Anyaarubha a yimbërë e Bhawuro gho
Timotewo
Amakëërani gha Bhawuro gho Timotewo
1
Anyaarubha ino neyandëkiri eni Bhawuro.
Eni netomuru kubha omotomu o Kirisito Yesu gho kuhatëku ne Eryobha Omotoori wiito na Kirisito Yesu uno anyi eriitëngʼërö riito.
2 ˆNeghakwandëkëra iye Timotewo,
omoona waane o muhëënë mo‑bhokumi.
Neghokwëndëra ghareeya,
ne ebheghongi no omurëmbë koru kwo Waryobha Taata na gho Kirisito Yesu,
Omutëmi wiito,
ghibhe haghirohamu na niiye.
Atöngërö ighoro e meeghi gha bhuröngö
3 Eriibhagha rino ꞉niitanwire ghuye mo‑mukööwa o Maketoniya,
꞉neeghusabhiri wiikare mo‑moghya o Ebheeso,
obhashaangʼi abhaato bhano bhakweghi iyo,
kubha bhatëëndërëra kweghi ameeghi gha bhuröngö.
4 Obhashaangʼi bhatighe ghotereera amaghano gha kare ghano ghataanyi no obhwëra bhobhoose,
na kwinyaaki gho kwarura amariina gha bhasookoro ghano ghataanyi ne ekirëngërë.
Amangʼana ghayo ghoose ngaghughëri obhushangʼaani obhwene,
ghataaghusakeri abhaato korekumi Eryobha.
Na korekumi Eryobha niyo anchëra yaache e kobhatingori abhaato.
5 Ekebhune ke meeghi ghiito n‑kubha,
abhakumi bhasiighane kwo mukörö mwero,
na kwo mënda machömu no obhokumi bho hëënë.
6 Amare abheeghi abhamu mbatighiri ghayo,
mbigharwire,
ˆbhaghikareerera ghosiikëra amangʼana ghano ghataanyi no obhwëra.
7 Mbakwënda kubha abheeghi bha meghiro,
nangabha ghano bhaghosiikëra na ghokumereri,
bhatagheeche.
8 Amare itu ntweche kubha emeghiro m‑michömu,
aribha omooto aghoghighööta kinya ekwëndëru.
9 Wiiki,
ntokwëndëru kumënya kubha emeghiro ghetatooruru gho ghiri e bhaato abhahëënë,
amare n‑kwo bhano bhaghusari emeghiro na kwo bhano bhataanyi na asooko,
na kwo bhano bhataakorekumi Eryobha na abhaköri bha masari,
na kwo bhano bhataanyi no omukörö mwero na kwo bhaghonchu,
na kwo bhano bhaghwita bhiishe na bhaanyina na kwo bhiiti bha bhaato,
10 na kwo bhataari na kwo bhasubhe bhano bhakomisi na abhasubhe abhaghëndi bhaabho,
na kwo bhano bhakobhuumara abhaato na kobhaghööta na kobhaghori kubha abhasësë,
na abharöngö,
na kwo bhano bhakuraheri kwo bhuröngö.
Emeghiro ngetooruru kwo mangʼana ghoose ghano ghataakoghwana na ameeghi gha bhuhëënë.
11 Ameeghi ghayo gha hëënë ngahaabhönëka mo‑Ngʼana Anchömu,
ino ekwërëki obhokumi obhokoro bho Ryobha rino reghoghongibhu.
Angʼana iyo niyo ꞉niihaabhuru ne Eryobha neyiraghani.
Aghareeya e Yesu Kirisito kwo Bhawuro
12 Nekomwitabheri Kirisito Yesu Omutëmi wiito,
gho kubha ꞉naandooche kubha muhëënë neenyi,
akanyaahura kubha omutamishi waache na kuuha obhotoro bho ghuköra emeremo gheeche.
Nekomwitabheri,
gho kubha ꞉naandooche kubha nekurëngʼaanera kubha omutamishi waache,
13 ꞉Naaköriri hangʼu,
nangabha ekimbërë hayo ꞉neemotokiri,
na neere mutarighanu ghokooche,
wiiki ꞉neebhanyaakiri abhaato bhaache.
Amare,
iwe ꞉naandoochiire changori,
gho kubha neere neraköra ghayo kwo bhuraghaanu bhoone na gho kwanga kubha no obhokumi.
14 Mahëënë Omutëmi wiito Kirisito Yesu ꞉naansakiiri aghareeya yaache kwo bhwaru,
gho kuuha obhokumi no obhosiighi gho ghughöötana nawe.
15 Angʼana e hëënë ino ekwëndëru abhaato bhayiishereri n‑kubha,
“Kirisito Yesu ꞉niichiri mo‑se,
kubha atoori abhaato bha masari.”
Ghate e bhaato bha masari,
eni niköriri amasari ghokera bhoose.
16 Koru hangʼu,
Yesu Kirisito ꞉naandoochiire changori eni!
꞉Naanyëërëkiri obhoghumereri bhooche bhokoro chwee ghokoone eni uno neenyi na amasari ghokera bhoose,
kubha kinya angumeriire eni ibhe ekyërëkërëri kwo bhaare bhakuucha komokumi na ghosongʼaana obhuhöru bho miishe ghyose.
17 Eryobha niryo Omutëmi o miishe ghyose,
retaaghoku,
koru retaakorighibhu,
na retaanyi‑ho erende kinya iryo.
Eryobha resongʼaane asooko na ghoghongibhu,
emiishe ne emiishe.
Hawubhaabha.
Bhawuro ˆakamuhatëka Timotewo ghughöötërëra amëërëkërëri ghaache
18 Omoona waane Timotewo,
ˆneghakuha amëërëkërëri ghayo,
kurëngʼaana na amangʼana gha bharööti ghano ꞉ghaasiikiiru ighoro yaacho.
Amangʼana ghayo ngaghoghotoori kurööna eriihë ichömu re meremo ghe Ryobha.
19 Gho ghayo,
ughöötërërë obhokumi na kubha no omotema omuchömu.
Abhaato abhande bhatatereeriri ghuköra ghaare bheeche kubha n‑gha hëënë,
ghayo ngabhaköriri bhasari obhokumi bhoobho.
20 Ghate e bhaato bhayo naanyi‑mu Himenaayo,
a na Arekisanta.
Abhaato bhayo nereheere Erishambub kubha bhabhönë ameeghi,
bhatighe koretoka Eryobha.