Bhawuro ˆakamwitëngʼëra Yesu Kirisito
3
Mbe,
bhahiiri bhaane,
muchömëru gho kubha n‑abhaato bha Mutëmi Yesu moonyi.
Amangʼana ghano ꞉niimariri kobhaandëkëra,
nteeghoshigha ghugharukera kobhaandëkëra,
gho kubha ghayo n‑angubha yaanyu e bhokumi.
2 Ibheere mubhe miisho na abheeghi bhaare bhaghusöhi emeghiro ghe Kiyahuutia mo‑makanisa ghiito,
ibho n‑abhaköri bha mabhe,
ibho mbaghokumereri ighoro e saaro.
3 Mööhi itu niitu abhaato bhano tusaaruru hëënë ne Eryobha,
taanyi ibho,
gho kubha Akörö e Ryobha neghototoori ghusëngëra Eryobha.
Itu ntokwihachera Kirisito Yesu na komwitëngʼëra.
Itu totaaghwitëngʼëra amaköri ghiito gha mebhere kubhöna obhotoori.
4 Nengabheere hangʼu,
koru eni mwene nengatoriri ghwitëngʼëra amangʼana gha mobhere.
Amare,
aribha anyi‑ho omooto uno aghwituuri kubha naghotora ghwitëngʼëra amangʼana gha mobhere,
eni nighöötë maaru gha ghwitëngʼëra ghokera iwe.
5 Eni ꞉niisaaruru orosiko ro kanaane korwera hano niibhwiru,
nekorwera mo‑ritöngö re Bhenchamiini,
mo‑se e Isiraeri.
Eni n‑Omwibhuraaniya o hëënë neenyi.
Kwo mangʼana gha ghughööta emeghiro,
eni neghighöötiri bhoheene,
gho kubha neere Omubharisaayo.
6 Wiiki ꞉niiköngʼiri chwee ghuköra ghano ꞉niituuriri kubha nigho Eryobha resiighiri.
Kiyo nikyo ꞉ghiinköriri nekabharëëtëra Abhakirisito anyaako.
Kwo mangʼana gha hëënë ighoro e meghiro,
eni nteere ni isörö ryoryose.
7 Amare,
ghoose ghano neere neragharighi kubha ngaanyi no obhwëra,
ibheere neghogharighi ghataanyi no obhwëra gho ghutambana Kirisito.
8 Koru taanyi ghayo agheene,
amare nerighi ghoose kubha ghataanyi no obhwëra bho ghokera obhwëra obhokoro bho komumënya Kirisito Yesu,
Omutëmi waane.
Gho ghiri yaache,
netighiri aghande ghoose.
Neghoghabhara ghayo kinya abhuusa,
kubha nibhe omooto o Kirisito,
9 wiiki nighöötane nawe kimu.
Nteeghwitëngʼëra wiiki obhuhëënë bhuure bhokorwera gho ghutambana emeghiro,
amare neghwitëngʼëra obhuhëënë bhuno bhookoru gho komokumi Kirisito.
Obhuhëënë bhuyo,
mbokuhaanu ne Eryobha mo‑bhaare bhamokumiri Kirisito.
10 Nekwënda nemumënyë Kirisito chwee na kubha na changuru ghe chino are nacho Kirisito eriibhagha re koryoka kooche.
Nekwënda kubhöna anyaako kinya iwe ꞉anyaakiibhu,
wiiki nekwënda neku kinya akuure.
11 Nëghöghëënda amangʼana ghayo kubha nibhönë kubha ghate e bhaato bhaare Eryobha rekuucha koryoki koru mo‑bhaku.
Ghoghumereri mbagha antenero e meremo
12 Eni nteekobhugha nimariri kohika mo‑ntenero,
hamu nimariri kubha mughöröröku,
tiyaanyi,
amare nekwëndërëra ghwiköngʼi nibhönë ghaare Kirisito Yesu amberekeriire.
13 Bhahiiri bhaane,
nteekubhara kubha nimariri ghughööta ghayo.
Amare neghuköra egheghiro kimu,
netighiri kwihëëbhëra ghano ghahetiri na neghwiköngʼi kubha nibhönë ghaare ghaanyi ambërë.
14 Mbe,
neghwiköngʼi mo‑rughëndö kubha nehike mo‑ntenero na kuhaabhu atuho yaane.
Atuho iyo niyo amberekerera e Ryobha gho nchëra e Kirisito Yesu.
15 Gho ghayo,
itu bhoose bhano tuköngʼiiri kimu kimu mo‑bhokumi ntokwëndëru ghwisherererani kwo mangʼana ghano.
Aribha mokwihëëbha obhonde kwo ngʼana yoyoose yiire,
Eryobha niryo rekobhahunyurera moghamënyë kinya ghaanyi.
16 Ibheere egheghiro eghekoro n‑kubha,
ntokwëndëru ghoghatambana ghaare Eryobha rimariri ghotwërëki.
Abhakumi bheeghe asughara e Bhawuro
17 Bhahiiri bhaane,
bhoose mweghe asughara yaane.
Wiiki mweghe mo‑bhaato bhano bhaghutambana asughara ino tobheeghiri.
18 Nimariri kobhabhoorera mara kaaru angʼana ino,
ibheere ˆnekayigharukera wiiki koru gho changishori,
kubha,
mbaanyi‑ho abhaato bhaaru bhano bhamanyiri kinya abhabhisa bha bhotoori bho Kirisito,
bhuno ꞉bhoorweriire mo‑musarabha.
19 Antenero e bhaato bhayo mbaghosireekerera,
gho kubha amiigha ghaabho nigho eryobha reebho.
Ibho mbakwihachera amaköri gha chaasoni ghano bhaghuköra.
Wiiki mbakwihëëbhëra amangʼana gha mo‑se ino.
20 Amare,
itu n‑abhiikari bha Mwishaaro toonyi na ntoghwitëngʼëra kwo miigha chwee Omotoori,
Omutëmi wiito Yesu Kirisito,
ache koru iyo.
21 Iwe naanyi na changuru che ghotoora ebheghiro bhyose bhibhe haase e bhukangati bhooche.
Gho nchëra e changuru chiyo,
naghugharura emebhere ghiito ghe bhutöbhu,
ghibhe no obhokumi obhokoro kinya omobhere waache onyi.