Bhawuro na Bharinaabha mo‑moghya o Ikoniyo
14
Hano Bhawuro na Bharinaabha ꞉bhaare mo‑moghya o Ikoniyo,
bhaghasöha mo‑risinaghooghi re Bhayahuuti,
kinya bhuure ꞉bhaare bhanariri.
Bhakeeghi‑mu abhaato ighoro e Yesu kwo bhotoro bhokoro,
koru Abhayahuuti bhaaru haghirohamu na abhaato abhande bhaaru bha matöngö bhakamokumi Yesu.
2 Amare Abhayahuuti abhamu bhataakumiri,
bhaghasëëma kobhaseeghereri abhaato bha matöngö,
kubha bhabhareghe abhaato bhano bhakumiri.
3 Bhawuro na Bharinaabha ꞉mbiikeere chaasiko chaaru hayo Ikoniyo,
bhaakabha bharabhabhoorera abhaato kwo bhosubhesubhe ighoro e Mutëmi,
na aghareeya yaache.
Omutëmi nawe aghaghahikeerani amangʼana ghaabho kwo bhuhëënë,
gho kobhaha obhotoro bho ghuköra ebhyërëkërëri ne ebhiraghe bhyaru.
4 Amare abhaato bha moghya uyo bhakaahukana amakinda abhere.
Abhamu bhaghiishererani na Abhayahuuti,
na abhande bhaakabha eribhaara re bhatomu.
5 Antenero,
Abhayahuuti abhamu na abhaato bha matöngö,
koru na abhakangati bhaabho,
bhaghaköra ekiina kubha bhabhakörërë amabhe Bhawuro na Bharinaabha na kobharasa amabhohe.
6 Ibheere abhatomu bhayo bhaache kumënya amangʼana ghayo,
bhakangʼösëra mo‑meghya ghe Risitura na Teeribhe,
mo‑se e Rikawoniya,
na mo‑meghya eghende ghe iyo.
7 Bhaakabha bhareeghi abhaato Angʼana Anchömu.
Bhawuro na Bharinaabha mo‑moghya o Risitura
8 Mbe,
mo‑moghya o Risitura naare‑ho omooto umu mubhëëru,
taare aratora ghughënda korwera kwibhoru kooche.
9 Hano Bhawuro are araraghani angʼana e Ryobha,
omooto uyo naare ikeere hayo aramutëghëërëra.
Bhawuro akamoomeri amiisho,
akamorighi kubha naanyi no obhokumi bho kuhöru.
10 Bhawuro akamobhoorera kwo riiraka ikoro akabhugha,
“Bhooka!
Wimeerere kwo maghoro ghaacho.”
Hayo hayo omooto uyo akiimeerera bhwango,
aghasëëma ghughënda omwene!
11 Hano obhoyo bho bhaato bharooche kinya Bhawuro amuhöriri omooto uyo,
bhaghasëëma ghuköra eriireghe mo‑ghighambo keebho ghe Kirikawoniya bharabhugha,
“Emisambu ˆgheghatwikera gheenyi ne emebhere kinya abhaato!”
12 Bhakamuha Bharinaabha eriina re musambu waabho omokoro Sewu.
Bhawuro,
bhakamuha eriina re musambu waabho owonde Heerime,
a gho kubha Bhawuro niwe are omosiikëri.
13 Haghuhe no omoghya uyo ꞉haare ne Erisëngërö re Sewu.
Omuchaama waache akarëëta chasatiima na chahuuru che bhibhari ambërë e ekehita ke moghya uyo,
gho kubha iwe haghirohamu ne erikinda riyo mbaare bharëënda kobhasinchera Bhawuro na Bharinaabha chasatiima chiyo bhabhahëërane.
14 Hano abhatomu bhayo,
Bharinaabha na Bhawuro bhooghwire ghayo,
bhaghatandura amaghööti ghaabho.
b Bhaaghaye bharahe mo‑rikinda rino reere hayo,
bhakabhabhoorera kwo riiraka ikoro bharabhugha,
15 “Abhahiiri bhiito!
Ngwake moghuköra amangʼana ghano?
Itu n‑abhaato hangʼu toonyi kinya inyu!
