Bhawuro ˆakabhooghwera obhororo Abhiisiraeri
9
Kirisito neeche kubha kino neghosiikëra ibheere,
n‑ke mahëënë.
Koru omotema waane uno oghukangatu na Akörö Ahörëëru woose nokuhëënëhi kubha,
nteeghosiikëra obhobhiihi.
2 Mahëënë,
eni neenyi no obhororo bhwaru no obhosongo bhuhaari chwee mo‑motema waane,
3 gho ghiri e bhaato bha ritöngö reene.
Aribha engabheere‑ho anchëra yoyoose,
eni nengiisheriiri kwihiimu na kwangu na Kirisito,
erabha gho ghuköra hangʼu nkongabhatooriri abhahiiri bhaane bhayo bhamokumi Kirisito.
4 Bhayo nibho Abhiisiraeri,
abhaato bhano Eryobha ryahwire bhabhe abhaana bhaache,
꞉ndëëbhëërëkiri obhokumi bhooche obhokoro na ꞉ndiiköriri amaraghano nabho.
Wiiki ꞉ndeebhaheere emeghiro gheeche,
haghirohamu na ghano ꞉reebharaghiri,
na ꞉ndëëbhëërëkëriiri kebhuno ekwëndëru korisëngëra.
5 Abhiisiraeri bhayo ꞉mbiibhwiru na bhasookoro bhaabho,
Abhurahamu,
na Isaka na Yakobho.
Gho kohetera omobhere,
koru Kirisito n‑Omwisiraeri.
Kirisito,
uno anyi Eryobha,
Omokoro o bhyose,
aghongibhu emiishe ghyose!
a Hawubhaabha.
6 Nteeghosiikëra kubha Eryobha ndekeyuru kohikeerani ghano ꞉riiraghiri kwo Abhiisiraeri.
Tiyaanyi,
gho kubha taanyi Abhiisiraeri bhoose bhano bhaahwiru ne Eryobha.
7 Taanyi kubha bhoose bhano ꞉bhiibhwiru na Abhurahamu n‑abhaana bhaache bha hëënë.
Amare Eryobha ꞉ndeemuraghiri Abhurahamu kubha,
“Kohetera kwo Isaka nokubhöna orwibhoro runo rokobherekeru ro roocho.”b
8 Ekebhune ke mangʼana ghayo n‑kubha,
abhaana bha Ryobha taanyi bhoose bhano ꞉bhiibhwiru na Abhurahamu,
amare n‑orwibhoro rooche runo rwibhwiru kurëngʼaana na kinya Eryobha ꞉riiraghiri.
9 Eryobha ndeere riraghiri kubha,
“Kwo riibhagha kinya rino,
mo‑mooka uno okuucha neghugharuka,
na Saara naakubha no omoona o ghesiite.”c
10 Wiiki taanyi riyo eryene,
amare Rebheka woose ꞉naamwibhoriire ebhisare Isaka,
sookoro wiito.
11 Amare,
ebhisare bhiyo hano bheere bhekeere kwibhoru,
na koru bhekeere ghuköra ghyokyose kibhe ghichömu hamu ekebhe,
Eryobha rëkëërëki amënda ghaache gha kwahura,
12 taanyi kurëngʼaana na amaköri gha mooto amare n‑kwo mënda ghaache eryene.
Niho rekamobhoorera Rebheka ighoro e bhaana bhayo rekabhugha,
“Omokoro naakubha aramuhökëri omonyi.”d
13 N‑kinya bhuno Amandëkö Amatööbhiyu ghakobhugha kubha,
“Yakobho nemwisheriiri,
amare Esaawu nemwangiri.”e
Eryobha ndehaaköra kinya bhuno rekwënda
14 Ibheere tobhughe bhu?
Tobhughe kubha Eryobha retaanyi ihëënë?
Tiyaanyi!
15 Eryobha eryene ꞉ndeemobhooriire Musa kubha,
“Eni nehaarigheri changori omooto uno nekwënda komorigheri changori,
na nehaamoghwera ebheghongi omooto uno nekwënda komoghwera ebheghongi.”f
16 Gho ghayo,
Eryobha eryene niryo reghotora korigheri omooto changori,
taanyi kebhuno omooto omwene akwënda hamu kinya aghuköra.
17 Mööhi,
mo‑Mandëkö Amatööbhiyu Eryobha rekamobhoorera Bharaawo rekabhugha,
“Neghotooriri ubhe omutëmi,
kubha nyëërëki abhaato obhotoro bhoone kohetera ghokoocho,
ne eriina reene riraghanibhu mo‑se yoose.”g
18 Gho ghayo,
Eryobha ndehaarigheri changori omooto wowoose uno rekwënda,
na komuköra omooto owonde abhe muköngʼu mo‑körö yaache.
