Abharuumi 11

Eryobha retabhaangiri Abhiisiraeri

Ibheere ˆnekabhoori kubha, Eryobha ndyangiri abhaato bhaache? Tiyaanyi! Eni omwene n‑Omwisiraeri neenyi, o mo‑rwibhoro ro , koru mo‑ritöngö re Bhenchamiini. 2 Eryobha retabhaangiri abhaato bhaache bhano ꞉ryaahwire korwera hano ase ere ekeere ghutëëmu. Ghasi moteeche kino Amandëkö Amatööbhiyu ghakobhugha ighoro e murööti ? Eriibhagha rino ꞉asëmiri Abhiisiraeri ambërë e Ryobha, ꞉naabhughiri kubha, 3 “Omutëmi, abhaato bhano mbiitiri abharööti bhaacho, na mbahanywire kira ahaghiro ha koruuseri amaruusi. Neeni omwene chiri nisaaghiri, koru eni woose mbakwënda koonyita!” 4 Amare Eryobha nibhu remugharokiiri? ꞉Ndeebhughiri kubha, “Nisaaghiri gho ghiri yaane abhaato ebheku mohungate (7,000) bhano bhataakomusëngëra Bhaari.”

5 Koru ibheere hangʼu keenyi, mbasaaghiri abhaato bharëngʼaaneru hangʼu bhano Eryobha ryahwire gho ghareeya yaache. 6 Mbaahwiru gho ghareeya e Ryobha, gho ghayo bhataaghotooribhu gho ghiri e maköri ghaabho. Aribha bhangatooriibhu gho ghiri e maköri ghaabho, mbe, tengabheere aghareeya wiiki. 7 Gho ghayo, amangʼana hangʼu ghaanyi, Abhiisiraeri ꞉mbaatabhiire anchëra e kubha abhahëënë ambërë e Ryobha, amare bhatayebhwine. M‑bhaare abheene bhano bhaahwiru ne Eryobha, nibho bhayebhwine. Abhande bhoose bhano ꞉bhaasaaghiri, Eryobha rekabhaköra bhabhe ne emetema miköngʼu. 8 N‑kinya bhuno Amandëkö Amatööbhiyu ghakobhugha kubha,

“Eryobha ndebhaköriri bhabhe ne metema miköngʼu,

ndebhahunyiri amiisho kubha bhatarighi,

wiiki ˆrekabharibha amatu kubha bhatooghu.

Hangʼu bhaanyi mbagha reero ino.”

9 Koru omutëmi Tawuti ꞉naabhughiri kubha,

“Hano bhaghuköra chanyangi cheebho,

Eryobha rechiigharure chibhe omuhëtö o kobhaghööti,

no omuhëtö o kobhaghwishi, na kobharööna.

10 Amiisho ghaabho ghabhori obhwero,

kubha bhatarighi ghyokyose kiire,

ne emighöngö gheebho ghyëndërërë ghwikumba,

kurëngʼaana na anyaako yaabho.”

Kwanga kwo Bhiisiraeri ˆekabha orubhango kwo bhaato bha matöngö

11 Ibheere ˆnekabhoori kubha, kana, Abhiisiraeri ꞉mbiituurirituuriri kubha bhagho na ghosireekerera inkongʼorimu? Tiyaanyi! Amare, n‑kurëngʼaana na kwanga koobho kubha obhotoori mbobhahikiire koru abhaato bha matöngö. Gho nchëra iyo, Eryobha ꞉ndyëëndiri Abhiisiraeri bharigheri eriihari amatöngö kubhöna obhotoori kinya bhuno ibho bhabhwine. 12 Ibheere, aribha mo‑se yoose abhaato bha matöngö, mbabhwine aghareeya inkoro gho kubha Abhiisiraeri mbamwangiri Kirisito, mbe, mbakubhöna aghareeya inkoro chwee hano Abhiisiraeri bhaakubha bhatooriibhu.

13 Ibheere, neghosiikëra na niinyu, abhaato bha matöngö. Mahëënë Eryobha ndentomiri nibhe gho ghiri yaanyu. Nekwihachera emeremo ghino nihaabhuru kubha, 14 gho nchëra yoyoose yiire, nebhakörë Abhiisiraeri abhaghëndi bhaane bhabhe na amiigha gha kubhöna obhotoori kinya bhuno inyu mobhwine, kubha abhamu ghate yaabho bhatooribhu. 15 Mööhi, hano Eryobha rebhaangiri Abhiisiraeri, rekoghwana na abhaato bha matöngö. Gho ghayo, hano Eryobha rekobhiishereri Abhiisiraeri, neekubha kinya n‑abhaku bharyokiri!

16 Aribha omooto aruusiiri Eryobha omunöghö waache o mumbërë, mbe, omunöghö waache woose nookubha mutööbhiyu. Wiiki, aribha emerya ghe museyituuni m‑mitööbhiyu, mbe, koru ne ebhisaghe bheeche bhyose mbeekubha bhitööbhiyu. 17 Ibheere, ebhisaghe ebhimu mbenunguru, na niinyu bhano moonyi kinya ebhisaghe bhe miseyituuni ghi ibhara moghaghöötanibhu moghasanga haghirohamu ne ebhisaghe bhe museyituuni uno otaanyi wi ibhara. Ebhisaghe bhyose mbekubhöna ebhiinyakurë koru mo‑merya ghe museyituuni o kare. 18 Gho ghayo, motataraaha ebhihaghe bhino bhenunguru. Motiihacha, na mohiite kubha, emerya ghetaakobhiitëngʼëra inyu, amare inyu nibho moghoghiitëngʼëra emerya.

