Kapatena Yesu mohuru dosanta hambela pea i hae-haena
10
1 Aturana Pue Ala au napahawe Musa mewali pandiri irikita kana i apa au ina mai. Hangko i Atura iti, bara mani taisa katuwo maroa au tahumba hangko i Kerisitu. Taita mewao-wao pea, bara lenggena ntepuu. Moula Aturana Musa iti, pare-parena tauna au mampeinao mohungkuki Pue Ala hangangaa moanti liliu popenombanda au himbela. Agaiana barahe peisa mewali manoto i peitana Pue Ala anti poantinda popenombanda. 2 Ane rapana tauna iti tebahoi mpuumi hangko i dosanda, kebarapohe ina moanti popenomba popoampungi dosa, lawi raisa dosanda teampungi hawe i hae-haena hai barapi ina mapari pekirinda anti kamadosanda. 3 Agaiana bara nodo. Hangko i popenombanda au raanti pare-parena, mokatuinao liliuhe kamadosanda. 4 Lawi wahe japi laki hai towau laki bara peisa moumpahi dosa.5-6 Ido hai pane i kahawena Kerisitu i dunia ide, Ia mouliangaa Pue Ala node:
“Bara Nuperapi popenomba,
hai bara Nuunde popenomba au rahuwe ba binata au rasambale
bona mohuru dosa tauna,
agaiana wataNgkumi au Nupasilolonga
bona mewali popenomba Irio au Nupokatana.
7 Ido hai kuuli: O Pue Ala, idemoNa
maiNa mobabehi peundeaMu,
nodo au teuki i lalu Sura Malelaha kana i wataNgku.”*
8 Nguru-nguruna nauli Kerisitu node: “Pue Ala bara mamperapi popenomba, hai barapi mounde popenomba au rahuwe ba binata au rasambale bona mohuru dosa,” nauri popenomba iti hintoto hai Aturana Pue Ala au nauki Musa. 9 Roo indo, Nauli mbuli, “IdemoNa Pue Ala, maiNa mobabehi peundeaMu.” Mewali, ada au hangkoia barapi Napokana Pue Ala, lawi arami tunggaiaNa au wou, itiri au Napokana. 10 Yesu Kerisitu mobabehi mpuumi peundeana Pue Ala: wataNa hambela pea Napopenomba i Pue Ala. Hai hangko i popenombaNa iti, Napamalelahamoke hawe i hae-haena.
11 Alo-alona ope-ope tadulako mpenomba agama Yahudi mampopolumaohe bagonda, hai mohuhu liliuhe popenomba au himbela, au bara peisa moumpahi dosa. 12 Agaiana Kerisitu, hambela pea mokira wataNa rapapate mohuru dosa manusia, hai popenombaNa iti barapi paraluu rahuleki hawe i hae-haena. Karoona mohuhu popenombaNa, mengkaoremi lao i suruga hai mohuda ntanda i koanana Pue Ala. 13 Ide-ide Kerisitu mampegia tempona Pue Ala mampopengkoru Iria ope-ope tauna au mampoiwali. 14 Mewali, anti kapateNa au hambela pea, Napamanotomoke i peitana Pue Ala hawe i hae-haena. Au ratunggai inde, iami ikita ope-ope au tanganta Napamalelaha.a
15 Paturo ide napakanotoa worimoke Inao Malelaha lawi i lalu Sura Malelaha, teuki node:
16 Nauli Pue Ala:
“Idemi podandiKu au wou
au ina Kubabehi hai ihira i alo-alo au ina mai.
HawaNgku ina Kuwoli i lalunda
hai Kuuki i lalu pekirinda.”
