Omoghya o Tesaronike ˆokabha na anyööri yaaru
17
Ibheere Bhawuro na Siira bhaaghaye bhakahetera mo‑moghya o Ambibhoori,
na Abhoroniya,
mbagha bhakahika mo‑moghya o Tesaronike.
Hayo Tesaronike ndeere‑ho erisinaghooghi re Bhayahuuti.
2 Bhawuro akabha arasöha mo‑risinaghooghi,
kinya ere asughara yaache.
Akabha arabhoorera abhaato koru mo‑Mandëkö Amatööbhiyu ighoro e Kirisito.
꞉Naaköriri hangʼu chaasiko choose che Riikane,
gho chawiiki ishato,
3 arabhëërëki kimu kimu kubha,
Kirisito ꞉nëëndiiru anyaakibhu na ghwitu,
aramara aryoke koru mo‑bhaku.
Bhawuro akabhabhoorera kubha,
“Kirisito uyo,
niwe Yesu uno nebharaghaniiri amangʼana ghaache.”
4 Amangʼana ghano Bhawuro abhughiri,
Abhayahuuti abhamu bhaghaghakumi,
haghirohamu na abhaato bhaaru bha matöngö bhano ꞉bhaare bhararesooka Eryobha.
Koru na abhakari bhaaru bha sooko,
bhoose bhaghakumi.
Bhayo bhoose bhaghaghöötana na Bhawuro na Siira.
5 Ghayo ghaghaghëri Abhayahuuti abhande bhaghaghöötu ne eriihari.
Gho ghayo bhaaghaye mo‑mutëëra,
kubha bhabharëëtë abhaato abhatiriighano,
bhaghiikomana erikinda,
bhaghasëëma ghuköra anyööri yaaru mo‑moghya uyo.
Bhaghasöha gho changuru mo‑ka e Yasooni,
bharabhatabhara Bhawuro na Siira,
kubha bhabharëëtë ambërë e bhaato.
6 Hano bhabhoriri,
bhakamwimoki Yasooni haghirohamu na Abhakirisito abhande.
Bhakabharëëta ambërë e bhakoro bha moghya,
bhaghaköra eriireghe bharabhugha,
“Abhaato bhano mbaköriri anyööri yaaru mo‑chaase chaaru,
ibheere hano bhaanyi mo‑moghya wiito.
7 Yasooni uno niwe abhaghënëhiri mo‑ka yaache.
Haghirohamu na ghayo,
bhano bhoose mbaangiri emeghiro ghino ghetooruru na Kayisaari,
gho kubha mbaghwighongi kubha mbaanyi no omutëmi waabho owonde,
ango niwe Yesu.”
8 Abhakoro bha moghya uyo haghirohamu na abhaato bhayo,
hano bhooghwire amangʼana ghayo,
ghakabhataki bhaghakarara chwee.
9 Yasooni na abhaghëndi bhaache bhayo bhaghatëmu anchagho,
bhakabhiisherereri kubha bhagharuke mo‑chaaka cheebho.
Bhawuro na Siira ˆbhaaghaye mo‑moghya o Bherooya
10 Hano bhwiriri,
Abhakirisito abhaghëndi bhaabho bhakabhakumeereri Bhawuro na Siira bhaghëndë mo‑moghya o Bherooya.
Hano bhahikiri iyo,
bhaghasöha mo‑risinaghooghi re Bhayahuuti.
11 Abhaato bha hayo Bherooya mbaare abhaato bhahöriicho chwee ghokera bha Tesaronike.
Hano Bhawuro abharaghaniiri angʼana e Ryobha,
bhakayiishereri kwo miigha chwee.
Bhaakabha bharaghiisuncha Amandëkö Amatööbhiyu chaasiko choose,
kubha bharighi aribha ghayo Bhawuro akobhugha n‑gha hëënë.
12 Abhayahuuti bhaaru ghate yaabho bhakamokumi Yesu,
haghirohamu na abhaato bhaaru bha matöngö aghande,
abhasubhe na abhakari bha sooko.
13 Mbe,
Abhayahuuti bha iyo Tesaronike,
hano bhamënyiri kubha Bhawuro nakweghi angʼana e Ryobha iyo Bherooya,
bhaaghaye iyo.
Bhaghaseeghereri erikinda re bhaato bhano ꞉bhaare hayo,
mbagha hakarwera anyööri yaaru.
14 Niho abhakumi bhaghëndi bhaache bhakamuhërëëkërëra Bhawuro,
aghi bhwango haghuhe na anyancha.
Amare Siira na Timotewo ibho bhaghasaagha hayo Bherooya.
15 Abhaato bhano bhamuhërëkëriire Bhawuro bhakamohira mbagha mo‑moghya o Atene.
Hano ꞉bhaare bharagharuka,
akabhatomani kubha bhabhabhoorere Timotewo na Siira kubha bhamtambane bhwango.
Bhawuro ˆaghasiikëra na abhaato bha moghya o Atene
16 Hano Bhawuro are arabhaghanya Siira na Timotewo hayo mo‑moghya o Atene,
akarighi omoghya uyo woose wichwire chasanaamu che misambu.
Eghaghëri omotema waache unyaake chwee.
17 Mbe,
aghasöha mo‑risinaghooghi akabha arabheeghi Abhayahuuti bhoose bhano ꞉bhaare‑mu,
haghirohamu na abhaato bha matöngö aghande bhano ꞉bhaare bhararesooka Eryobha,
akabha arabhabhoorera ighoro e Yesu.
