Obhoghumereri mo‑meremo ghe Ryobha
2
Ibheere iye omoona waane,
ubhe na changuru gho nchëra e ghareeya ino tuhaabhuru gho komokumi Kirisito Yesu.
2 Nooghwire ameeghi ghano ꞉nyeeghiri ambërë e bhiibhateri bhaaru.
Ibheere iye obhahë abhaato abhahëënë,
bhano bhaghotora kweghi abhande.
3 Oghumereri mo‑nyaako haghirohamu na neeni,
kinya omoshirikare omuhöriicho o Kirisito Yesu.
4 Taanyi‑ho omoshirikare omuhöriicho uno aghotigha kuhöki emeremo ghe bhoshirikare,
asöhë mo‑meremo ghino ghetaanyi ghe bhoshirikare.
Taaghwisöhi mo‑ghiyo,
gho kubha nakwënda ghuchömëri omokoro waache.
5 Koru omooto uno aghokinda mo‑riibhina,
taaghotora kuhaabhu atuho e bhokindi,
araanga ghotereera amëërëkërëri gha riibhina.
6 Wiiki,
omoremi uno aghwiköngʼi mwirema,
uyo nakurëngʼaanera kubhöna omunöghö o mumbërë.
7 Timotewo,
wiituuri chwee ighoro e mangʼana ghano ˆneghakobhoorera.
Omutëmi Waryobha naghokuha obhotoro bho ghoghamënya ghoose.
8 Omohiite Yesu Kirisito o mo‑rwibhoro ro mutëmi Tawuti,
a uno Eryobha ꞉reemoryokiri koru mo‑bhaku.
Iyo niyo Angʼana Anchömu ino nekuraghani.
9 Gho ghiri e ngʼana iyo,
eni nekunyaaka na nibhöhuru ne eminyörörö kinya omuköri o mabhe.
Amare angʼana e Ryobha teeghotora kubhöhu.
10 Gho ghayo,
neghoghumereri ghoose gho ghiri e bhaato bhano bhaahwiru ne Eryobha bhabhe abhaato bhaache.
Neghuköra hangʼu,
kubha bhoose bhasongʼaane obhotoori kohetera Kirisito Yesu,
na ghusanga obhokumi bhooche obhokoro bho emiishe ghyose.
11 Angʼana ino n‑e hëënë,
kubha,
“Aribha tokuure haghirohamu na Kirisito,
ntookubha abhahöru haghirohamu nawe.
12 Aribha toghoghumereri,
ntoghutëmi haghirohamu nawe.
Aribha toramwanga,
woose naghotwanga.
13 Nangabha itu totaanyi abhahëënë ghokooche,
iwe naghusaagha kubha omuhëënë,
gho kubha iwe taaghotora kwiyanga omwene.”
Amëërëkërëri kwo mutamishi omuhöriicho o Ryobha
14 Obhahiiti abhakumi amangʼana ghayo,
na kobhashaangʼi ambërë e Ryobha,
bhatighe kuhakaana ighoro e mangʼana amasuuhusuuhu.
Okuhakaana kuyo ghotaanyi no obhwëra,
amare ngoghusari bhano bhakobhatëghëërëra.
15 Wiköngʼi kweghi angʼana e hëënë,
kinya bhuno ekwëndëru kwo Ryobha.
Hayo nookubha omuhöki o meremo uno ataanyi na chaasoni gho ghiri e meremo gheeche.
Ghuköra hangʼu niko Eryobha reghwishereri.
16 Otighe ghosiikëra amangʼana ghano ghataanyi no obhwëra,
na ghano ghataakwëndëru ne Eryobha,
gho kubha bhano bhakweghi ghayo,
mbaghughëri abhaato bhabhe kurë chwee ne Eryobha.
17 Wiiki ameeghi ghaabho ngakorumeeri abhande kinya erighaati re gheseese rino reekurë omobhere.
Ghate yaabho mbaanyi‑mu Himenaayo na Bhireeto.
18 Bhayo mbabhoriri chwee,
mbatighiri obhuhëënë gho kobhugha kubha koryoka kwo bhaku nkumariri kubha‑ho.
Gho kweghi hangʼu,
mbakorumeeri obhokumi bho bhaato abhande.
19 Amare abhaato bhano bhiimeeriire bhaköngʼiiri,
n‑kinya obhoroso obhuchömu bhuno bhotooruru ne Eryobha.
Ni ighoro e obhoroso bhuyo ꞉ngaandëkuru amangʼana ghano kubha,
“Omutëmi Waryobha neeche abhaato bhaache,”
b
wiiki,
“Omooto wowoose uno ahaamusabha
Omutëmi Waryobha kubha amotoori,
atighe ghuköra amabhe.”
20 Mo‑nyumba ankoro mbeenyi‑mu ebheghiro bhe manga maaru,
mbeenyi‑mu bhe bhikörë bhe sahaabhu na bhe chambiiri,
na mbeenyi‑mu bhe riiröbhë na bhe mete.
Ebhende m‑bhe sooko,
ne ebhende bhetaanyi na sooko.
21 Ibheere,
omooto ariiyeri gho ghotigha obhobhe bhuyo bhoose,
naakubha kinya egheghiro ghe sooko kino kyahwiru.
Naakubha arëngʼaaniire mo‑Mutëmi waache,
naakubha isëëmiri mo‑meremo ghyose emichömu.
22 Ungʼösë amiigha gha bhobhureni,
wiköngʼi ghutambana ghano Eryobha rekwënda,
ubhe no obhokumi,
no obhosiighi no omurëmbë.
Ughöötërërë ghayo,
haghirohamu na bhoose bhano bhakomusabha Omutëmi kwo mukörö mwero.
23 Otighe erihakaana re ghighëëghë rino retaanyi no obhwëra,
gho kubha weeche erihakaana,
ndehaarëëta eriihë.
24 Wiiki,
teekwëndëru omutamishi o Mutëmi kubha omurööni.
Amare abhe moghumereri,
no omuhörëëru mo‑bhaato bhoose,
no omooto uno eche kweghi.
25 Nakwëndëru abhe arabhakaariha abhaato bhano bhakuhakaana nawe kwo bhuhörëëru,
kubha hande abhe hamu,
Eryobha rebhahë ghotuukuuna na gho ghayo,
bhamënyë obhuhëënë.
26 Niho,
bhaghotora wiiki kubhöna amangʼiini,
bhatooribhu koru mo‑muhëtö o Rishambu.
Iryo ndebhaghöötiri,
kubha bhabhe bharaköra amënda ghaache.