Kuucha kwo Yesu na korighibhu kwo Omwigharurani
2
Ibheere abhahiiri bhiito,
ntokobhaandëkëra ighoro e kuucha kwo Mutëmi wiito Yesu Kirisito na bhuure toghwikomana ghokooche.
a Ntokobhasabha kubha,
2 motiitumata bhwango na kubha na ahaho kubha orosiko ro kuucha Omutëmi ndumariri kohika.
Hamwabhe mooghwire amangʼana nyarebhe gha bhurööti,
hamu ghano bhakuraghani,
hande gha nyaarubha ino bhakwihëëbha kubha neruure ghokwito.
3 Motiishereri omooto wowoose kobhangʼiina kwo ryoryose riire,
gho kubha orosiko ruyo rotaakohika singa,
mbagha chaasiko chiire abhaato bhaaru bhaakubha bharigharuriini Eryobha,
wiiki eriibhagha riyo Omwigharurani wuure nakorighibhu.
Uyo niwe eriibhagha re ntenero Omutëmi nakomosireekereri kimu.
4 Iwe naakubha araanga egheghiro ghyokyose kino ghekobherekeru Eryobha,
hande kino gheghusëngëru,
na ghwitoora ighoro e bhyose.
Iwe naaghuye na ghusöha Mwisëngërö re Ryobha na ghwikara‑mu na kwibherekera kubha iwe n‑Eryobha.
5 Nyeeche motaakohiita kubha hano neere haghirohamu na niinyu,
neere nerabhabhoorera ghayo ghoose.
6 Na nkeenyi‑ho egheghiro kino ghekomuhööchërëra Omwigharurani uyo kwi ibheere,
kubha ache arighibhu kwo riibhagha rino rirëngʼaaniire.
Inyu mokyeche egheghiro kiyo.
7 Koru ibheere Omwigharurani uyo naghuköra emeremo gho kwibhisa.
Amare taakorighibhu mbagha hano akoruusibhu uno akomuhööchërëra.
8 Hayo niho Omwigharurani uyo akorighibhu,
amare Omutëmi Yesu hano akuucha,
nakomwita no omwika koru mo‑monu waache.
Wiiki nakomosireekereri kwo murëngaari o kuucha kooche.
9 Eriibhagha re kuucha kooche,
Omwigharurani uyo,
nakuucha na changuru choose che Rishambu na ghuköra ebhyërëkërëri ne ebhiraghe bhe bhuröngö.
10 Wiiki nakobhangʼiina gho chanchëra chaaru bhoose bhano bhaanyi mo‑nchëra e kobhora,
gho kubha mbaangiri ghosiigha obhuhëënë kubha bhabhönë ghotooribhu.
11 Gho ghayo,
Eryobha ndiisheriiri bhakangatu na changuru che bhobhiihi,
kubha bhëëndërërë kobhokumi obhuröngö.
12 Niho bhoose bhano bhataaghokumi obhuhëënë,
na ghuchömëru na amasari,
mbaghoteneru ekiina.
Mwimeerere muköngʼëri mo‑bhokumi
13 Mbe,
itu ntokwëndëru koriitabheri Eryobha eriibhagha ryose gho ghiri yaanyu bhahiiri bhiito,
inyu bhano mosiighiru no Omutëmi Yesu.
Ntokwëndëru ghuköra hangʼu,
gho kubha,
nabhaahwire inyu korwera simoka,
kubha mubhönë obhotoori.
Obhotoori bhuyo mobhobhwine gho nchëra e Körö Ahörëëru ino ekobhamusa,
na gho ghokumi obhuhëënë.
14 Eryobha ndebhabherekiire inyu,
kubha mubhönë obhotoori bhuyo gho nchëra e Ngʼana Anchömu ino ꞉tuuraghiini bhowaanyu.
Ndebhabherekiire kubha mubhönë obhokumi obhokoro bho Mutëmi wiito Yesu Kirisito.
15 Ibheere abhahiiri bhiito,
mwimeerere muköngʼëri na ghughööta ameeghi ghano mobhwine kohetera mo‑mangʼana ghiito ghano ꞉toobharaghaniiri,
hamu koru mo‑nyaarubha yiito ino ꞉toobhaandëkiire.
16 Taata wiito Waryobha natosiighiri,
na gho ghareeya yaache aghatughambisani emiishe ghyose na ghotuha amiitëngʼërö amachömu.
b Iwe ntokomusabha,
haghirohamu no Omutëmi wiito Yesu Kirisito kubha,
17 abhaghambisani emetema gheenyu na kobhaköngʼëërëri kwo mangʼana amachömu ghoose ghano moghosiikëra hamu ghuköra.