Anyaarubha a yimbërë e Bhawuro kwo
Bhatesaronike
Obhukangati
Anyaarubha a yimbërë kwo Bhatesaronike ꞉yaandëkuru na Bhawuro omotomu o Yesu Kirisito (1:1). ꞉Naandëkiri anyaarubha ino haghirihamu na Sirwano na Timotewo, mo‑mooka o 51 korwera hano Yesu Kirisito ibhoriiru.
Bhawuro mo‑rughëndö rooche ro kabhere ꞉naaraghiini Angʼana Anchömu na ghutanga eriikanisa mo‑moghya omokoro o mo‑mukööwa o Maketoniya uno ore orabherekeru Tesaronike (mööhi Amaköri gha Bhatomu 17:1–10). Abhaato bhaaru ꞉mbaakumiri amangʼana ghaache. Bhawuro tiikeere iyo eriibhagha irë gho kubha anyaako ihaari ꞉niisëëmiri kobhabhöna abhakumi. Anyaako iyo ꞉niisëëmuru na Abhayahuuti.
Hano rehetiri eriibhagha ighuhe, Bhawuro akamotoma Timotewo aghi Tesaronike abhatoore omukörö abhakumi bha iyo. Akamara Timotewo aghagharuka koru iyo, akamurëëtëra amangʼana amachömu ighoro e riimanya no obhokumi bho Bhatesaronike. Hano Bhawuro oghwire amangʼana ghayo aghachömëru chwee, akabhaandëkëra anyaarubha e kobhiitabheri, na kobhatoora omukörö.
Nakobhaandëkëra ighoro e ghoghumereri mo‑nyaako ni ighoro e kubha no obhuhëënë kubha Yesu naghugharuka na ghwikara haghirohamu na abhakumi bhoose. Bhawuro naghosiikërëra amiitëngʼërö gho kubha no obhuhëënë kubha Yesu ꞉naakuure akaryoka. Wiiki nakobhasasaama bhëëndërërë ghuköra emeremo gho changuru.