Anyaarubha a yimbërë e Bhawuro kwo
Bhatesaronike
Amakëërani
1
Anyaarubha ino neyandëkiri eni Bhawuro,
haghirohamu na Sirwanoa na Timotewo.
Ntokobhaandëkëra inyu bhano moonyi mo‑riikanisa re moghya o Tesaronike,
bha rikinda re bhaato bhano momokumiri Taata Waryobha no Omutëmi wiito Yesu Kirisito.
Ntököbhëëndëra aghareeya no omurëmbë ghibhe haghirohamu na niinyu.
Obhokumi ne ekyërëkërëri ke Bhatesaronike
2 Ntokoriitabheri Eryobha eriibhagha ryose gho ghiri yaanyu inyu bhoose,
ino torabhasabhera mo‑masabhi ghiito na totaaghutamu.
3 Hano tookubha torabhasabhera o‑Taata wiito Waryobha,
ntokohiita emeremo ghino muköriri kwo bhokumi.
Ntokohiita ghwiköngʼi koonyu kuno ghokorwera mo‑bhosiighi bhoonyu,
na kebhuno mwimeeriire mo‑bhokumi na kwo miitëngʼërö ghaanyu gha ghugharuka kwo Mutëmi wiito Yesu Kirisito.
4 Inyu bhahiiri bhiito,
bhano Eryobha rebhasiighiri,
ntweche Eryobha ndebhahwire kubha mubhe abhaato bhaache.
5 Ntweche hangʼu gho kubha,
hano toore toraraghani Angʼana Anchömu bhowaanyu,
totaraghiini kwo mangʼana agheene hangʼu.
Amare nturaghiini gho changuru na gho Körö Ahörëëru na kwo bhuhëënë.
Inyu mweche bhoheene bhuno toore haghirohamu na niinyu,
kubha tobhatoorereri.
6 Nangabha moore mo‑nyaako gho ghiri e bhokumi bhoonyu,
mosongʼaaniri Ngʼana iyo gho ghuchömëru kuno ghookoru mo‑Körö Ahörëëru.
Kinya muköriri hangʼu,
mutambiine eghetuubhaani kiito ne eghetuubhaani ke Mutëmi Yesu.
7 Koru mookabha eghetuubhaani ghichömu mo‑bhakumi bhoose bha mo‑mikööwa ghe Maketoniya na Akaaya.
8 Korwera ghokoonyu,
abhaato mbooghwire Angʼana e Mutëmi Yesu.
Taanyi kwo bhaato bha Maketoniya na Akaaya abheene,
amare obhokumi bhoonyu kwo Waryobha mbumanyëkiine hoose.
Gho ghayo,
totaakwinyaaki ghosiikëra ghyokyose ighoro e bhokumi bhoonyu.
9 Hohoose hano tooghuye,
abhaato mbaghosiikëra kebhuno ꞉mootughënëhiri eriibhagha ꞉twiichiri bhowaanyu.
Mbaghosiikëra kebhuno ꞉mootighiri chasanaamu cheenyu na ghwigharurera Eryobha gho korihökëri rino reenyi ihöru na re mahëënë,
10 na komughanya omoona waache Yesu koru Mwishaaro.
Iwe niwe Eryobha ꞉reemoryokiri,
wiiki niwe aghototoori mo‑rosiko runo toghoteneru ekiina ne Eryobha.