Yesu meliu kamahilena tuwoNa hangko i nabi Musa
3
1 Halalu-halalu au mewali taunana Pue Ala au Nakakio mesua i suruga, nipailalu kahemana Yesu. Ia tuduana Pue Ala hai Tadulako Mpenomba Mahile au tapoinalai. 2 Yesu matundu mampopolumao bago au Natudua Pue Ala. Nodo Musa hangkoia matundu mampopolumao bagona mokadipura souna Pue Ala; lempona, mokadipura taunana Pue Ala. 3 Agaiana Yesu hintoto molambi pebila au meliu hangko i Musa, lawi tauna au moaro sou hangangaa meliu karabilana hangko i sou au naaro. 4 Ope-ope sou, batena ara au moaro. Agaiana Pue Ala moaro hinangkana. 5 Musa matundu mampopolumao bagona i souna Pue Ala nodo hadua topobago mampobagoa ampuna, hai mosabi kana i apa au ina napahawe Pue Ala. 6 Agaiana Kerisitu, bara pea topobago. Ia Anana Pue Ala au matundu mampopolumao bagoNa nodo hadua tadulako au mokadipura ope-ope ihi souna Pue Ala. Ihi souna Pue Ala iti, ikita idemi, asala maroho liliu pepoinalainta hai meharunga liliuke i Pue Yesu duuna i kahopoana.Inee tapamatua lalunta i pekakiona Pue Ala
7 Mewali, halalu, hangangaa nipehadingi maroa paturona Inao Malelaha au teuki i lalu Sura Malelaha node:
“Alo ide ane mohadikau wotuna Pue,
8 inee nipamatua lalumi
nodo toiorumi hangkoia meewa i Pue
i temponda mampetandaka kasabarana Pue i pada wungi.
9 I tempo iti toiorumi mampetandakaNa,
nauri moitamohe hinangka tanda kuasa
au Kubabehiahe i lalu iba pulona parena.
10 Ido hai malutamoNa irihira,
hai mololitaNa, Kuuli, ‘Ihira ide tauna au matua lalunda,
hai barahe mampeulai hinangka aturaNgku.
11 RumpuNa hai mosumpaNa, Kuuli:
Barahe ina mesua i pengkarooangaa au Kupasilolongami.’ ”*
12 Halalu! Maroa-roakau, datikau ara au kadake lalumi. Ineekau nodo toiorumi iti au mopalehi pepoinalainda i Pue Ala au tuwo! 13 Agina mombepakaroho mpolalukau alo-alona, datikau ara au rapakanawo duuna matua lalumi. Mombepakaroho mpolalukau liami mani tuwo i tempo au rahanga “alo ide,” lempona ara mani katepakami. 14 Lawi ikita ide mohintuwu hai Kerisitu, asala apa au tapoinalai hangko i nguru-nguruna takingki liliu hangko i lalunta au bara bata-bata duuna i kahopoana. 15 Inee naliu inaonta apa au tabasa inona au teuki node:
“Alo ide ane mohadikau wotuna Pue,
inee nipamatua lalumi
nodo toiorumi hangkoia meewa i Pue.”*
16 Hemahe au mohadi wotuna Pue Ala, hai kahopoana meewahe? Bara pae to Isaraeli au naantihe nabi Musa mesuwu hangko i tampo Masiri? 17 Hai hemahe au mopaara karumpuna Pue Ala i lalu iba pulona parena? Bara pae to Isaraeli au matehe i pada wungi anti kangkaiana dosanda? 18 Hai ihira itimi au natunggai Pue Ala i lalu sumpaNa au node: “Barahe peisa molambi pengkarooangaa hihimbela hai Iko.” Barahe Napaliu molambi pengkarooangaa iti, lawi barahe moula hawaNa. 19 Mewali, taisa: barahe peisa molambi pengkarooangaa hihimbela hai Pue Ala lawi barahe mepoinalai Iria.