Anyaarubha e Bhawuro kwo
Bhakorosaayi
Obhukangati
Korosaayi noore omoghya omosuuhu mo‑mukööwa o Asiya. Chaasiko chino Korosaayi n‑ahaghiro ha se e Bhoturuki. Amare Bhawuro teeghiri iyo Korosaayi, ꞉ndiisëëmuru erikinda re bhaghëndi iyo Korosaayi no omooto umu uno are arabherekeru Ebhaabhura (1:7–8).
Hano Bhawuro are mo‑kibhöhö, Ebhaabhura akaacha korighani nawe, akamobhoorera ighoro e bheeghi bha bhuröngö bhano ꞉bhaare bharabhanyaaki abhaghëndi bha Yesu iyo Korosaayi. Mo‑bhaghëndi bhayo bha Yesu ꞉haare na amakinda abhere, Abhayunaani na Abhayahuuti.
Abhayahuuti abhande mbaare bharakumi kubha, ibho n‑abhaato bhano bhaahwiru ne Eryobha. Mbe, koru aribha omooto aramokumi Yesu, taaghotora ghwisherereru ne Eryobha aribha atasaaruru na ghutambana emeghiro na chaasughara che Kiyahuuti. Abhayunaani abhande nabho mbaare bharakumi kubha, gho kubha Eryobha retaanyi na amasari, retangatoriri ghutëëma ase ino bharooche neenyi na amasari. Wiiki mbaare bharakumi kubha, omobhere o mooto noonyi na amasari, gho ghayo, Yesu tangatoriri kubha Eryobha na wiiki amanye mo‑se, kinya omooto.
Bhawuro ˆaghagharokeri ameeghi ghayo gha bhuröngö gho ghosiikëra obhuhëënë ighoro Yesu. Yesu Kirisito n‑Eryobha, niwe ꞉atëëmiri ase, na niwe omokoro o bheghiro bhyose bhino ꞉bhiitëëmuru. ꞉Naamanyiri mo‑se, na naare omooto, na aghaku gho ghiri e masari ghiito kubha twabhëru.
Bhawuro nakobhabhoorera Abhakirisito kubha, nekwëndëru bhatighe chatëëmö chambe che kare, amare bhamanye eriimanya eriihë rino rekorichömëri Eryobha. Nakobhabhoorera kebhuno bhakwëndëru bhakörërane abhasubhe na abhakari bhaabho, abhiibhori na abhaana bhaabho, na abhasësë na abhatëmi bhaabho.