Abheeghi bha bhuröngö
4
Ibheere,
Akörö Ahörëëru neghosiikëra kyono kubha,
mo‑rosiko ro ntenero,
abhande mbaghotigha obhokumi bho hëënë,
na ghutambana chaakörö che bhuröngö,
na ameeghi gha misambu.
2 Ameeghi ghayo,
ngaakubha ghareeghibhu na chaghughuuti,
wiiki m‑bharöngö bhano amiihëëbhö gha chaakörö cheebho ghateeche amachömu na amabhe,
n‑kinya gheekuru no omororo.
3 Bhayo mbaheeghi abhaato kubha bhatighe ghokwira,
na kobhahatëka bhatarë ebhiinyakurë nyarebhe.
Amare Eryobha ꞉ndiitëëmiri ebhiinyakurë,
kubha bhesongʼaanibhu gho ghwitabheri na bhano bhaghokumi na kumënya obhuhëënë.
4 Ebhetyenyi bhyose bhino bhitëëmuru ne Eryobha m‑bhimangi,
koru ghetaanyi‑ho ghe kwangu.
Amare bhyose bhesongʼaanibhu gho ghwitabheri,
5 gho kubha angʼana e Ryobha na amasabhi,
ngahëërëki kubha ebheghiro bhiyo m‑bhitööbhiyu.
Omutamishi omuhöriicho o Yesu Kirisito
6 Orabheeghi abhahiiri bhiito bhoose amangʼana ghayo,
niho okubha omutamishi omuhöriicho o Kirisito Yesu.
Wiiki nookubha orarëru bhoheene mo‑bhuhëënë bho bhokumi bhwito na mo‑meeghi amachömu ghano iye oghutambana.
7 Amare waange kimu amaghano gha kare ghano ghataanyi no obhwëra,
amare wiköngʼi ghuköra ghano ghakwëndëru ambërë e Ryobha.
8 Nimënyuru kubha,
“Kowuhöki omobhere ubhönë changuru nkoonyi no obhwëra bhosuuhu hangʼu.
Amare,
ghuköra ghano ghakwëndëru ambërë e Ryobha,
nkoonyi no obhwëra mo‑ghoose,
gho kubha ngoghotuha obhuhöru bho miishe ghyose bhuno Eryobha returaghiire,
bhwi ibheere na bhuno bhokuucha.”
9 Angʼana iyo n‑e hëënë,
wiiki abhaato mbakwëndëru bhayiishereri.
10 Riyo niryo reghughëri toriiköngʼi ghuköra emeremo gho ghwiköngʼi,
gho kubha ntokoriitëngʼëra Eryobha rino reenyi ihöru.
Iryo niryo Omotoori o bhaato bhoose,
ahanene kwo bhano bhaghokumi.
11 Amangʼana ghayo,
ogheeghi na ghogharaghereri.
12 Omooto wowoose ataghutaraaha gho kubha iye okeere omobhureni,
amare wiköngʼi kubha ekyërëkërëri ghichömu mo‑bhakumi gho ghughamba koocho,
na atëëmö yaacho,
no obhosiighi bhoocho,
no obhokumi bhoocho no obhughöröröku bhoocho.
13 Wiköngʼi ghusömëra abhaato Amandëkö Amatööbhiyu,
wiiki uraghani na kweghi,
mbagha hano nekuucha iyo.
14 Otatigha kuhökëri ekihaano kino Eryobha rekoheere,
na amangʼana gha bharööti ngakuhëënëhi ghayo hano abhagharuka bha riikanisa bhaghotooriire amabhökö.
15 Ughöötërërë ghuköra ghayo kwo mukörö waacho woose,
kubha abhaato bhoose bharighi bhuyo okwëndërëra mo‑ghayo.
16 Wëndërërë ghochonga atëëmö yaacho na ameeghi ghaacho.
Örëëndërëra ghuköra hangʼu,
noghwitoori iye omwene na bhano bhaghoghutëghëërëra.