Pobagona Yesu rapandiri nodo pobagona Tadulako Mpenomba Mahile agama Yahudi
5
1 Ope-ope Tadulako Mpenomba Mahile rapilei hangko i tauna biasa, hai raangka mampopolumao bagona Pue Ala. Tadulako mpenomba mahile iami hadua tadulako agama au lao i lindona Pue Ala moanti kara-karanda tauna bosa. Bagona, mosambale binata mohuru dosanda tauna bosa hai mohuhu popenomba au ntanina i Pue Ala. 2 Tadulako mpenomba mahile, manusia biasa, hai batena ngkaia wori kamaledena. Ido hai naisa mopamaalusu babehiana mokadipura tauna au bara mani manoto lalunda hai bara manihe moula rara au tou. 3 Anti kamaledena, Tadulako Mpenomba Mahile bara pea mohuhu popenomba mohuru dosanda tauna bosa, agaiana popenomba iti mohuru wori dosana haduduana. 4 Hai bara ara tauna au moangka watana haduduana mewali Tadulako Mpenomba Mahile. Tauna au mewali Tadulako Mpenomba Mahile, naangka pea Pue Ala au mokakio i bago iti, nodo au mewali hangkoia i Haruni.a5 Nodo wori Kerisitu, bara mengkaiwongko, hai bara moangka wataNa haduduaNa mewali Tadulako Mpenomba Mahile agaiana Pue Ala haduduaNa au moangka, Nauliangaa:
“Oiomi AnaNgku,
Alo ide KupoanamoKo.”*
6 Hai i lalu Sura Malelaha, nauli wori Pue Ala i AnaNa:
“Oiomi Tadulako Mpenomba i hae-haena
au mopaliliu bagona Melkisedek.”b
7 I tempona mani Yesu tuwo i lalu dunia ide, Ia meraroa hai moteria, mekakae hai mohowara pamperapiNa i Pue Ala au makuasa mokabaha hangko i kapate. Agaiana Yesu bara moula peundeaNa haduduaNa, batena mengkoru i peundeana Pue Ala. Ido hai Pue Ala mampehadingi pamperapiNa. 8 Nauri Ia Anana Pue Ala, Ia molambi wori kapari, hai i lalu kapari iti, Ia mampegurui noumba rara mengkoru i Pue Ala. 9 Hai anti pengkoruNa, Yesu mewali Topehompo au bara ara kamakuraNa, hai Ia mowei ope-ope tauna au mengkoru Iria katuwo maroa au bara mokahopoa. 10 Hai Yesu naangka Pue Ala mewali Tadulako Mpenomba Mahile nodo Melkisedek.
Ineeke mousuli hangko i pepoinalainta
11 Halalu, katouana, ngkaia mani au kupeinao kuuliangaakau kana i Yesu hai Melkisedek, agaiana mapari mopakanotoakau ope-ope iti, lawi mengkantulikau. Bara niunde mohadi paturongku. 12 Katouana kemewalimokau guru i Ngkorana Pue lawi mahaemokau meula i Pue Yesu. Agaiana mampopepaguru manikau i tauna ntanina, lawi bara manikau moisa patoa paturona Pue Ala. Mogalori paturo au mamura, bara mani nipeulai maroa, apa mani paturo au mapari! Nodo manikau analei au bara mani rabuku moande paande au matua, mentomi mani peahe. 13 Mewali hema au mentomi mani, analei mani. Lempona, bara mani manoto lalunda mampopontani apa au tou hai apa au sala. 14 Agaiana paande au matua, kiranda tauna au mangisaami; lempona, tauna au manginaomi mampopontani au maroa hai au kadake.