Sura au rapakatu i hantobu toSarani au rahangahe to
Ibarani
Pepongkaa lolita
Au mouki sura ide bara taisa, lawi bara mouki ba mouli hangana. Au manoto taisa: tauna au mouki sura ide iami hadua tadulako to Sarani au moisa ntepuu ihi sura Pototowia Hae, agaiana bara hadua hangko i topeguruna Pue Yesu (Ibr. 2:3).
Sura ide rauli: “Sura au rapakatu i hantobu to Sarani au rahanga to Ibarani.” To Ibarani, rauli worihe to Yahudi ba to Isaraeli. Tauna au rapakatuahe sura ide iamohe to Yahudi au rapopeahi-ahi anti pepoinalainda i Pue Yesu. Arahe au rakakabosai, au ratarunggu, hai ara worihe au rarampaki anu-anunda (10:32-34; 13:3, 13). Anti kapari iti, arahe au masusa lalunda (12:12), ara au barapohe maminggu (10:25), hai arahe au mopalehi pepoinalainda lawi mampeinaohe mesule i agamanda au hangkoia.
Tunggaiana topouki sura ide, rompaka. Au kaisa, ia mopakanotoahe kaYesuna Anana Pue Ala au meliu kamahilena tuwoNa (1:1–10:18). Yesu iti au mobambari Ngkorana Pue Ala i manusia. Meliu kamahilena tuwoNa hangko i malaeka hai hangko i nabi Musa (1:1–4:13). Iami Tadulako Mpenomba Mahilenta au meliu kamahilena tuwoNa hangko i tadulako mpenomba agama Yahudi (4:14–10:18). Batena pea Ia rara bona dosanta peisa teampungi hai peisake molambi katuwo maroa au bara mokahopoa.
Karompakana, iami: Ia moweihe lolita bona ineehe mokabaha pepoinalainda i Pue Yesu (10:19–13:25). Hangangaa mampopandirihe tauna au maroho pepoinalainda.
Ihi sura
1. Pue Yesu iami Anana Pue Ala au meliu kamahilena tuwoNa (1:1–10:18)
a. Pepongkana lolita (1:1-4)
b. Yesu meliu kamahilena tuwoNa hangko i malaeka (1:5–2:18)
c. Yesu meliu kamahilena tuwoNa hangko i nabi Musa (3:1–4:13)
d. Yesu meliu kamahilena tuwoNa hangko i tadulako mpenomba agama Yahudi (4:14–7:28)
e. Yesu meliu kamaroana pobagoNa hangko i pobagonda tadulako mpenomba agama Yahudi (8:1–10:18)
2. Ineeke mousuli hangko i pepoinalainta (10:19–12:29)
a. Inee tatende pepoinalainta (10:19-39)
b. Pepoinalai (11:1-3)
c. Pandirinda tauna au maroho pepoinalainda (11:4-40)
d. Mantahake i lalu kapari (12:1-17)
e. Pehadingi Ngkorana Pue Ala! (12:18-29)
3. Paturo kahopoana (13:1-25)