17 Roo indo, Nauli wori:
“Dosanda hai salanda barapi ina Kukatuinao.”*
18 Mewali, ane teampungi mpuu dosanta hai salanta, barapoke hangangaa moanti popenomba ntanina au mohuru dosanta.
Ineeke mousuli hangko i pepoinalainta
19 Halalu! Ane Tadulako Mpenomba Mahile hangkoia, peisahe mesua i lalu Hologa Malelaha Ntepuu lawi moantihe wahe binata. Nodo wori ikita: anti wahena Yesu i kapateNa, barapoke langa mohungkuki Pue Ala i paidaaNa au malelaha. 20 Ane mohungkuki Pue Ala, molumaoke i rara au wou. Rara iti au Nabungkahiake Yesu bona moantike i katuwo maroa. I lalu sou penombaa to Yahudi hangkoia, rindi bana mohomboki rara tauna bosa mesua i lalu Hologa Malelaha Ntepuu. Agaiana ikita, barapi ara au mohomboki raranta mohungkuki Pue Ala, lawi Yesu mobungkahiake rara i tempona mohuhu wataNa rapapate. 21 Yesumi au mewali Tadulako Mpenomba Mahilenta au mokadipura souna Pue Ala i suruga. 22 Lalunta Napamalelahami hai waheNa bona taisa kadanapi ara kamanawonta. Watanta rariu hai owai tanda kaNabahointa hangko i dosanta. Ido hai kuhuweki lalumi, halalu, bona mohungkukike Pue Ala hangko i lalunta mpuu hai hangko i pepoinalainta au maroho. 23 Hangangaa meharunga liliuke i Yesu, hai ineeke langa mopangaku kaIana Amputa, lawi Pue Ala mopabukei liliu dandiNa irikita. 24 Hangangaa mombekakamatake hai mombehuweki mpolaluke bona mombepokaahike hangko i lalunta mpuu hai mobabehi liliuke apa au maroa. 25 Ineeke mokaraohi pogulu-gulu i lalu penomba, nodo au rababehi tauna ntanina, agaiana hangangaa hirampu liliuke menomba bona peisake mombepakaroho mpolalu, pelumbunami i tempo ide, lawi taisa barapi mahae Pue ina hawemi.
26 Lawi ane mohadimoke hai moisamoke Ngkora Marasa au hangko i Pue, hai roo indo taoaka mobabehi liliu dosa, barapi ara popenomba ntanina au peisa mohuru dosanta. 27 Barapi ara au peisa taharunga, batena pearai karumpuna Pue hai api pehukuNa au rumihi, au ina mopapumpu hinangka iwaliNa. 28 Hangkoia ane ara hadua tauna au mosapuaka Aturana Musa hai arahe rodua ba talu tauna au mosabiki katouna kamasalana, bara ara ampungiana, batena rahuku mate. 29 Ane tauna au mosapuaka Aturana Musa nodo karahukuna, pelumbunami tauna au mokabaha pepoinalainda i Yesu! Tauna iti moihe-ihehe Anana Pue Ala, lawi rauli bara ara pobunduana wahena Yesu au mopakaroho dandina Pue Ala hai au mopamalelahahe. Mopakoimohe Inao Malelaha au naweike Pue Ala hangko i kabulana laluNa. 30 Mewali, inee mpuu takabaha pepoinalainta halalu, lawi taisa Pue Ala au manguli:
“Iko au makuasa mehurungi,
Iko au makuasa mehuku.”
Hai teuki wori:
“Pue ina mobotusi kara-karanda taunaNa.”
31 Melangaki mpuu, ane nahukuke Pue Ala au tuwo.
32 Nikatuinao, halalu, noumba katuwomi hangkoia i pepongkami mepoinalai i Pue Yesu. I tempo iti, narumpakau ngkaia kapari anti peulami i Pue. Agaiana nauri nodo, barakau mousuli; mia-mia maroho liliu pepoinalaimi. 33 Hambela-hambela rakakabosaikau hai rapopeahi-ahikau i lindonda tauna bosa; ara tempona mantodiha sambela worikau hai rangami au rapopeahi-ahihe. 34 Maahi lalumi i tauna au ratarunggu anti peulanda i Pue Yesu. Ane anu-anumi rarampaki, bara nipokaehua. Agaiana batemi matana, lawi niisa kaarana au rapasilolongaakau i suruga au meliu kamaroana hai au bara mokahopoa.
35 Mewali, inee mpuu nikabaha pepoinalaimi iti, lawi ane mepoinalai liliukau, ina mahile mpuu hurungina au nihumba. 36 Kehapiri apa pea au mewali, hangangaa mantahake. Nipeulai liliu peundeana Pue Ala hai ina molambikau apa au Nadandiakau. 37 Barapi mahae, ina tepabukei Ngkorana Pue Ala au manguli:
“Au ina mai batena mai,
KahaweNa bara ina molia-lia.
38 Tauna au manoto i peitaNgku ina
molambihe katuwo maroa hangko i pepoinalainda.
Agaiana ane arahe au mousuli hangko i pepoinalainda,
barahe Kupokana.”*
39 Agaiana ikita ide, halalu, barake tauna au mousuli hangko i pepoinalainta, hai au ina rahuku. Ikita ide, tauna au mepoinalai hai au molambi katuwo maroa.