Anyaarubha e kabhere e Bhawuro kwo
Bhatesaronike
Amakëërani
1
Anyaarubha ino neyandëkiri eni Bhawuro,
haghirohamu na Sirwanoa na Timotewo.
Ntokobhaandëkëra inyu bhano moonyi mo‑riikanisa re moghya o Tesaronike,
bha rikinda re bhaato bhano momokumiri Taata wiito Waryobha no Omutëmi Yesu Kirisito.
2 Ntököbhëëndëra aghareeya no omurëmbë koru kwo Waryobha Taata wiito no Omutëmi wiito Yesu Kirisito,
ghibhe haghirohamu na niinyu.
Ghotena ekiina eriibhagha re kuucha Yesu
3 Abhahiiri bhiito,
nekwëndëru koriitabheri Eryobha eriibhagha ryose gho ghiri yaanyu,
gho kubha obhokumi bhoonyu mbokwiyëëngëra chwee,
wiiki ghosiighana koonyu ngokwiyëëngëra.
4 Gho ghayo,
ntoghosiikëra gho ghesubhe subhe mo‑makanisa gha Ryobha gho ghiri e bhoghumereri no obhokumi bhoonyu bhuno moonyi nabho,
mo‑nyaako yoose ino ekobhabhöna.
5 Mbe,
ghoose ghayo ngakwërëki kubha,
Eryobha ndeghotena ekiina kwo bhuhëënë.
Ibheere gho ghotena ekiina kuyo inyu mokubharu kubha mokurëngʼaanera mo‑bhutëmi bhooche,
nikyo inyu mokunyaakibhu.
6 Eryobha ndeghuköra gha hëënë,
ndekobhareha anyaako bhano bhakobhanyaaki inyu,
7 na ndekobhaweeri inyu bhano mokunyaakibhu,
haghirohamu na niitu.
Ndeghuköra ghayo hano Omutëmi Yesu akuucha koru Mwishaaro ne emirëngaari ghe mororo,
haghirohamu na bhamarayika bhaache bhano bhaanyi na changuru.
8 Yesu niwe akobharööna bhoose bhano bhakoryanga Eryobha na bhano bhataaghosooka Angʼana yaache Anchömu.
9 Okuröönu koobho ngookubha ghosireekereru kwo miishe ghyose na kwahoru gho ghotooru kurë no Omutëmi no obhokumi obhokoro bho changuru cheeche.
10 Kuröönu kuyo ngookubha orosiko ruure Omutëmi akuucha kuhaabhu obhokumi obhokoro na asooko koru mo‑bhaato bhaache abhatööbhiyu bhano bhamokumiri.
Inyu bhoose mookubha haghirohamu nabho,
gho kubha mokumiri angʼana ino ꞉toobharaghaniiri.
11 Gho ghayo,
ntokobhasabhera chaasiko choose.
Ntoghusabha Eryobha riito rebhabhare kubha murëngʼaanere ghwikara kinya bhuure ꞉reebhabherekiire.
Wiiki ntokorisabha kubha,
kwo bhotoro bhooche rehikeerani amangʼana machömu ghano mokwënda ghuköra na rehikeerani emeremo gheenyu ghyose ghe bhokumi.
12 Ntoghusabha hangʼu kubha eriina re Mutëmi wiito Yesu ribhe reraghongibhu gho ghiri yaanyu.
Wiiki na niinyu mubhe moraghongibhu gho ghiri yaache,
kurëngʼaana na aghareeya e Ryobha riito,
ne e Mutëmi Yesu Kirisito.