6
1 Mewali, halalu, barapokau kipagurua patoa paturo kana i Kerisitu. Agaiana hangangaa kipahaweamokau paturo kaliliuana bona manoto lalumi hai pekirimi. Ineeke mesule-sule i paturo au nguru-nguruna. Tauna au hangko mewali to Sarani hangangaa rapaturo bona menosohe hangko i babehianda au kadake hai mepoinalaihe i Pue Ala. 2 Hangangaa rapaturoahe kana i periu, noumba tadulako agama moona taienda i tanoananda tauna au rawati, karapatuwo hulenda tomate, hai pehukuna Pue Ala au bara mokahopoa. Paturo iti tou, agaiana ineemi rahuhuleki. 3 Agina mampololitake paturo kaliliuana, ane napatepaka manike Pue Ala.4 Lawi tauna au raoaka mousuli hangko i pepoinalainda, barapohe peisa ranini hule bona menosohe hangko i dosanda. Lawi hangkoia, maidahe i lalu kamabaa, matana lalunda modoko pewatina Pue Ala, hai lalunda nakuasai Inao Malelaha; 5 moisa mpuuhe kamaroana Ngkorana Pue Ala hai kuasana Pue Ala au ina tongawa i alo-alo au ina mai. 6 Mewali ane roo indo, raoaka mousuli hangko i pepoinalainda, barapohe peisa ranini hule bona menosohe hangko i dosanda. Anti posapuakanda Pue Yesu, himbela peahe mopaku hule Anana Pue Ala hai rakakabosai i lindonda tauna bosa. 7 Tauna au mepoinalai i Pue Ala, nodohe tampo au paka naudahi hai au nakatuwoi tuda-tuda au mobundu i topobonde. Tampo iti ina nawati Pue Ala 8 Agaiana ane tampo iti nakatuwoi hule dana hai dui, barapi ara pobunduana, mewali ina ragane hai kahopoana ina rahuwe. Nodo wori tauna au mousuli hangko i pepoinalainda ina nahukuhe Pue Ala.
9 Agaiana ikamu halalu au kipokaahi, nauri nodo lolitangki, kiisa barakau nodo tampo au nagane Pue Ala. Kiisa kaarana wuami au meliu kamaroana, itimi pepoinalaimi hai babehiami au hintoto i tauna au molambi katehorema hangko i Pue Ala. 10 Pue Ala batena manoto. Bagomi au nipobagomi hangko i lalumi au buke ahi bara ina naliu inaoNa. Manoto nipokaahi Pue Ala, lawi bosami belana motulungikau halalumi hampepepoinalai, maroa i tempo au liu, maroa ide-ide. 11 Agaiana kiperapi mpuu halalu, bona nipari-pari mopaliliu babehia iti duuna i kahopoana, bona mohumba mpuukau apa au niharunga hangko i Pue Ala. 12 Ineekau ara au lohe mampeulai peundeana Pue Ala. Niala pandiri i tauna au mepoinalai i Pue Ala hai au sabarahe mampegia apa au Nadandiahe.
Dandina Pue Ala bara tebali
13 Hangkoia Pue Ala mopahawe dandiNa i Burahima i lalu hangaNa haduduaNa, lawi bara ara au meliu kamahilena tuwona hangko Iria. Ia mosumpa, Nauli,
14 “Ina Kupopewali apa au Kudandiako ide:
Ina Kuwatiko hai
Kupangkaia pemuleamu
duuna bosa ntepuuhe.”
15 Burahima mepoinalai liliu i Pue Ala duuna molambi apa au Nadandia Pue Ala.
16 Ane pandirina ara hadua tauna au mosumpa, ia hangangaa mokabelai hanga au meliu kamahilena tuwona hangko iria. Sumpana iti mopakaroho lolitana dati ara au bai mosapuaka. 17 Nodo wori Pue Ala: i popahaweNa dandiNa i Burahima hai i ope-ope tauna au ina modoko dandi iti, Napeinao mopakaroho lalunda bona raisa kadana tebali tunggaiaNa irihira. Ido hai Napakaroho mbuli dandiNa hai posumpaNa. 18 Ane Pue Ala mopahawe dandiNa, bara modongko. Nodo wori ane Ia mohowara sumpaNa, bara modongko. Lolita au rompaka iti bara ara katebaliana. Pue Ala modandi hai mosumpa bona maroho lalunta. Hai ikita ide, mopalehimoke katuwonta hai dosanta hangkoia bona tapegia apa au Nadandiake. 19 Peharunganta ide nodo besi pantio kapala tahi au mewali pekingkiata au maroho bona dati marugi pepoinalainta. I lalu Souna Pue Ala, ara rindi bana au mohomboki rara manusia datihe peisa mesua i lalu Hologa au Malelaha Ntepuu. Agaiana ikita, barapi ara au mohomboki raranta hawe i lindona Pue Ala. 20 Barake langa hawe i lindoNa, lawi Yesu moiorumi mesua inditi, mobungkahiake rara bona taula. Yesu, au mopaliliu bagona Melkisedek, mewali Tadulako Mpenomba Mahilenta hawe i hae-haena.