Motusabhere kwo Waryobha
3
Ibheere abhahiiri bhiito,
motusabhere kubha angʼana e Mutëmi Yesu yëndërërë ghusancha bhwango,
wiiki abhaato bhayesongʼaane gho sooko,
kinya bhuure enyi ghokoonyu.
2 Motusabhere kubha Eryobha retotoori mo‑bhaato abhabhe na abhatiriighanu,
gho kubha taanyi bhoose bhano bhaghokumi angʼana iyo.
3 Amare Omutëmi m‑muhëënë,
iwe nakobhaköngʼëërëri inyu na kobhachonga no Omobhisa wuure.
4 Nawe Omutëmi natoheere amiitëngʼërö makoro ighoro yaanyu,
kubha moghuköra na mokwëndërëra ghoghaköra ghano tokobharaghereri.
5 Omutëmi aghikangate emetema gheenyu mumënyë bhoheene obhosiighi bho Ryobha no obhoghumereri bhuno bhwërëkuru na Kirisito.
Mwëndërërë ghuköra emeremo
6 Abhahiiri bhiito,
ntokobharaghereri kwo bhukangati bho Mutëmi Yesu Kirisito kubha,
mobhiisache abhaghëndi bhaanyu bhano bhaanyi abhatöbhu bhano bhataaghutambana ameeghi ghano tobhaheere.
7 Ntokobhugha hangʼu gho kubha,
inyu bheene mweche bhuure mokwëndëru kwegha eghetuubhaani kiito.
Hano itu toore haghirohamu na niinyu totaare bhatöbhu,
8 koru totaraghiire ebhiinyakurë bhe mooto wowoose bhoowa.
Amare ntoore toraköra emeremo gho ghwiköngʼi obhotiko no omwishe,
kubha totamunyaaki omooto wowoose ghate yaanyu.
9 Hano toore toraköra hangʼu,
taanyi kubha totaare torarëngʼaanera kubhöna egheghiro ghokoonyu,
amare ꞉ntwëëndiri tubhe eghetuubhaani ghokoonyu kubha motweghe.
10 Wiiki hano toore haghirohamu na niinyu,
꞉ntoobharaghëriiri kubha,
“Omooto wowoose uno ataakwënda ghuköra emeremo,
ataraaghëra.”
11 Ntosiikiire amangʼana ghayo gho kubha,
ntooghwire iyo bhowaanyu mbaanyi‑ho abhaato abhande abhatöbhu,
bhataaghuköra ghyokyose,
amare mbaghughëndëra amangʼana gha bhaato abhande.
12 Abhaato bhayo tokabharaghereri na kobhashaangʼi kwo bhukangati bho Mutëmi Yesu Kirisito kubha,
bhabhe bharaköra emeremo gho sooko,
na kwibhönëra ebhiinyakurë bheebho abheene.
13 Amare inyu abhahiiri bhiito,
motaku omukörö ghuköra amachömu.
14 Aribha omooto wowoose ataakwënda ghoghaghööta amaraghereri ghiito ghano ghaanyi mo‑nyaarubha ino,
mubhe miisho no omooto uyo.
Motaghöötana nawe kubha arighi chaasoni.
15 Amare motamubhara kinya omobhisa,
mubhe moramoshaangʼi kinya omughëndi waanyu.
Amangʼana gha kuragha
16 Ibheere,
Omutëmi Yesu omwene uno anyi omutangi o murëmbë,
abhe arabhaha omurëmbë eriibhagha ryose gho chanchëra haghare haghare.
Iwe abhe haghirohamu na niinyu bhoose.
17 Eni Bhawuro ˆnekabhaandëkëra amakëërani ghano gho kubhökö koone eni mwene.
Kiyo nikyo ekingʼöchö mo‑chanyaarubha cheene choose,
nibhu nehaandëka.
18 Aghareeya e Mutëmi wiito Yesu Kirisito,
ibhe haghirohamu na niinyu bhoose.