4
Gho ghayo,
abhahiiri bhaane,
muköngʼëri kimu kimu gho komwitëngʼëra Omutëmi.
Nebhasiighiri na neenyi na amiigha gha korighani na niinyu,
bhahiiri bhaane.
Inyu niinyu moghughëri nichömëru,
wiiki inyu na atuho yaane ino nihaabhuru mo‑meremo ghino ꞉niiköriri.
Atöngëra e Bhawuro
2 ˆNekabhasasaama chwee Ewotiya na Sintike bhabhe no obhoghwani gho kubha bhoose mbakomutambana Omutëmi Yesu.
3 Koru iye uno onyi omutamishi omughëndi waane omuhëënë,
neghusabha obhasakeri abhakari bhayo bhabhere bhabhe no obhoghwani.
Bhayo bhoose bhabhere ꞉mbiiköngʼiri chwee haghirohamu na neeni kuraghani Angʼana Anchömu e Yesu Kirisito mo‑bhaato.
Wiiki abhakari bhayo mbaare bharaköra emeremo haghirohamu na Kireementi na abhahöki bhaghëndi bhaane abhande.
Amariina gha bhaato bhayo bhoose ngaandëkuru mo‑Ghitabhu ke Bhuhöru.a
4 Mbe,
muchömëru chaasiko choose gho kubha inyu n‑abhaato bha Mutëmi Yesu moonyi!
Wiiki nebhugha muchömëru!
5 Obhuhörëëru bhoonyu bhumënyu mo‑bhaato bhoose.
Omutëmi Yesu haghuhe anyi kuucha.
6 Motighe kwinyaaki mo‑ngʼana yoyoose,
amare mo‑mangʼana ghoose musabhe na ghusasaama,
haghirohamu na ghwitabheri,
amënda ghaanyu ghamënyu ne Eryobha.
7 Mbe,
omurëmbë o Ryobha uno okoheta amiihëëbhö ghoose gha bhaato,
noghochonga emetema na amangʼiini ghaanyu gho kubha inyu n‑abhaato bha Kirisito Yesu moonyi.
8 Antenero,
bhahiiri bhaane,
motoore amiihëëbhö ghaanyu ghoose ighoro e mangʼana ghano ghaanyi gha hëënë,
na amangʼana gha sooko,
na amangʼana ghano ghataamara ghusangerani no obhobhe,
na amangʼana gha ghotegheri,
ghoose ghano ghaanyi no obhuchömu.
Bhorabha-ho obhuhöriicho bhobhoose,
bhorabha-ho obhokumi obhuchömu bhobhoose,
moghiihëëbhërë amangʼana ghayo.
9 Mwëndërërë ghuköra ghaare mweghiri na ghoghasongʼaana koru ghokoone,
ghaare ꞉mooghwire nebhughiri,
hamu ꞉moorooche neraghaköra.
Niho Eryobha rino rekobhaha omurëmbë,
rekwëndërëra kubha haghirohamu na niinyu.
Bhawuro ˆakabhiitabheri Abhabhiribhi
10 Mbe,
nichömiiru chwee gho ghughöötana no Omutëmi Yesu,
gho kubha,
antenero,
moghasëëma wiiki konyihëëbhëra eni.
Nyeeche kubha chaasiko choose moore moranyihëëbhëra,
amare moghataamibhu kubhöna anchëra e ghontomera obhotoorereri bhoonyu ghokoone.
11 Nteekobhugha hangʼu gho kubha neenyi na amënda,
tiyaanyi.
Eni nyeghiri kuhaabha na kino neenyi nakyo.
12 Niko kobhugha,
eni nyeghiri kumanya kihabhe,
wiiki nyeghiri kumanya kyame.
Nyeghiri kuhaabha na ghoose ghano nekubhöna,
ibhe eriibhagha re gheecha,
hamu re mwighoto,
eriibhagha re kubha na bhyaru,
hamu re ghosuuheru.
13 Neghotora ghuköra ghoose ghayo,
gho kubha Kirisito niwe akuuha changuru.
14 Koru hangʼu,
muköriri bhoheene ghusanga na neeni mo‑nyaako ino neere nayo.
15 Kinya mweche inyu Abhabhiribhi,
hayo ekimbërë hano niisëëmiri kobharaghaneri inyu Angʼana Anchömu,
na hano neruure mo‑mukööwa waanyu o Maketoniya,
inyu bheene nibho moore morantoori.
Eriikanisa reenyu niryo reere no obhughöötani na neeni mo‑koruusi na kumbönëra ebheghiro.
16 Koru hano neere mo‑moghya o Tesaronike,
mara kaaru moore morantomera eni ebheghiro bhe ghunsakeri.
17 Nteekobhugha hangʼu gho kubha nekwënda kubhöna ebheghiro koru ghokoonyu,
tiyaanyi.
Amare nesiighiri nerighi orubhango runo Eryobha rekobhaha kurëngʼaana no obhwero bho chaakörö cheenyu.
18 Ibheere,
ebheghiro bhyose bhiire montomaniiri gho kohetera Ebhabhurotiito,
nebhebhwine.
Mbiishiri kumara amënda ghaane ghoose,
wiiki mbeghokera koru bhino neere kwënda.
Obhotoorereri bhuyo mbobheere kinya eriruusi re keneeso ghichömu,
amaruusi ghano ghaghwisherereru na ghakoretegheri Eryobha.
19 Mbe,
Eryobha reene,
ndekobhaha amënda ghaanyu ghoose kurëngʼaana no obhwame bhooche obhokoro.
Ndeghuköra hangʼu gho nchëra e Kirisito Yesu.
20 Waryobha,
Taata wiito,
aghongibhu emiishe ne emiishe.
Hawubhaabha.
Amangʼana gha kuragha
21 Munkëërëri abhatööbhiyu bhoose bha Kirisito Yesu bha iyo Bhiribhi.
Abhakumi bhano bhakuhöki haghirohamu na neeni hano Ruumi,
mbakobhakëëri.
22 Wiiki abhatööbhiyu bhoose bha Yesu Kirisito bhano bhamanyiri mo‑moghya uno mbakobhakëëri,
koru bhano bhaanyi mo‑nyumba e Kayisaari.
23 Aghareeya e Mutëmi wiito Yesu Kirisito,
ibhe haghirohamu na niinyu.