Anyaarubha e Bhawuro kwo
Bhakorosaayi
Amakëërani
1
Anyaarubha ino neyandëkiri eni Bhawuro,
omotomu o Kirisito Yesu kwo mënda gha Ryobha,
neenyi haghirohamu na Timotewo,
mohiiri wiito mo‑bhokumi.
2 Ntokobhaandëkëra inyu abhaato bha Ryobha bhano mwikeere mo‑moghya o Korosaayi,
inyu abhahiiri bhiito abhahëënë gho ghughöötana na Kirisito.
Ntököbhëëndëra aghareeya no omurëmbë koru kwo Waryobha Taata wiito ghibhe haghirohamu na niinyu.
Amasabhi no oghwitabheri
3 Eriibhagha ryose hano tokobhasabhera inyu,
ntokoriitabheri Eryobha,
Taata o Mutëmi wiito Yesu Kirisito.
4 Ntoghuköra hangʼu gho kubha ntooghwire kebhuno momokumiri Kirisito Yesu,
na kinya obhosiighi bhoonyu bhoonyi kwo bhaato bhaache.
5 Obhokumi no obhosiighi bhoonyu,
mbookoru mo‑riitëngʼërö reenyu kubha moghosongʼaana orubhango runo Eryobha retotooriire Mwishaaro.
꞉Mooghwire amangʼana gha riitëngʼërö riyo ekimbërë eriibhagha ꞉muuraghaniiru angʼana e hëënë e Ngʼana Anchömu.
6 Angʼana Anchömu ino ꞉ehikiri bhowaanyu,
nisanchiri mo‑se ingima.
Nekobhagharura abhaato kinya ꞉ebhagharwire inyu korwera orosiko runo ꞉mooghwire na kumënya aghareeya e Ryobha no obhuhëënë bho ghareeya yaache kebhuno enyi.
7 ꞉Mweeghiri Angʼana Anchömu iyo koru o‑Ebhaabhura.
Iwe naghuköra emeremo kinya omutamishi mughëndi wiito omosiighani,
no omuhëënë o Kirisito gho ghiri yaanyu.
8 Iwe ꞉naatobhooriire amangʼana gha bhosiighi bhoonyu bhuno muhaabhuru na Akörö Ahörëëru.
9 Gho ghiri iyo ntokobhasabhera chaasiko choose korwera riibhagha rino tooghwire amangʼana ghaanyu.
Ntoghusabha kubha Eryobha rebhahë obhumënyi bhoose gho ghaare iryo rekwënda,
na amangʼiini ghoose no obhumënyi koru mo‑Körö Ahörëëru.
10 Niho moghotora kumanya kebhuno Omutëmi Yesu akwënda,
na komotegheri mo‑mangʼana ghoose.
Eriimanya reenyu ndekomotegheri kwo meremo gheenyu emichömu,
wiiki moghwiköngʼi korimënya Eryobha.
11 Ntoghusabha kubha Eryobha ryëndërërë kobhatoori gho changuru cheeche chino chetaanyi ne ekirëngërë,
kubha motore ghoghumereri.
Mbe,
muchömëru
12 mubhe moramwitabheri Taata gho kubha nabhasakiiri ghusanga aghabho e bhaato bhaache mo‑bhutëmi bho mirëngaari.
13 Natotooriri koru mo‑bhutëmi bho kengʼuuri,
aghatusaami na ghotusöhi mo‑bhutëmi bho Moona waache omosiighani.
14 Gho kohetera Omoona waache ntobhwine ghotingoribhu,
niko kobhugha amasari ghiito ngaabhiiru.
Obhokoro bho Kirisito ne emeremo gheeche
15 Kirisito n‑eghetuubhaani ke Ryobha,
rino retaakorighibhu,
na niwe omutange o bheghiro bhyose
bhino ꞉bhiitëëmuru.
