Amaköri gha Bhatomu 15

Ekiina mo‑riikanisa re Yerusareemu

Abhaato nyarebhe bhaakaru mo‑mukööwa o Yuteya, bhakahiringitera mo‑moghya o Antiyokiya. Bhaghasëëma kweghi Abhakirisito bharabhugha, “Aribha moraanga ghusaaru kurëngʼaana na chaasughara chino ꞉atotighiire, motaaghotora ghotooribhu.” 2 Amangʼana ghayo ghaghaghëri Bhawuro na Bharinaabha bhaghasëëma kuhakaana na abhaato bhayo chwee. Antenero, abhaato bha riikanisa re hayo Antiyokiya bhaghiishererani kubha, abhamu ghate yaabho bhaghi haghirohamu na Bhawuro na Bharinaabha, gho ghiri e ghusabha amëërëkërëri kwo bha Yesu na abhagharuka bha riikanisa ighoro e mangʼana ghayo. 3 Mbe, niho abhaato bhayo bha mo‑kanisa e Antiyokiya bhakabharagha. Ibheere Bhawuro na abhaghëndi bhayo bhakaheta mo‑mikööwa ghe Bhoyinike na Samaariya, bhaakabha bharabhabhoorera kinya abhaato bha matöngö bhamokumiri Yesu. Angʼana iyo ekabhategheri chwee Abhakirisito abhaghëndi bhaabho bhoose bha iyo.

4 Bhawuro na abhaghëndi bhaache hano bhahikiri Yerusareemu, bhaghaghënëhibhu bhoheene chwee na abhatomu bha Yesu, haghirohamu na abhagharuka bha riikanisa na abhaato abhande bha mo‑kanisa. Bhakabhabhoorera ghoose ghano Eryobha ꞉riiköriri gho kohetera ghokoobho. 5 Amare Abhakirisito abhamu bha rikinda re bhakiimeerera, bhakabhugha, “Koru abhaato bha matöngö bhoose mbakwëndëru bhabhe bharasaaru, na bhabhooreru kubha bhabhe bharasooka emeghiro ghyose ghe Musa.”

6 Mbe, abhatomu bhayo bha Yesu na abhagharuka bha mo‑kanisa bhaghaköra ekiina, gho ghiri bhayochoochani angʼana iyo. 7 Hano bhamariri eriibhagha irë bharahakaana, Bheetero akiimeerera, akabhabhoorera akabhugha, “Bhahiiri bhaane, mweche kubha hayo ekimbërë Eryobha ꞉ndeenyahwire ghate yaanyu, kobharaghaneri bhaato bha matöngö, kubha bhayooghu Angʼana Anchömu na koyekumi. 8 Eryobha niryo ryeche ghoose ghano ghaanyi mo‑metema ghe bhaato, ndyërëkiri kubha abhaato bha matöngö bhoose ndebhiisheriiri, gho kubha bhoose mbahaabhuru , bhuure bhuure kinya itu Abhayahuuti tuhaabhuru. 9 Mbe, Eryobha retaaköriri obhwahukani ghate yaabho na niitu, gho kubha bhoose n‑gho nchëra iyo iyo e komokumi Yesu niyo yeeriri emetema gheebho. 10 Mbe, ngwake moghusaki Eryobha gho kobhaghëghi Abhakirisito bhayo omorigho uno, na niitu abheene noghotutama? Koru na bhasookoro bhiito bhoose, ꞉noobhatamiri! 11 Itu ntoghokumi kubha, ntoghotooribhu gho ghareeya e Mutëmi wiito Yesu, kinya ibho bhoose bhaghotooribhu nayo.”

12 Mbe, abhaato bhoose bhano ꞉bhaare mo‑riibharacha riyo bhaghakira kiri. Bharinaabha na Bhawuro bhaakabha bharabhabhoorera kinya Eryobha ꞉riiköriri ebhyërëkërëri ne ebhiraghe bhyaru gho kohetera ghokoobho mo‑bhaato bhayo. 13 Hano bhamariri ghosiikëra, Yakobho woose akabhabhoorera akabhugha, “Inyu bhahiiri bhaane, muntëghëërërë! 14 Bheetero namariri ghotobhoorera kinya Eryobha ꞉riinyaakiire abhaato bha matöngö, kubha ryahure ghate yaabho bhabhe abhaato bhaache. 15 Amangʼana ghano ngarëngʼiine na ghano ꞉ghaandëkuru mo‑bhitabhu bhe bharööti kubha,

16 ‘Omutëmi Waryobha ꞉naabhughiri kubha,

Amangʼana ghayo gharamara koheta,

neghugharuka, nekwabhëka obhutëmi bho Tawuti,

bhuno ꞉bhuuhaanyokiri.

Nangabha obhutëmi bhooche bhuyo bhochireriiru,

nekobhwabhëka bhuhë,

17 niho abhaato bha matöngö bhoose mbaghuntabhara,

bhaare nebhabherekiire kubha bhabhe abhaato bhaane.

Amangʼana ghayo, eni neghoghaköra,

18 wiiki nigho ghayo ghayo ꞉ghaamënyuru korwera kare.’”

