Anyaarubha e kabhere e Bhawuro gho
Timotewo
Amakëërani gha Bhawuro gho Timotewo
1
Anyaarubha ino neyandëkiri eni Bhawuro.
Eni netomuru kwo mënda gha Ryobha kubha omotomu o Kirisito Yesu,
kubha niraghani angʼana e bhuhöru.
Eryobha ꞉ndiiraghiri kubha,
obhuhöru bhuyo mbokubhönëka gho komokumi Kirisito Yesu.
2 ˆNeghakwandëkëra iye Timotewo,
omoona waane omosiighani.
Neghokwëndëra aghareeya ne ebheghongi no omurëmbë koru kwo Waryobha Taata na gho Kirisito Yesu,
Omutëmi wiito,
ghibhe haghirohamu na niiye.
Bhawuro ˆakariitabheri Eryobha na komuköngʼi Timotewo
3 Nekoriitabheri Eryobha gho ghiri yaacho eriibhagha neghokohiita mo‑masabhi ghaane obhotiko no omwishe,
na nekorihökëri kwo mënda meero,
kinya bhasookoro bhaane ꞉bhaarihökiiri.
4 Nekohiita changishori cheecho eriibhagha rino turaghiine.
Neghwighomba chwee korighani na niiye wiiki,
kubha nibhe no oghuchömëru kwaru.
5 Wiiki,
nekohiita obhokumi bhoocho bho hëënë.
Obhokumi bhuyo,
naare nabho nyaghokoro Rooyisi na nyako Ewunike.
Neenyi no obhuhëënë kubha iye woose noonyi nabho.
6 Gho ghiri iyo,
neghokohiiti kubha,
wiköngʼi kuhökëri ekihaano kino Eryobha ꞉reekoheere hano neghotooriire amabhökö.a
7 Köra hangʼu,
gho kubha Akörö ino Eryobha retoheere teenyi e bhotiini,
amare neghotuha changuru,
no obhosiighi ne ekirëngërë.
8 Mbe,
otarighi chaasoni ghughambera angʼana ighoro e Mutëmi wiito Yesu Kirisito,
hamu korighi chaasoni gho kubha eni neenyi mo‑kibhöhö gho ghiri yaache.
Amare,
oghumereri mo‑nyaako haghirohamu na neeni,
gho ghiri e Ngʼana Anchömu,
kurëngʼaana na changuru chino okuhaabhu ne Eryobha.
9 Iryo ꞉ndeetotooriri,
reghatobherekera tubhe abhaana bhaache abhatööbhiyu.
Retaaköriri hangʼu gho ghiri e maköri ghiito,
amare ꞉ndiiköriri gho ghiri e miigha ghaache na aghareeya yaache.
꞉Ndeetoheere aghareeya iyo gho nchëra e Kirisito Yesu,
koru ase ino ekeere ghutëëmu.
10 Amare ibheere,
ndyërëkiri aghareeya yaache ghokwito,
gho kuucha gho Kirisito Yesu Omotoori wiito.
Iwe nakindiri changuru che roko,
na nëërëkiri obhuhöru bho miishe ghyose gho nchëra e Ngʼana Anchömu.
11 Gho ghiri e Ngʼana Anchömu iyo,
nyahwiru kubha omuraghani,
no omotomu no omweghi.
12 Kiyo nikyo gheghughëri nerabhöna anyaako ino.
Amare nteekorighi chaasoni,
gho kubha nemweche uno neghokumi.
Wiiki neenyi no obhuhëënë kubha,
iwe naanyi no obhotoro bho ghochonga bhoheene angʼana e bhuhëënë ino aheereb mbagha orosiko ruure ro ghugharuka kooche.
13 Ughöötë bhoheene ameeghi gha bhuhëënë ghano ꞉neekweghiri.
Ogheeghi ghayo na usaaghe no obhokumi no obhosiighi bhuno bhokubhönëka gho komokumi Kirisito Yesu.
14 Angʼana e bhuhëënë ino uhaabhuru na Yesu,
oyighöötërërë gho changuru che Körö Ahörëëru ino enyi moose yiito.
15 Iye weeche kubha,
abhaato bhoose bha mo‑mukööwa o Asiya mbantighiri.
Ghate yaabho mbaanyi‑mu Bhighero na Herimoghene.
16 Neghusabha Omutëmi Yesu abharigheri changori abhaato bha mo‑ka e Onesibhooro,
gho kubha mara kaaru naare arasambaaroki omukörö waane.
Wiiki,
tarooche chaasoni kuucha kondighi mo‑kibhöhö keene.
17 Hano ichiri mo‑moghya o Ruumi,
꞉niiköngʼiri ghuntabhara mbagha akamböna.
18 Na niiye weeche bhoheene,
amangʼana maaru ghano anköriire mo‑moghya o Ebheeso.
Omutëmi Yesu amusabhere Onesibhooro ebheghongi kwo Mutëmi Waryobha orosiko ro ghoteneru ekiina.c