Ameeghi ighoro e ghusëngëra mo‑riikanisa
2
Mbe,
ghokera ghoose neghusabha mubhe morasabhera abhaato bhoose,
kwo masabhi gha manga maaru.
Wiiki,
mubhe morariitabheri Eryobha gho ghiri e bhaato bhoose.
2 Mokwëndëru kobhasabhera abhatëmi na abhande bhoose bhano bhaanyi mo‑bhukangati,
kubha tumanye kwo murëmbë,
torisëngërë Eryobha na ghuköra ghano ghakwëndëru ambërë yaache.
3 Angʼana ino n‑inchömu,
wiiki neghotegheri Waryobha Omotoori wiito.
4 Eryobha ndëhëënda abhaato bhoose bhatooribhu na kumënya obhuhëënë.
5 Ndeenyi‑ho Eryobha rimu hangʼu,
no omorwachi ghate e bhaato ne Eryobha woose n‑umu.
Uyo niwe omooto Kirisito Yesu.
6 Iwe ꞉naaruusiri eriimanya reeche omwene,
kubha abhatingori abhaato bhoose.
Bhuno nibho obhwibhateri bhuno Kirisito atoheere kwo riibhagha rino Eryobha retooriri.
7 Gho ghayo,
eni netooruru kubha omotomu no omuraghani o Ngʼana Anchömu e hëënë e Yesu Kirisito mo‑bhaato bha matöngö,
nebhahirere amangʼana ghayo na nebheeghi ighoro e ngʼana ino e bhokumi ne e bhuhëënë.
Amangʼana ghano neghosiikëra n‑gha hëënë,
nteekobhangʼiina.
8 Gho ghayo,
ahaghiro hoose hano moghwikomana ghusabha,
nekwënda abhasubhe hano bhaakubha bharasabha bhaghongi amabhökö ghaabho ighoro,
bhakörë hangʼu kwo mukörö mwero ino bhataaghushangʼaana hamu ghukarara.
9 Hangʼu hangʼu nekwënda abhakari bhiichöchë,
bhabheeke amaghööti gha sooko ghano ghakwëndëru,
gho sooko ne ekirëngërë.
Ghwichöcha koobho ghotabha gho ghoshuka chanchweri,
hamu gho kobheeka ebheghiro bhe sahaabhu na bhino bhekubharibhari,
hamu changibho che riighori ikoro.
10 Amare ghwichöcha koobho,
kubhe kwo maköri amachömu,
kinya bhuno ekwëndëru mo‑bhakari bhano bhiisheriiri korisëngëra Eryobha.
11 Abhakari,
hano bhaakubha bhareegha,
bhabhe abhatëghëërëri na abhasooku.
12 Nteekobhiisherereri abhakari kweghi hamu ghukangata abhasubhe,
amare bhabhe abhatëghëërëri.
13 Neghosiikëra hangʼu,
gho kubha Eryobha ꞉ndiishamiri reghatëëma Ataamu singa,
rekamara reghatëëma Haawa.
14 Wiiki Ataamu tangʼiinuru,
amare omukari niwe angʼiinuru,
aghasari emeghiro ghe Ryobha.a
15 Amare hano omukari akwibhora na ghotugha omoona waache,
naghotooribhu aribha akwëndërëra ghwikara mo‑bhokumi,
no obhosiighi,
no obhutööbhiyu na kubha ne ekirëngërë.