19 Yakobho akabhugha, “Gho ghayo, eni nekorighi kubha, totaakurëngʼaanera kobhanyaaki abhaato bha matöngö bhano ꞉bhiigharoriire Eryobha. 20 Ntokwëndëru tobhaandëkërë anyaarubha e kobhabhoorera kubha, bhatarë ebhiinyakurë bhino bhiköruru kubha bheghonchu gho kuhëërana chasanaamu, bhataköra obhutaari, na bhatarë chaanyama che chatyenyi chino chinyëëturu, wiiki bhatarë amasaahë. 21 Korwera kare, mbaare bhareeghi emeghiro ghe Musa mo‑meghya ghyose, na ꞉ngiisömuru mo‑ gha Bhayahuuti mo‑chaasiko choose che .”

Abhaato bha matöngö ˆbhaghatomeru anyaarubha

22 Niho abhatomu bha Yesu na abhagharuka bhayo bha riikanisa, haghirohamu na Abhakirisito abhande bha hayo Yerusareemu, bhaghiishererani haghirohamu kubha, bhaahure ghate yaabho abhaato bhano bhaaghuye haghirohamu na Bhawuro na Bharinaabha mo‑moghya o Antiyokiya. Mbe, bhakaahura abhakangati bhabhere, umu Yuuta (uno akobherekeru Bharisaabha), na owonde Siira. 23 Bhakabhatoma na anyaarubha ino ekobhugha kubha,

“Itu abhatomu haghirohamu na abhagharuka bha riikanisa, itu Abhakirisito bhaghëndi bhaanyu, ntokobhakëëri inyu abhaato bha matöngö bhano moonyi mo‑moghya o Antiyokiya, na mo‑mikööwa ghe Siiriya na Kirikiya. 24 Ntooghwire kubha abhaato abhamu koru bhowiito mbabhabhooriire amangʼana gha kobhanyaaki, mbagha bhaghaghëri emetema gheenyu gheekabha na ahaho. Amare bhayo bhaköriri ghayo, taanyi itu ꞉toobhatomiri. 25 Ibheere kurëngʼaana na ghayo, ntwishereriini tookaahura abhaato tobhatome iyo bhowaanyu. Abhaato bhayo mbakuucha haghirohamu na abhasiighani bhiito Bharinaabha na Bhawuro, 26 bhano bhiiruusiri chwee komuhökëri Omutëmi wiito Yesu , koru ꞉mbiisheriiri konungu emitu gho ghiri yaache.

27 “Abhaato bhano totomiri ghokoonyu, n‑Yuuta na Siira. Ibho nibho bhakobhabhoorera amangʼana ghano tobhaandëkiire. 28 Mbe, Akörö Ahörëëru na niitu ntorooche kubha, totabhaghëghi emerigho eghende, ghabhe n‑amangʼana ghano agheene. 29 Motarë ebhiinyakurë bhino bhiköruru kubha bheghonchu gho kuhëërana chasanaamu, na motarë amasaahë koru chaanyama che chatyenyi chino chinyëëturu, na motabha moraköra ubhutaari. Aribha mookubha moriisacha ghayo, niho mookubha muköriri bhoheene ambërë e Ryobha. Masaraamu.”

30 Hano bhamariri kobharagha bhaghataana, bhano bhatomuru bhakahiringitera iyo Antiyokiya. Bhakabhakoma Abhakirisito bhoose, bhakabhaha anyaarubha iyo. 31 Abhakirisito bhayo hano bhayisömiri anyaarubha iyo, ekabhatoora omukörö na bhaghachömëru chwee. 32 Yuuta na Siira bhombe m‑bharööti ꞉bhaare, gho ghayo, bhakabhabhoorera Abhakirisito bhayo amangʼana maaru gha kobhatoora omukörö, mbagha bhaghaköngʼëri. 33 Bhaache ghwikara iyo kwo riibhagha, Abhakirisito bhayo bhakabhiisherereri kubha bhagharuke mo‑bhaato bhano ꞉bhaare bhabhatomiri kwo murëmbë. 34 [Amare Siira iwe akarighi kubha n‑kumangi asaaghe iyo iyo.] 35 Bhawuro na Bharinaabha bhoose bhaghasaagha iyo Antiyokiya. Ibho haghirohamu na abhaato abhande bhaaru, bhaakabha bhararaghani Angʼana e Mutëmi mo‑bhaato, na kobheeghi angʼana iyo.

Bhawuro na Bharinaabha ˆbhaghataana

36 Chaasiko insuuhu chiiche koheta, Bhawuro akamobhoorera Bharinaabha akabhugha, “Ntugharuke mo‑meghya ghiire tweghiri Angʼana e Mutëmi, kubha tobhataarere na korighi kinya bhakwëndërëra abhahiiri bhiito bhayo.” 37 Mo‑rughëndö ruyo, Bharinaabha naare arëënda bhahinane haghirohamu na Yohana uno akobherekeru Maariko. 38 Amare Bhawuro akarighi kubha taanyi kumangi bhahinane nawe, gho kubha naare abhatighiri mo‑mukööwa o Bhambiriya, akaanga kuhöki emeremo haghirohamu nabho.

39 Mbe, ghayo ghaghaghëri bhahakaane chwee, kerende bhaghataana. Bharinaabha akamwimoki Maariko, bhaaghaye haghirohamu mo‑bhwato mbagha bhakahika mo‑gheghinga ghe Kiibhuro. 40 Bhawuro nawe akamwimoki Siira. Hano Abhakirisito bhaghëndi bhaabho bhamariri kobhatoora mo‑mabhökö gha Mutëmi, bhaghatanura. 41 Bhakaheta mo‑mikööwa ghe Siiriya, na Kirikiya, bhaakabha bharaköngʼi abhaato bha makanisa gha iyo.