3
Ibheere gho kubha atëëmö yaanyu ahë neryokiibhu haghirohamu na Kirisito,
mutabhare amangʼana gha Mwishaaro,
hano Kirisito ikeere eribhaara re kwiro re Ryobha.
2 Moghiihëëbhërë ghano ghaanyi Mwishaaro,
motiihëëbha gha hano mo‑se,
3 gho kubha atëëmö yaanyu e masari nekuure.
a Ibheere obhuhöru bhoonyu mboonyi haghirohamu na Kirisito ambërë e Ryobha.
Amare obhuhöru bhuyo bhotaakorighibhu mo‑bhaato abhande.
4 Obhuhöru bhoonyu mbokurëëtu na Kirisito.
Eriibhagha rino akorighibhu,
niho na niinyu moghusanga haghirohamu nawe mo‑bhokumi bhooche obhokoro.
5 Mbe,
mute kurë amangʼana gha mo‑se ino ghano ghaanyi moose yaanyu,
kinya obhutaari,
no obhoghonchu,
no omuraka,
na amiihëëbhö amabhe,
no oghwighomba ebheghiro.
Obhwighombi bhonga hangʼu,
n‑kinya ghusëngëra asanaamu taanyi Eryobha.b
6 Gho ghiri e mabhe ghayo,
nigho ghaghuköra Eryobha rerakararera abhaato bhano bhataakoresooka.c
7 Inyu hayo ekeenyuma moore moraköra ghayo hano moore mumanyiri kurëngʼaana na ghayo.
8 Amare ibheere motighe inkongʼorimu,
ghukarara,
no obhororo,
na amabhe,
na amatoki,
na amangʼana ghano ghatanchakiine mo‑menu gheenyu.
9 Motabhoorerana obhuröngö,
gho kubha moruusiri atëëmö e kare haghirohamu na amaköri ghaache,
10 mobheekiri atëëmö ahë.
Atëëmö ahë iyo nehaabha eraköru bhuhë kurëngʼaana ne eghetuubhaani keeche eryene rino reyebhombiri,
kubha morimënyë bhoheene.
11 Gho ghayo,
bhotaanyi‑ho bhwahukani bho Muyahuuti hamu omooto o matöngö,
uno asaaruru,
hamu uno atasaaruru,
uno aghutaraahu na uno atasömiri,
omusësë hamu uno ataanyi omusësë.
d Amare Kirisito niwe akohikeerani ghoose,
wiiki naanyi moose e bhoose.
12 Ibheere gho kubha inyu n‑abhaahöru bha Ryobha moonyi,
na abhatööbhiyu bhano mosiighuru,
mubhe no omotema o bheghongi,
na atëëmö e bhuhöriicho,
no obhunyööhu,
no obhuhörëëru,
no obhoghumereri.
13 Moghumererani inyu bheene kwo bheene na kwabhërana.
Aribha umu ghate yaanyu naanyi na angʼana kwo mughëndi,
mokwëndëru mwabhërane kinya bhuno Omutëmi Yesu abhaabhiire inyu.
14 Ghokera ghayo ghoose mosiighane,
gho kubha,
obhosiighi nibho bhokobhaghöötani inyu mo‑bhumu bhuno bhohikeriine.
15 Omurëmbë o Kirisito ukangate mo‑metema gheenyu.
Inyu mubheere omobhere umu,
gho ghayo,
mumanye kwo murëmbë.
Wiiki mubhe morariitabheri Eryobha.
16 Angʼana e Kirisito yiikare kwo bhwaru moose yaanyu.
Mwegherani,
na ghutöngërana mo‑mangʼiini ghoose.
Moryembere Eryobha gho Sabhuri,
na kwo myembo,
na gho chatensi che mo‑metema.
Hano mookubha moraryembera,
mubhe morariitabheri mo‑metema gheenyu.e
17 Gho ghoose ghano moghosiikëra,
hamu ghuköra,
mukörë kwo riina re Mutëmi Yesu,
na komwitabheri Taata Waryobha kohetera ghokooche.
Eriimanya rino rekwëndëru mo‑ka e Ghekirisito
18 Inyu abhakari,
mubhe morabhasooka abhasubhe bhaanyu kinya ekwëndëru mo‑bhaato bhano bhamokumi Omutëmi Yesu.f
19 Inyu abhasubhe,
mubhe morabhasiigha abhakari bhaanyu,
motabha bhahaari ghokoobho.
20 Inyu abhaana,
mubhe morabhasooka abhiibhori bhaanyu mo‑ghoose,
gho kubha,
gho ghuköra hangʼu ngokomotegheri Omutëmi Yesu.g
21 Inyu bhataata,
motabhanaaha abhaana bhaanyu,
kubha bhataacha ghoku omukörö.h
22 Inyu abhasësë,
mubhe morabhasooka abhatëmi bhaanyu mo‑mangʼana ghoose hano mo‑se.
Motaköra hangʼu hano bhaakubha bharabharighi okwene,
ango mwiyëërëki kubha murëngʼaaniire ghokoobho,
amare mobhasooke eriibhagha ryose gho körö imu,
gho kubha,
mokomosooka Omutëmi Yesu.
23 Ghyokyose kino moghuköra,
mukörë kwo mukörö umu,
kinya abhaato bhano mokomuhökëri Omutëmi,
taanyi abhaato.
24 Mohiite kubha nakobhareha atuho ino bhatooriiru,
gho kubha Kirisito uno mokomuhökëri niwe Omutëmi o hëënë.
25 Amare wowoose uno aghuköra amabhe nakorehu kurëngʼaana na amabhe ghaache,
gho kubha Eryobha retaanyi no obhwingʼaheri.i