16 Gho kubha gho kohetera ghokooche,
ebheghiro bhyose ꞉mbiitëëmuru,
bhino bheenyi mwishaaro,
na bhino bheenyi mo‑se,
bhino bhekorighibhu,
na bhino bhetaakorighibhu,
erabha bhano bhaanyi n‑obhotoro,
hamu abhatëmi,
na abhakoro,
hamu bha changuru.
Bhyose ꞉mbiitëëmuru gho kohetera iwe,
na gho ghiri yaache.a
17 Iwe naare‑ho korwera
ebheghiro bhyose bhekeere ghutëëmu,
wiiki gho kohetera ghokooche,
ebheghiro bhyose ꞉mbiighöötiine haghirohamu.
18 Iwe niwe omutu o mobhere,
niryo eriikanisa.
Iwe n‑simoka e mangʼana ghoose,
gho kubha niwe o mumbërë koryoka koru mo‑bhaku,
kubha abhe no omweya o mumbërë,
mo‑bheghiro bhyose.
19 Gho kubha Eryobha ꞉ndeerooche n‑kumangi kubha,
obhohikeerani bhooche bhoose bhwikare
mo‑Moona waache.b
20 Wiiki gho nchëra e Kirisito,
Eryobha rekabhighöötani ebheghiro bhyose na ryo,
ebheghiro bhino bheenyi mo‑se,
hamu bhino bheenyi mwishaaro.
꞉Naaköriri hangʼu gho ghotoora omurëmbë
kohetera amasaahë gha Kirisito
ghano ꞉ghiitëkiri mo‑musarabha.
21 Hayo ekeenyuma inyu bhoose moore kurë ne Eryobha wiiki moore abhabhisa bhaache,
gho ghiri e miihëëbhö na chatëëmö cheenyu chambe.
Amare ibheere Eryobha ndebhaghöötiini nawe
22 gho nchëra e mobhere o Kirisito,
gho ghoku kooche.
꞉Naaköriri hangʼu kubha abharëëtë ambërë yaache moonyi bhatööbhiyu,
motaanyi na angʼana koru eriisörö.
23 Amare mokwëndëru kwëndërëra koyekumi Angʼana Anchömu,
mubhe muköngʼiiri na kubha na changuru.
Motiishereri ghotigha eriitëngʼërö rino ꞉moobhwine hano mooghwire Ngʼana Anchömu.
Angʼana Anchömu iyo eni Bhawuro nibheere omutamishi waache,
wiiki ꞉niiraghiinu mo‑bhaato bhoose bha hano mo‑se.
Emeremo ghe Bhawuro mo‑makanisa
24 Ibheere neghuchömëru kwo nyaako ino nekubhöna gho ghiri yaanyu.
Mo‑mobhere waane neghusanga anyaako ino Kirisito ꞉abhwine gho ghiri e mobhere waache,
niryo eriikanisa.c
25 Eryobha ndentooriri eni kubha omutamishi o riikanisa riyo,
kubha nebharëëtërë angʼana yaache kebhuno enyi.
26 Angʼana iyo n‑ekebhisere kino ꞉keebhisuru korwera kare na gho chanyiibhoro choose.
Amare ibheere Eryobha ndebhahunyuriire abhaato bhaache abhatööbhiyu.d
27 Bhayo nibho Eryobha ꞉reesiighiri kobhahunyurera ekebhisere kiyo ghe koroghoori kino riköriri gho ghiri e bhaato bha matöngö.
Angʼana iyo e kebhisere n‑kubha,
Kirisito naanyi moose yaanyu,
wiiki niwe akobhaha amiitëngʼërö kubha moghusanga obhokumi obhokoro bho Ryobha.
28 Iwe Kirisito niwe tokuraghani amangʼana ghaache,
ntokobhashaangʼi na kobheeghi abhaato bhoose kwo mangʼiini ghoose,
kubha tobharëëtë bhoose ambërë e Ryobha bhaköngʼiri gho ghughöötana koobho na Kirisito.
29 Kwo riyo neghwiköngʼi na ghuköra emeremo gho kuhökëri changuru inkoro chino Kirisito aheere.