19 Hande moghotora kobhugha kubha, “Ebhihaghe bhiyo ꞉mbeenunguru, kubha netore kwemibhu mo‑riitina riyo.” 20 Iyo m‑mahëënë. Ebhisaghe bhiyo ꞉mbeenunguru gho kubha bhataakumiri, na niiye noonyi mo‑bhisaghe bhe museyituuni gho kubha noghokumi. Gho ghiri iyo iköngʼi, otiihacha, amare otiine Eryobha. 21 Erabha Eryobha ꞉ndiirööniri Abhiisiraeri bhano bhaanyi ebhisaghe bhe simoka bhe museyituuni, koru na niiye, ndeghotora ghokurööna.

22 Mumööhi kebhuno Eryobha rekobhakörëra obhuchömu abhaato abhande, na kebhuno rekobharööna abhaato abhande kwo bhororo. Ndekobharööna bhano bhaangiri komokumi Kirisito, na ndeghoghukörëra obhuchömu iye, aribha okwëndërëra komokumi. Amare aribha oratigha komokumi, iye woose nokonungu. 23 Erabha Abhiisiraeri bhayo bhariigharura na komokumi Kirisito, mbaghugharokibhu wiiki mo‑museyituuni waabho, gho kubha Eryobha ndeenyi no obhotoro bho kobhagharoki wiiki. 24 Iye uno otaanyi Omwisiraeri, iye n‑kinya eghisaghe ke museyituuni wi ibhara. ꞉Noonunguru na kwemu mo‑museyituuni uno ꞉weemiru na abhaato, nangabha enyi angʼana e koroghoori. Ibheere umënyë kubha, taanyi emeremo emiköngʼu kwo Waryobha ghugharukera kwemi Abhiisiraeri bhano bhaanyi kinya ebhisaghe bhe simoka mo‑museyituuni o hëënë.

Eryobha ndehaarigheri changori abhaato bhoose

25 Abhahiiri bhaane, nekwënda mumënyë ighoro e obhorwachi bho Ryobha bhuno bhoore bhobhisuru korwera kare, kubha motaacha ghwitëngʼëra obhongo bhoonyu inyu bheene. Abhiisiraeri abhamu mbaakubha ne emetema miköngʼu, mbagha hano omubharo o bhaato bha matöngö bhano Eryobha rekwënda ohikeerane. 26 Gho nchëra iyo, Abhiisiraeri bhoose mbaghotooribhu. N‑kinya bhuno Eryobha ꞉reebhughiri mo‑Mandëkö Amatööbhiyu kubha,

“Omotoori nakuucha koru ,

naghuköra orwibhoro ro Yakobho

rotighe koryanga Eryobha.

27 Hayo niho reene nabho rekohikeerana,

hano nekobhaabhëra amasari ghaabho.”

28 Hano Abhiisiraeri ꞉bhaare bharaanga Angʼana Anchömu ighoro e Yesu Kirisito, ꞉mbiiköriri kubha abhabhisa bha Ryobha. Amare angʼana iyo nibheere obhwëra ghokoonyu, inyu abhaato bha matöngö. Koru hangʼu, Eryobha rekeere rebhasiighiri Abhiisiraeri, gho kubha ndeere ryahwire bhiishakoro na ghuköra nabho eriiraghano. 29 Eryobha reraahura abhaato bhaache na kobhiitabheri, retaaghotora ghwigharura.

30 Kare, inyu motaare moraresooka Eryobha, amare ibheere mosongʼaaniri ebheghongi bhe Ryobha, gho kubha Abhiisiraeri bhataresookiri. 31 Mööhi, amangʼana hangʼu ghaanyi, ibho bhataakoresooka Eryobha ibheere, kubha inyu morigheru changori, na bhoose bharigheru changori kinya inyu. 32 Eryobha ꞉ndeebhaköriri abhaato bhoose kinya abhabhöhu bha masari, kubha rebharigheri changori bhoose.

Eryobha reghongibhu

33 Oo! N‑niwe uno aghotora kumënya

kebhuno bhoonyi obhwame na amangʼiini

no obhumënyi bho Ryobha?

Mboghokera obhumënyi bhwito!

Taanyi‑ho omooto uno aghotora ghwisuncha

ghotena ekiina keeche,

hamu kumënya chanchëra cheeche.

34 “N‑niwe uno eche

ghano Omutëmi Waryobha akwihëëbha?

Wiiki n‑niwe uno aghotora komorwacha?”

35 “N‑niwe uno areheere Eryobha egheghiro ghyokyose

kino akwënda Eryobha remugharokeri?”

36 Eryobha niryo ꞉riitëëmiri ebheghiro bhyose.

N‑kohetera ghokooche

ebheghiro bhyose mbekwëndërëra kubha‑ho,

ne ebheghiro bhyose mbeenyi‑ho

gho ghiri e bhokumi bhooche obhokoro.

Eryobha reghongibhu emiishe ghyose! Hawubhaabha.