4
1 Mewali, dandina Pue Ala irikita iti bona peisake molambi pengkarooangaa hihimbela hai Ia, ara mani. Ido hai hangangaa mainga-inga mpuuke bona dati ara hadua hangko i olonta au bara molambi apa au Nadandi iti. 2 Lawi ikita ide, rapahawea worimoke Ngkora Marasa, nodo to Yahudi hangkoia. Agaiana Ngkora Marasa iti bara moanti pewati irihira, lawi rahadi mbero pea, bara rapoinalai. 3 Batena pea ikita au mepoinalai au molambi pengkarooangaa hihimbela hai Pue Ala. Ane tauna au bara mepoinalai, barahe molambi apa au Nadandi. Taisa iti hangko i Ngkorana Pue Ala inona au manguli:“RumpuNa hai mosumpaNa, Kuuli:
Barahe ina mesua i pengkarooangaa au Kupasilolongami.”*
Pue Ala mololita nodo, kehapiri pengkarooangaa iti walimi Nababehi hungka i pewalina dunia ide. 4 Ara teuki i lalu Sura Malelaha au mokabelai alo kapitu, node:
“I alo kapitu, Pue Ala mengkaroo hangko i ope-ope bagoNa.”*
5 Hai idemi Ngkorana Pue Ala au tahadi inona:
“Barahe ina mesua i pengkarooangaa au Kupasilolongami.”
6 Ihira au nguru-nguruna mohadi Ngkora, barahe molambi pengkarooangaa hihimbela hai Pue Ala, lawi barahe moula hawaNa. Agaiana tunggaiana Pue Ala, hangangaa ara tauna au molambi pengkarooangaa iti. 7 Ido hai Pue Ala mopakanoto alo ntanina bona manusia peisa molambi pengkarooangaa hihimbela hai Ia. Alo au Napakanoto iami au rauli “alo ide” halalu, lawi i alo iti mohadimoke Ngkora Marasa. Bahangkia atuna parena roo nabi Musa, Datu Daudi mouki Ngkorana Pue Ala au tahadi inona au manguli:
“Alo ide, ane mohadikau wotuna Pue Ala,
inee nipamatua lalumi.”*
8 Hangkoia, Yosua moantihe to Yahudi mesua i tampo Kanaa au nadandiahe Pue Ala. Agaiana bara iti pea au rauli pengkarooangaa hihimbela hai Pue Ala. Ane keiti pea au rauli pengkarooangaa hihimbela hai Pue Ala, moapari pane ara lolitana Pue Ala au mokabelai alo ntanina? 9 Mewali, ara mani katepaka i taunana Pue Ala bona molambihe pengkarooangaa hihimbela hai Ia. Pengkarooangaa iti, nodo pengkarooangaana Pue Ala i alo kapitu. 10 Lawi ane mengkarooke hihimbela hai Pue Ala, lempona, mengkaroo worike hangko i bagonta nodo Pue Ala mengkaroo hangko i bagoNa i alo kapituna. 11 Mewali halalu, hangangaa tapari-pari molambi pengkarooangaa hihimbela hai Pue Ala bona datike ara au mousuli hangko i pepoinalainta, nodo to Yahudi hangkoia au bara moula hawaNa.
12 Lawi Ngkorana Pue Ala iami lolita au tuwo hai au makuasa. Meliu kamataruna hangko i piho au momata mpotimali. Piho peisa mebelai hawe i leho-leho buu hai ati buu. Nodo wori NgkoraNa Pue Ala metohu hawe i lalunta. Ngkora iti napake Pue Ala moparesa pekirinta hai tunggaiana lalunta. 13 Bara ara hampaka au tewuni i peitaNa. Hinangkana au ara tepambole hai tongawa Iria. Hai Iria hangangaa tapangaku ope-ope babehianta.
Yesu iami Tadulako Mpenomba Mahile au motulungike i lalu katuwonta
14 Mewali, ara irikita hadua Tadulako Mpenomba Mahile au meliu kamahilena tuwoNa: iami Yesu Anana Pue Ala, au mengkaoremi mesua i suruga hai lao i lindona Pue Ala. Ido hai hangangaa tapakaroho pepoinalainta hai tapangaku liliu kaYesuna Amputa. 15 Lawi Tadulako Mpenomba Mahilenta iti moisa kamaledenta. Naisa ntepuu, lawi Ia rakelo worimi i hinangkana nodo ikita, agaiana Ia bara madosa. 16 Ido hai halalu, ineemoke langa. Peisamoke mohungkuki Pue Ala i kadera kadatuaNa au i suruga bona modokoke kamaahiNa, hai Natulungike hangko i kabulana laluNa i tempona au taparaluu.