4
ˆNeghakuraghereri ghano ambërë e Ryobha na ambërë e Kirisito Yesu, uno aghotenera ekiina abhaato abhahöru na bhano bhakuure. Kirisito Yesu niwe akuucha ghukangata ase ino anyi Omutëmi. 2 Ibheere, ubhe oraraghani Angʼana Anchömu e Ryobha. Ubhe wiisëëmiri ghuköra hangʼu eriibhagha ryoryose, kwo riibhagha rino rirëngʼaaniire na rino retarëngʼaaniire. Ubhe oratöngëra, no orahiinya no orabhaköngʼi abhaato. Ukörë hangʼu, ino oreeghi kwo bhoghumereri bhoose.3 ˆNeghakobhoorera hangʼu, gho kubha ndekuucha eriibhagha rino abhaato bhataakubha bharatëghëërëra ameeghi gha bhuhëënë. Mbakwënda ghutambana amiigha ghaabho abheene, na gho ghayo mbakwiyaahurera abheeghi bhaaru gho kubha mbasiighiri ghutëghëërëra amangʼana aghande ghande amahë. 4 Mbaghotigha ghutëghëërëra obhuhëënë, na mbaghutambana amaghano gha kare ghano ghataanyi no obhwëra bhobhoose. 5 Amare iye, ubhe miisho mo‑mangʼana ghoose. Oghumereri anyaako, ukörë emeremo ghe kuraghani Angʼana Anchömu, ukörë bhoheene mo‑bhutamishi bhoocho bhoose.
6 ˆNeghakobhoorera ghayo, gho kubha eni, eriibhagha reene re ghoku ˆreghatingʼi. Amasaahë ghaane ngaanyi haghuhe koruusibhu kinya amaruusi mo‑haghiro ha koruuseri amaruusi.a 7 Nirööniri eriihë inchömu re bhokumi, nimariri orughëndö roose, na nechongiri obhuhëënë bho bhokumi bhwito. 8 Ibheere neghughanya okwene kuhaabhu atuho e bhuhëënë. Omutëmi Yesu, omoteni o kiina uno anyi obhuhëënë, nakuuha atuho orosiko ruure ro ghugharuka kooche. Atuho iyo nteekuhaabhu eni mwene, amare na abhande bhoose bhano bhaghwitëngʼëra kwo miigha ghugharuka kooche.
Amasabhi gha Bhawuro gho Timotewo
9 Timotewo, wiköngʼi kuucha ghokoone bhwango, 10 gho kubha Tema nantighiri. Iwe nasiighiri amangʼana gha se ino, naghiire mo‑moghya o Tesaronike. Kiresike iwe naghiire korihökëri Eryobha mo‑mukööwa o Gharatiya, na Tiito woose naghiire mo‑mukööwa o Tarimatiya. 11 Ruuka omwene chiri niwe asaaghiri haghirohamu na neeni hano. Ibheere, oraacha ino, uche na Maariko, gho kubha narëngʼaaniire kubha omotoorereri waane mo‑meremo ghe Ryobha. 12 ꞉Neemotomiri Tikiko ghuye mo‑moghya o Ebheeso. 13 Oraacha, uche ne erighööti reene rino ꞉neetighiri o‑Kaaribho mo‑moghya o Torowa, haghirohamu na ebhitabhu bheene, ahanene bhiire bhe mashëërö.
14 Arekisanta, omoturi o bhyoma, ꞉naanköriire amangʼana amabhe chwee. Omutëmi Yesu nakomotenera ekiina kurëngʼaana na amaköri ghaache. 15 Na niiye woose wikabhaahe nawe, gho kubha naare araanga chwee ameeghi ghiito.
16 Hano neere ndiitachura mwibharacha e kimbërë, taare‑ho koru umu uno ꞉imeeriire eribhaara reene, bhoose bhaghantigha. Neghusabha Eryobha retighe kobhabharera eriisari riyo. 17 Amare Omutëmi Yesu naare haghirohamu na neeni. ꞉Naaheere changuru che kuraghani Angʼana Anchömu kwo bhohikeeranu, kubha abhaato bhoose bha matöngö bhayooghu. ꞉Naantooriri mo‑tabhaaribhaari e roko, gho kubha neere kinya uno anyi mo‑monu o ka. 18 Nyeeche kubha nakwëndërëra ghontoori mo‑mabhe ghoose na ghonchonga, mbagha ahiki mo‑bhutëmi bhooche bho Mwishaaro. Omutëmi Yesu aghongibhu emiishe ne emiishe. Hawubhaabha.
Amangʼana gha kuragha
19 Omukëëri Akiira no omukari waache Bhirisira, na bhano bhaanyi mo‑nyumba e Onesibhooro. 20 Eraasito ꞉naasaaghiri mo‑moghya o Korinto. Torobhiimo ꞉neemotighiri mo‑moghya o Mireeto, gho kubha m‑mubhabharu are. 21 Ibheere, ukörë bhwango uche ino eriibhagha re nyighita rekeere kohika. Ewubhuro, na Bhute, na Riino, na Kirawutiya, haghirohamu na abhakumi abhande bhoose, mbaghoghukëëri.
22 Omutëmi Yesu abhe haghirohamu na niiye. Aghareeya yaache ibhe haghirohamu na niinyu bhoose.