Chaasiko choose akabha arabhoorani na abhaato bhano are arahunana nabho mo‑mutëëra ighoro e Ngʼana e Ryobha.
18 Niho abhaato abhamu bha sooko bha tiini e Kiyebhikuriyo,
a haghirohamu na bha tiini e Kisitoyikob bhaghasëëma kuhakaana na Bhawuro.
Abhamu ghate yaabho bhakabhugha,
“M‑mangʼana ke ghano omwikombikombi uno akwënda ghosiikëra?”
Abhande bhakabhugha,
“Nekwërëki kubha naghosiikërëra emisambu ghe se ayende.”
Kino ꞉ghiighëriri bhakabhugha hangʼu,
n‑gho kubha Bhawuro naare araraghani ighoro e Yesu,
na koryokibhu kwo bhaku.
19 Mbe,
bhakamwimoki bhakamohira Bhawuro ambërë e riibharacha eriikoro re moghya rino reere rerabherekeru Areyobhagho.
Abhaato bhayo bhakamobhoori bhakabhugha,
“Ameeghi ghayo amahë okweghi abhaato,
itu bhoose ntokwënda toghooghu.”
20 Iye noturëëtiire amangʼana amahë mo‑matu ghiito.
Mbe,
ntokwënda otobhoorere amangʼana ghayo egheteemoro keeche n‑ghento ke.
21 (Kino ꞉ghiighëriri bhabhughe hangʼu,
n‑kubha abhaato bha hayo Atene,
haghirohamu na abhaghëni bha kurë bhano ꞉bhaamanyiri hayo,
eriibhagha ryose mbaare bhasiighiri ghutëghëërëra amangʼana amahë,
na ghosiikëra ighoro yaache.)
22 Niho Bhawuro akiimeerera mo‑riibharacha riyo eriikoro re Areyobhagho,
akabhugha,
“Oo abhaato bha Atene!
Nekorighi kubha inyu mughöötiri atiini chwee.
23 Hano neere neraheta mo‑moghya uno,
꞉neerooche ebheghiro bhino moore morasëngëra.
Nekarighi koru ahaghiro ha koruuseri amaruusi hano haandëkiri amangʼana ghano,
‘kwo ryobha rino retamënyëkiine.’
Eryobha rino moore morasëngëra ino motaryeche,
niryo riyo eni nekobhamënyi inyu.
24 “Eryobha riyo niryo Omutëëmi o rishaaro na ase,
gho kubha niryo ꞉riitëëmiri ase,
na bhyose bhino bheenyi‑mu.
Retaakumanya mo‑masëngërö ghano ghabhëkuru kwo mabhökö gha bhaato.
25 Retaakwënda gheghiro ghyokyose,
ango abhaato bharikörërë.
Iryo niryo rekobhaha abhaato bhoose obhuhöru no omwika,
ne ebheghiro bhyose.
26 Kwo mooto umu,
nimu aruusiri amatöngö ghoose gha abhaato,
kubha bhamanye mo‑chaase choose.
Korwera hayo kare rekabhatoorera eriibhagha re kumanya,
na chambebhe che haghiro hano bhaakubha bhariikara.
27 Eryobha ꞉ndyëëndiri kubha abhaato bharitabhare,
nangabha gho nchëra e kubhabhaata bhabhaata,
mbagha bharerighi.
Koru hangʼu,
Eryobha retaanyi kurë no omooto wowoose wuure.
28 Kwo bhotoro bhooche nibho bhoghughëri itu toonyi hano,
ntoghughënda na kubha no obhuhöru bhwito.
Kinya omwandëki umu o myembo ghate yaanyu,
abhughiri,
‘Itu,
n‑abhaana bhaache toonyi.’
29 “Mbe,
gho kubha itu n‑abhaana bha Ryobha toonyi,
totiihëëbha kubha ndetuubhiine na chasanaamu chino chiköruru gho sahaabhu,
hamu chambiiri,
hamu gho chasanaamu chino chibhaachuru mo‑matare.
Ghayo ghoose ngaghuköru hangʼu kwo mangʼiini no obhukaari bho bhaato.
30 Hayo kare,
abhaato mbaare bharaköra ghayo kwo bhuraghaanu,
Eryobha ndeere reriiköri kinya retaaghogharighi,
amare ibheere,
ndekobhabhoorera abhaato bhoose bha ahaghiro hoose kubha bhatuukuune.
31 Gho ghayo,
natooriri orosiko runo akobhatenera ekiina abhaato bhoose kwo meghiro na kwo bhuhëënë,
gho nchëra e mooto uno ahwire.
꞉Naabhëërëkiri abhaato bhoose obhuhëënë bho mooto uno ahwire gho komoryoki koru mo‑bhaku.”
32 Mbe,
hano bhooghwire kubha Bhawuro naghosiikëra ighoro e koryoka kwo bhaku,
abhamu bhaghachëëra.
Amare abhande bhakamobhoorera,
“Ntokwënda ghoghutëghëërëra wiiki ighoro e ngʼana iyo.”
33 Mbe,
Bhawuro akahoroka anche e riibharacha riyo.
34 Abhaato abhamu bhakamokumi Yesu,
bhaghaghöötana na Bhawuro.
Ghate yaabho mbaare Tiyonisiyo,
umu o riibharacha re Areyobhagho,
no omukari umu,
eriina reeche Tamaari,
haghirohamu na abhaato abhande.