Ntwichiri hano kobheeghi Angʼana Anchömu,
kobhabhoorera kubha motighe ghusëngëra chasanaamu chiyo,
musëëmë kubha abhaato bha Ryobha rino reenyi ihöru!
Rino ꞉riitëëmiri erishaaro,
na ase,
na anyancha,
na bhyose bhino bheenyi mwishaaro,
na mo‑se,
na mo‑nyancha.
16 Hayo ekeenyuma Eryobha ꞉ndeebhatighiri abhaato bha matöngö bhamanye kinya bhuure ꞉bhaare bharëënda.
17 Koru hangʼu,
retatighiri köbhëërëki inyu kubha niho reenyi.
Ndeere rerabhakörëra amachömu gho kobhatëëkëra ambura koru mwishaaro,
kubha mubhönë omunöghö kwo riibhagha reeche mwighote.
Koru ne emetema gheenyu,
akabha araghiichori oghuchömëru.”
18 Hano bhamariri ghosiikëra ghayo,
Bhawuro na Bharinaabha ꞉mbaatoriri korihööchërëra erikinda riyo re bhaato bhatabhahëërana,
nangabha ere kwo nyaako.
19 Bhakamara bhakaacha Abhayahuuti abhande koru mo‑meghya ghe Antiyokiya,
na Ikoniyo.
Bhakaretebhitebhi erikinda riyo re bhaato bhaghaghöötana nabho bhaghasëëma komurasa Bhawuro na amabhohe.
Bhakamara bhakamongʼuura mbagha anche e moghya bhariituuri kubha nakuure.
20 Abhaato bhano ꞉bhaare bhakumiri bhaghiikomana na komwinaareri,
akaacha ighoro aghasisimoka,
aghagharuka mo‑moghya.
Atabhoori yaache,
akaru hayo,
aghaye haghirohamu na Bharinaabha mo‑moghya o Teeribhe.
Bhawuro na Bharinaabha ˆbhaghagharuka mo‑moghya o Antiyokiya
21 Hano Bhawuro na Bharinaabha ꞉bhaare mo‑moghya o Teeribhe,
bhakabheeghi abhaato Angʼana Anchömu,
bhakabhöna abhakumi bhaaru.
Bhakamara bhaghaköra orughëndö ghugharuka mo‑moghya o Antiyokiya e Bhisitiya gho kohetera mo‑meghya ghe Risitura na Ikoniyo.
22 Haghiro hoose hano bhaghiire ꞉mbaabhatooriri omukörö abhaghëndi bha Yesu,
bhakabhabhoorera bhëëndërërë ghokumi amangʼana gha bhuhëënë ghano bheeghuru.
Bhakabhatongera bharabhugha,
“Ntokwëndëru ghusöha mo‑bhutëmi bho Ryobha gho kohetera anyaako yaaru.”
23 Bhawuro na Bharinaabha bhakaahura abhagharuka bha mo‑makanisa ghoose.
Bhakamara bhakabhatoora mo‑mabhökö gha Mutëmi uno ꞉bhaare bharamokumi gho kobhasabhera na kwiyima ebhiinyakurë.
24 Akamara Bhawuro na Bharinaabha bhakahetera mo‑mukööwa o Bhisitiya,
bhaghasöha mo‑mukööwa o Bhambiriya,
25 bhakahika mo‑moghya o Bhereghi.
Iyo bhakaraghani angʼana e Ryobha,
bhakamara,
bhakahiringitera mo‑moghya o Ataariya.
26 Koru hayo bhaghasëëma orughëndö ro mo‑nyancha ne eryato,
bhaghagharuka mo‑moghya o Antiyokiya mo‑mukööwa o Siiriya.
Hayo niho ꞉bhaare bhasabhiiru na abhakumi abhande aghareeya e Ryobha gho ghiri e meremo ghino ꞉bhaare bhamariri kohikeerani.
27 Hano bhahikiri Antiyokiya,
bhakabhakoma abhaato bha mo‑kanisa.
Bhakabhabhoorera ghoose ghano Eryobha riköriri gho kohetera ghokoobho,
na kinya bhuure rebhaheere abhaato bha matöngö omweya o komokumi Yesu.
28 Bhaghiikara haghirohamu na abhakumi bhayo hayo Antiyokiya kwo riibhagha irë.