19 Ibheere,
omooto naghotora akabhoori kubha,
“Aribha hangʼu keenyi,
ngwake Eryobha rehaatëma amasörö omooto wowoose?
Taanyi‑ho omooto koru umu uno ꞉atoriri kwanga kino Eryobha rekwënda!”
20 Amare iye omooto,
iye n‑niwe oghugharokerani hangʼu ne Eryobha?
Kana,
egheghiro ke riiröbhë ngeghotora komobhoori omobhombi kubha,
“Ngwake ombombiri hangʼu?”h
21 Taanyi kubha omobhombi o chanyongo naanyi no obhotoro bho kuhökëri eriiröbhë kinya bhuno akwënda?
Naghotora kobhomba chanyongo ibhere koru mo‑riiröbhë rimu,
na anyongo imu ibhe gho ghiri e mahöki gha sooko,
na ayende ibhe gho ghiri e mahöki gha chaasiko choose.
22 Eryobha ryose hangʼu reenyi.
꞉Ndyëëndiri kwërëki abhaato obhororo bhooche na köbhëërëki changuru cheeche,
amare ꞉ndeeghumeriiri chwee abhaato bhano ꞉bhaarëngʼaaniire ghosireekereru.
23 ꞉Ndiiköriri hangʼu,
kubha ribhönë kwërëki obhokumi bhooche obhokoro gho ghiri e bhaato bhano ꞉riisëëmiri bhasongʼaane changori cheeche.
꞉Ndiisëëmiri korwera kare kobharëëta ghokooche bhabhe nawe mo‑bhokumi bhooche obhokoro.
24 Mo‑bhaato bhayo nibho itu bhano rebherekiire.
Retabherekiire Abhayahuuti abheene,
amare koru abhaato bha matöngö.
25 Kiyo nikyo Eryobha rebhughiri mo‑ghitabhu ke murööti Hoseya kubha,
“Bhano bhataare abhaato bhaane,
nekobhabherekera ‘Abhaato bhaane.’
Abhaato bhano ntasiighiri,
nekobhabherekera ‘Abhasiighani bhaane.’ ”i
26 Wiiki ndebhughiri kubha,
“Hano bhabhooriiru kubha,
‘Inyu taanyi abhaato bhaane,’
hayo niho bhakobherekeru,
‘Abhaana bha Ryobha rino reenyi ihöru.’”j
27 Wiiki,
omurööti Isaaya nabhughiri ighoro e Abhiisiraeri kubha,
“Koru nangabha Abhiisiraeri m‑bhaaru
kinya omwishekeenya o mo‑nyancha,
amare bhano bhaghotooribhu,
m‑bharëngʼaaneru hangʼu.
28 Neekubha hangʼu gho kubha,
Omutëmi Waryobha taaghukëëchëra kobhaha
abhaato bha se yoose anchagho ino ehikeriine,
kinya bhuno reere rebhughiri.”k
29 N‑kinya bhuno omurööti Isaaya abhughiri hayo kare kubha,
“Nangabheere Omutëmi Waryobha
o bhakëëya bha Mwishaaro
atasaaghi chanyiibhoro indengʼaaneru kwo Abhiisiraeri,
ntongabheere tosirekeriire itu bhoose
kinya abhaato bha Sotoma na Ghomora.”l
Abhiisiraeri bhaaru taanyi abhahëënë ambërë e Ryobha
30 Mbe,
tobhughe ke ibheere ighoro e mangʼana ghayo?
Abhaato bha matöngö bhatiiköngʼiri ghutabhara kubhareru kubha no obhuhëënë ambërë e Ryobha,
amare Eryobha ndebhabhariire kubha mbaanyi no obhuhëënë gho nchëra e komokumi Kirisito.
31 Abhiisiraeri mbaare bhariiköngʼi ghughööta emeghiro ghe Musa kubha bhabhareru obhuhëënë ambërë e Ryobha,
amare bhataatoriri.
32 Ngwake bhatabhariiru kubha mbaanyi no obhuhëënë ambërë e Ryobha?
N‑gho kubha ꞉mbiitëngʼiire amaköri ghaabho na bhataamokumiri Kirisito.
Kirisito niwe eriibhohe rino ꞉bhiituurirituuriri,
33 kinya bhuno Eryobha ꞉reebhughiri mo‑Mandëkö Amatööbhiyu kubha,
“Mööhi,
netooriri eriibhohe Sayuuni.
m
Eriibhohe riyo niryo reghughëri abhaato bhariituuratuura,
na abhaato abhabhe bharagho.
Amare omooto wowoose uno akomokumi
uyo anyi eriibhohe riyo, taaghosookibhu!”n