Amëërëkërëri ighoro e bhasësë
6
Abhasësë bhoose abhakumi,
bhabhasooke abhantomonkoro bhaabho,
kubha eriina re Ryobha na ameeghi ghiito ghatataraahu.
2 Aribha mbaanyi‑ho abhasësë bhano abhantomonkoro bhaabho n‑abhakumi abhaghëndi bhaabho,
iyo etabha eghitaamereri ke bhasësë kobhataraaha.
Mbakwëndëru kobhahökëri bhoheene na ghokera hayo,
gho kubha mbaakubha bharabhatoori abhakumi abhaghëndi bhaabho,
wiiki m‑bhasiighani bhaabho.
Ameeghi gha bhuröngö no obhwame bho hëënë
Ghayo ogheeghi na ghoghatöngëra.
3 Mbaanyi‑ho abhaato bhano bhakweghi ameeghi gha bhuröngö.
Mbakweghi ghano ghataaghwishererani na ameeghi gha bhuhëënë gha Mutëmi wiito Yesu Kirisito,
wiiki ghataaghwishererani na ameeghi ghano ghakwërëkërëri abhaato korisëngëra Eryobha.
4 Bhayo mbiichwire obhwihachi,
wiiki bhateeche ghyokyose.
Abhaato bhayo mbahoomera erihakaana rino retaanyi no obhwëra ighoro e mangʼana amasuuhusuuhu.
Amangʼana ghayo nigho ghakurëëta eriihari,
no obhurööni,
na amatoki,
na amiihëëbhö amabhe,
5 wiiki ngaghusari obhoghwani chaasiko choose.
Abhaato bhayo mbasarëkiri emitu,
bhateeche obhuhëënë.
Mbakwihëëbha kubha korisëngëra Eryobha niyo anchëra e kubhöna obhwame.
6 Mahëënë,
korisëngëra Eryobha ngokomuköra omooto abhe omwame chwee,
aribha arahaabha ne ebheghiro bhino anyi nabhyo.
7 Mo‑se ino,
totiichiri na ghyokyose,
wiiki totaaghuye na ghyokyose.
8 Mbe,
aribha toonyi ne ebhiinyakurë na changibho che kobheeka,
tuhaabhe na bhiyo.
9 Amare bhano bhaanyi na amiigha gha bhwame,
mbaghoghwera mo‑masaki,
na ghughöötu mo‑mihëtö,
na mo‑miigha maaru gha ghighëëghë.
Amiigha ghayo ngakobhasari mbagha bhasireekerere,
10 gho kubha ghosiigha chambiiri niko simoka e bhobhe bhoose.
Abhande ꞉mbaasiighiri obhwame bhoghaghëri bhangʼiinu,
na mbatighiri obhokumi.
Ibheere bhayo mbaanyi no obhororo bhwaru kinya omooto uno ingʼuutiri ne eghighësö.
Atöngërö gho Timotewo
11 Amare iye,
omooto o Ryobha,
oghangʼösë amangʼana ghayo.
Utambane ghano Eryobha rekwënda,
no orisëngërë,
ubhe no obhokumi,
no obhosiighi,
no obhoghumereri no obhuhörëëru.
12 Wiköngʼi kurööna eriihë ichömu re bhokumi bhwito,
ughöötërërë obhuhöru bho miishe ghyose.
Obhuhöru bhuyo,
Eryobha ndebhabherekiire mobhubhönë,
na moruusiri obhwibhateri bho mahëënë ambërë e bhiibhateri bhaaru kubha,
moghwitëngʼëra kobhubhöna.
13 Neghaghokumereri ambërë e Ryobha rino reghotoora obhuhöru moose e bheghiro bhyose,
na ambërë e Kirisito Yesu uno aruusiri obhwibhateri bho mahëënë ambërë e Bhontiyo Bhiraato,
a kubha,
14 ughöötërërë amëërëkërëri ghayo gho ghoghasooka no otaghataasi,
mbagha hano akuucha Omutëmi wiito Yesu Kirisito.
15 Kuucha kooche ngookubha eriibhagha rino rerwachiri Eryobha.
Eryobha niryo reghoghongibhu,
niryo reghukangata eryene,
niryo Omukangati o bhakangati no Omutëmi o bhatëmi.
16 Eryobha eryene chiri niryo retaaghoku,
ndikeere mo‑bhwero bhuno omooto taaghotora kobhwishukerera.
Wiiki taanyi‑ho omooto uno arerooche,
koru uno aghotora korerighi.
Iryo resongʼaane asooko na changuru emiishe ghyose.
Hawubhaabha.
17 Obhabhoorere abhaame bha mo‑se ino bhatighe kwihacha na ghwitëngʼëra obhwame bhoobho.
Obhwame bhuyo m‑bho riibhagha ighuhe hangʼu.
Amare,
bhariitëngʼërë Eryobha rino reghotuha ebheghiro bhyose gho ghusambaaruka kooche,
kubha tobhihökëri gho ghuchömëru.
18 Wiiki obhabhoorere bhakörë amachömu,
kubha bhabhe abhaame mo‑maköri amachömu.
Bhabhe bhararuusi na ghusanga obhwame bhoobho na abhande.
19 Gho ghuköra hangʼu,
mbaghwitoorera agharinga kinya obhoroso bhuköngʼu gho chaasiko chino chekuucha.
Hangʼu nibhu bhakuucha ghosongʼaana obhuhöru bho hëënë.
20 Timotewo,
ughöötërërë bhoheene angʼana e bhuhëënë ino uhaabhuru.
Otighe ghwitoora mo‑mangʼana amaghonchu,
ghano ghataanyi no obhwëra bhobhoose.
Wiiki otiisöhi mo‑mahakaano gha ghighëëghë,
ghano bhakobhugha nigho amangʼiini.
21 Abhaato abhamu mbamariri ghotigha obhokumi bhoobho,
gho kubha ꞉mbiisheriiri ameeghi ghayo gha bhuröngö.
Aghareeya e Ryobha ibhe haghirohamu na niinyu bhoose.