2
Mbe,
nekwënda mumënyë kinya nekwinyaaki ighoro yaanyu na gho ghiri e bhakumi bhaare bhaanyi Rawotikiya,
na kwo bhande bhoose bhano bhakeere kondighi eni.
2 Kino nekwënda n‑kubha,
motooru omukörö na ghutëmëëranibhu mo‑bhosiighi.
Nekwënda mubhönë obhumënyi bhoose bhuno bhokobhaha obhuhëënë.
Hayo mokumënya ekebhisere ke Ryobha,
nikyo Kirisito omwene.
3 Moose yaache neebhisuru agharinga yoose e mangʼiini no obhumënyi.
4 Ibheere ˆnekabhaandëkëra ghayo,
motiishereri kongʼiinu no omooto wowoose kwo mangʼana gha bhuröngö,
nangabha ghaanyi gha ghotegheri.
5 Ibheere gho kubha eni nteenyi haghirohamu na niinyu kwo mobhere,
amare gho körö,
neenyi haghirohamu na niinyu.
Eni neghuchömëru kooghu kinya mokwëndërëra mo‑bhumu bhoonyu na ghuköngʼëri obhokumi bhoonyu gho Kirisito.
Eriimanya eriihë ighoro e Kirisito
6 Mbe,
gho ghayo,
kinya bhuure momwisheriiri Kirisito Yesu kubha Omutëmi,
mwëndërërë kumanya gho ghughöötana nawe.
7 Mwëndërërë ghosimi emerya muköngʼëri gho Kirisito,
mubhe mwabhëkuru moose yaache,
na kwimeerera muköngʼiiri mo‑bhokumi kinya bhuure mweghuru,
na mubhe abhaato bha koriitabheri Eryobha eriibhagha ryose.
8 Mbe,
mubhe miisho,
omooto wowoose ataacha kobharumeeri kwo meeghi gha bhoowa na gha bhuröngö ghano ghakorwera mo‑chaasughara che bhaato.
Ameeghi ghayo ngaghwitëngʼëra chaakörö chambe chino cheghukangata ase inoa na ghataanyi gha Kirisito,
9 gho kubha,
obhohikeerani bhoose bho Ryobha mboonyi mo‑mobhere o Kirisito.
10 Inyu muhaabhuru bhyose gho ghughöötana na Kirisito,
iwe niwe Omutëmi omokoro uno anyi no obhotoro bhoose mo‑se ino etaakorighibhu.
11 Ibheere gho kubha moonyi no obhumu na Kirisito,
꞉naabhasaariri gho ghotooru kurë na simoka e masari.
꞉Naabhasaariri taanyi kwo mabhökö gha bhaato,
amare gho nchëra yaache omwene.
12 Hano mubhatiisuru,
atëëmö e kare ꞉neekuure ekaryeku haghirohamu na Kirisito,
wiiki atëëmö ahë,
ekaryoka haghirohamu nawe,
gho kubha mokumiri changuru che Ryobha rino remoryokiri koru mo‑bhaku.
13 Inyu moore mokuure mo‑chaakörö gho ghiri e masari ghaanyu,
wiiki motasaaruru atëëmö yaanyu e masari.
Amare Eryobha ndebhaheere obhuhöru haghirohamu na Kirisito.
Wiiki ndetwabhiire amasari ghiito ghoose.
14 Eryobha ndetorehiire asiire e masari,
nderehiri inkongʼorimu gho nchëra e Yesu ghotokwera mo‑musarabha.
15 Gho nchëra e musarabha,
Eryobha rekahöka emisambu obhutëmi no obhotoro bhoobho,
reghakinda gho chandiryato,
reghaghesooki haheero.
16 Mbe,
omooto wowoose atabhatenera ekiina ighoro e ebhiinyakurë,
hamu ebhinywebhu,
hamu anyangi e tiini,
hamu anyangi e kurörana kwo mwëri,
hamu orosiko ro Riikane.
17 Ghayo ghoose n‑ekiriiri ke mangʼana ghano gha kuucha,
obhuhëënë bho mangʼana ghayo n‑Kirisito omwene.
18 Motatëghëërëra omooto wowoose uno akwiyëërëki gho nche kubha m‑munyööhu no omusëngëri o bhamarayika.
Omooto kinya uyo atabhahöka atuho yaanyu e miishe ghyose.
Uyo naghwitoora mo‑marighi ghaache,
wiiki akiiraghaani kwo miihëëbhö ghaache gha simoka e masari.
19 Uyo niyahwire na Kirisito uno aghukangata eriikanisa,
niryo omobhere waache.
Koru ghokooche omobhere woose noghuchaama na ghughöötanibhu haghirohamu kwo ebhyemo ne emeghiha.
Omobhere woose noghokora bhoheene kinya Eryobha rekwënda.
20 Inyu atëëmö yaanyu e kare ꞉neekuure haghirohamu na Kirisito,
b gho kubha ꞉naabhatooriri koru mo‑chaakörö chambe chino cheghukangata ase ino.
c Mbe,
ngwake mokeere mwikeere kinya abhaato bha mo‑se ino?
Motiishereri ghosooka emeghiro ghenga ghino,
21 “Motaghööta kino,
na motaturi,
hamu motasama kiyo!”
22 Ghiyo ghyose n‑emeghiro na ameeghi gha bhaato hangʼu ghano ghaaghuye ne ebheghiro bhino bheghusarëka kwo riibhagha isuuhu bheramara kuhökëru.
23 M‑mahëënë,
bhano bhaghutambana emeghiro ghiyo,
mbakorighibhu kubha mbaanyi na amangʼiini.
Mbaghutambana kuhëërana kuno ꞉bhiitooriire abheene,
no obhunyööhu bho bhuröngö na kowukangata omobhere kwo bhuhaari.
Amare emeghiro ghiyo ghetaaghotora kuhööchërëra amiigha amabhe gha mobhere.