako ino ekobhabhöna,
na mwëndërërë korisabha Eryobha.
13 Mobhatoori abhakumi abhaghëndi bhaanyu mo‑mënda ghaabho,
wiiki mubhe bhango kobhaghënëhi abhaghëni mo‑chaaka cheenyu.
14 Mobhasabhere abhaato bhano bhakobhanyaaki,
kubha Eryobha rebhiitabheri.
Motabha morabhasabhera kubha bhiihiimu.
15 Muchömëru haghirohamu na bhano bhaghuchömëru,
na morere haghirohamu na bhano bhakorera.
16 Mwikare haghirohamu kwo mukörö umu.
Motabha moriihacha,
amare mwinyööhi,
mubhe no obhughöötani na abhaato bha haase.
Motiirighi kubha niinyu abheene moonyi na amangʼiini.
17 Hano abhaato bhakobhakörëra amabhe,
motarehani amabhe kwo mabhe.
Amare eriibhagha ryose hano mookubha mokeere ghuköra ghyokyose kwo bhande,
mwihëëbhë singa na mukörë ghaare ghakorighibhu kubha m‑machömu kwo bhaato bhoose.
18 Kwo ribhaara reenyu,
mwiköngʼi ghuköra ghyokyose kino inyu moghotora,
mubhe no omurëmbë na abhaato bhoose.
19 Abhasiighani bhaane,
motarehani asiire,
amare motighere Eryobha rikörë ghayo.
Neghosiikëra hangʼu,
gho kubha mo‑Mandëkö Amatööbhiyu Omutëmi Waryobha nakobhugha kubha,
“Korehani asiire n‑emeremo gheene,
eni niwe nekorehani asiire.”c
20 Wiiki,
Amandëkö Amatööbhiyu ngakobhugha ighoro e korehani asiire kubha,
“Aribha omobhisa waacho anyi na anchëra,
omuhë ebhiinyakurë.
Wiiki aribha anyi na anyööta,
omuhë ghe kunyo.
Oraköra hangʼu,
nookubha kinya omokomiire
amakara gha mororo a‑mutu waache.”d
21 Otakindu na amabhe ghano oghukörëru na abhaato,
amare nekwëndëru okinde amabhe gho kobhakörëra amachömu.