Anyaarubha e kabhere e Bhawuro gho
Timotewo
Obhukangati
Anyaarubha ino ꞉yaandëkuru na Bhawuro omotomu o Yesu Kirisito (1:1). ꞉Naamwandëkiire Timotewo uno are omotoorereri waache o haghuhe (1:2–5, 2:1). Bhawuro ꞉naandëkiri anyaarubha ino hano are mwighërëcha iyo Ruumi (1:16–17). ꞉Naabhöhuru eriibhagha re bhukangati bho mutëmi Neero. Eriibhagha riyo, Abhakirisito mbaare bharanyaakibhu chwee gho ghiri e bhokumi bhoobho. Bhawuro naare ariituuri kubha taaghughëgha eriibhagha irë akeere ghwitu (4:6–8). Eriibhagha riyo, Timotewo naare mo‑moghya o Ebheeso, uno ore mo‑se e Asiya (1:18, 4:12–13, 4:19). Nekorighibhu kubha anyaarubha ino ꞉yaandëkuru mo‑meeka ghe 64–67 korwera hano Yesu Kirisito ibhoriiru.
Ekebhune ghe kwandëka anyaarubha ino, n‑komuköngʼi Timotewo kubha abhe isëëmiri kuraghani Angʼana Anchömu ighoro e Yesu, iköngʼi na ghoghumereri mo‑maköngʼu ghoose (1:6–8, 2:3–10, 2:24, 4:2–5). Bhawuro ꞉naamuragheriiri Timotewo kubha, abhabhoorere Abhakirisito bha iyo Ebheeso bhabhe na atëëmö inchömu. Bhatambane bhoheene ameeghi ghano bheeghiri (2:14). Wiiki, akamobhoorera Timotewo kubha, ange gho changuru choose ameeghi gha bhuröngö, eghi gha hëënë (1:13, 4:2–5). Bhawuro naare ariighomba chwee komorighi Timotewo (1:3–4, 4:9, 21).