10
Abhahiiri bhaane,
kino nekwënda mo‑motema waane n‑kubha Abhiisiraeri bhatooribhu.
Kiyo nikyo nekobhasabhera kwo Waryobha chaasiko choose.
2 Nekobhabhoorera inyu,
abhaato bhayo mbaghwiköngʼi koritabhara Eryobha,
koru hangʼu bhateeche bhuno Eryobha rekwënda bharitabhare.
3 Ibho bhatayitambiine anchëra ino Eryobha rekubharera abhaato obhuhëënë,
gho kubha bhatayeeche,
bhaghatabhara anchëra yaabho abheene e kwibhönëra obhuhëënë.
4 Kirisito nahikeriini emeghiro ghyose ghe Musa,
kubha abhaato bhoose bhano bhakomokumi,
bhabhareru kubha mbaanyi no obhuhëënë ambërë e Ryobha.
Abhaato bhoose mbaghotora ghotooribhu
5 Ghano nigho amangʼana ghano Musa ꞉andëkiri ighoro e kubha omuhëënë ambërë e Ryobha gho nchëra e ghosooka emeghiro,
“Omooto uno aghuköra ghano ghakwëndëru ne emeghiro,
naakubha no obhuhöru gho ghughööta emeghiro ghiyo.”a
6 Amare ighoro e kubhareru kubha no obhuhëënë ambërë e Ryobha gho nchëra e ghokumi,
Musa ꞉naabhughiri kubha,
“Motiibhoori mo‑metema gheenyu kubha,
‘N‑niwe uno aghotora ghotiira ighoro mbagha Mwishaaro?’ ”
Kobhugha hangʼu n‑kinya ghuye iyo komusabha Kirisito ache hano mo‑se.
7 Wiiki,
Musa ꞉naabhughiri kubha,
“Koru motabhugha,
‘N‑niwe uno aghotora ghwika haase mbagha nyaari?’ ”
Kobhugha hangʼu n‑kinya tookwënda komoryoki Kirisito.
8 Amare Amandëkö Amatööbhiyu ngakobhugha,
“Angʼana e Ryobha neenyi haghuhe na niiye,
neenyi mo‑monu waacho na mo‑motema waacho.”
b Ibheere,
angʼana iyo niyo ino tokuraghani ighoro e komokumi Yesu Kirisito.
9 Angʼana iyo n‑kubha,
orasiikëra koru mo‑monu waacho iye omwene kubha,
“Yesu n‑Omutëmi,”
na ghokumi mo‑motema waacho kubha Eryobha ꞉ndeemoryokiri koru mo‑bhaku,
noghotooribhu ne Eryobha.
10 Omooto aramokumi Yesu Kirisito mo‑motema waache,
niho akubhareru kubha naanyi no obhuhëënë ambërë e Ryobha.
Ariishereri komokumi kwo monu waache,
niho aghotooribhu.
11 Amandëkö Amatööbhiyu ngakobhugha kubha,
“Omooto woose uno akomokumi,
taaghosookibhu.”c
12 Amangʼana ghayo ngakwërëki kubha bhotaanyi‑ho obhwahukani ghate e Abhayahuuti hamu abhaato bha matöngö.
Naanyi‑ho Omutëmi umu hangʼu kwo bhaato bhoose.
Iwe m‑muhaani chwee kwo bhaato bhoose bhano bhakomusabha.
13 N‑kinya Amandëkö Amatööbhiyu ghakobhugha kubha,
“Wowoose uno aghusabha abheru koru kwo Mutëmi naghotooribhu.”d
14 Ibheere,
nibhu abhaato bhaghotora komusabha aribha bhataamokumiri?
Wiiki nibhu bhaghotora komokumi aribha bhataamara kooghu angʼana yaache?
Na nibhu bhaghotora kooghu angʼana yaache aribha omooto ataghiire kobharaghaneri?
15 Wiiki nibhu abhaato bhaghotora ghuye kuraghani angʼana iyo aribha bhatatomuru?
N‑kinya bhuno Amandëkö Amatööbhiyu ghakobhugha kubha,
“Kuucha kwo mooto uno akurëëta Angʼana Anchömu,
ngoghotegheri abhaato bhano bhakomutëghëërëra!”e
16 Koru hangʼu,
taanyi Abhiisiraeri bhoose bhayiisheriiri na koyesooka Angʼana Anchömu iyo,
abhaaru ꞉mbaayaangiri.
Omurööti Isaaya ꞉naabhughiri kubha,
“Omutëmi,
n‑niwe uno ꞉akumiri amangʼana ghiito?”f
17 Gho ghayo,
abhaato mbaghotora komokumi Kirisito erabha bharooghu angʼana ighoro e Kirisito.
Wiiki mbaghotora kooghu erabha angʼana iyo e Kirisito iraghiinu.
18 Mbe,
aribha hangʼu keenyi,
tigha nebhoori eribhoori.
Kana,
Abhiisiraeri bhataamara kooghu angʼana iyo?
M‑mahëënë kubha mbooghwire,
gho kubha Amandëkö Amatööbhiyu ngakobhugha kubha,
“Eriiraka reebho ndyoghwiru mo‑se yoose,
na amangʼana ghaabho ngahikiri
mbagha hano ase irëngiire.”g
19 Nebhoori eribhoori erende wiiki.
Kana,
hano Abhiisiraeri bhooghwire angʼana iyo,
bhatayimënyiri?
M‑mahëënë kubha mbamënyiri,
gho kubha eriibhagha re Musa,
Eryobha ꞉ndeebhabhooriire kubha,
“Nekobhaköra mobharigheri eriihari
abhaato bhano bhataanyi abhaato bhaane.
Na abhaato bhano bhateeche ghyokyose,
nekobhaköra mubhe morabhakararera chwee.”h
20 Wiiki,
omurööti Isaaya ꞉naabhughiri kwo bhosubhesubhe amangʼana gha Ryobha kubha,
“Abhaato bhano bhataaghuntabhara,
nibho mbandooche.
Na abhaato bhano bhataakobhoori angʼana yaane,
nibho niyëërëkiini ghokoobho.”i
21 Amare ighoro e Bhiisiraeri,
Eryobha ꞉ndeebhughiri kubha,
“Mwishe moghima nyëndiri koghwana
na abhaato bhaane,
amare n‑abhaato bhano bhataaghonsooka,
wiiki n‑abhaato bhano bhakonyanga.”j