Surana Suro Paulu i
Pilemo
1
1 Sura ide hangko iriko Paulu, au ratarunggu anti pobagongku mopahawe bambari kana i Kerisitu Yesu, hai hangko i Timotiu, halalunta hampepepoinalai. Kipakatu sura ide irio Pilemo, halalungki hampopobago au kipokaahi. 2 Kipakatu wori i Apia, halalungki towawine au kipokaahi, hai i Arkipus, halalungki au hampopobago, hai i ope-ope jumaa au moguluhe i soumi. 3 Tabea: kiharunga Pue Ala Umanta hai Pue Yesu Kerisitu ina mowatikau hai moweikau roa ngkatuwo.Paulu motoia Pilemo anti kamahilena ahina hai kamarohona pepoinalaina
4 I lalu pekakaengku, kukabelai liliuko halalu, hai kuuli ngkaia kamaroana i Pue Ala. 5 Lawi kuhadimi bambari au manguli noumba kamarohona pepoinalaimu i Pue Yesu hai kamahilena ahimu i ope-ope to Sarani. 6 Mekakaena bona hangko i pohalalunta i lalu hangana Pue Yesu ina tetambai kapandeta moisa ope-ope pewati au maroa au tahumba anti pohintuwuta hai Kerisitu. 7 Halalungku, Matana mpuuna hai tepalindo lalungku anti kamahilena ahimu iti, lawi oio au mopakaroho lalunda ope-ope tauna au mepoinalai i Pue Yesu.
Pamperapina Paulu i Pilemo kana i Onesimus
8 Halalungku Pilemo! Katouana, peisako kuparentai mobabehi apa au hintoto, lawi naweina Kerisitu kuasa. 9 Agaiana kukatuinao kamahilena ahimu, ido hai barako kuparentai. Kupahawe pea pamperapiku irio. Iko Paulu, hadua tosae au tangangku ratarunggu anti pobagongku i Kerisitu Yesu, 10 hai kuperapi bona nudoko maroa woia ide anangku, Onesimus. Kupoanami, lawi tangangku ratarunggu inde, iko au mopaguru bona mepoinalai i Pue Yesu. 11 Ane hangkoia, ia barapi mobundu irio Pilemo [lawi melangka hangko irio]. Agaiana ide-ide, ia mobundu mpuu, maroa irio maroa iriko.
12 Mewali ide-ide, anangku au kupokaahi ide, kutudu mesule hule irio. 13 Ane moula pea peundeaku, kekutaha mani inde hihimbela hai iko, lawi kuimbami pahurumu au motulungina tangangku ratarunggu anti pobagongku mobambari Ngkora Marasa. 14 Agaiana bara turu inaongku motaha inde ane bara mani himbela pekirinta. Peundeaku bona apa au nubabehi, nubabehi mpuu hangko i lalumu. Barako kupari-paria moula peundeaku. 15 Babila hangko i pegaakina sangka ide, naporara Pue bona ia peisa mesule irio hawe i hae-haena. 16 Hai Onesimus iti, ineemi nuimba hawimu lawi melumbu tuwona hangko i kahawina. Ide-ide hangangaa nuimbami halalumu hampepepoinalai au nupokaahi. Ane iko maahina iria, apa mani oio. Hangangaa nupokaahi lawi ia hangka manusiamu hai halalumu i lalu Pue Yesu.
17 Mewali, ane nuimbana halalumu hampepepoinalai, kuperapi bona nudoko hule Onesimus nodo kanudokongku. 18 Ane ara salana ba indana irio, ikorai au mohalea, 19 hai au teuki ide, iko haduduangku au mouki: iko Paulu ina mobaiari ope-ope indana. (Barako paraluu kupopaingaa kaikona au mopahaweako Ngkora Marasa. Mewali, anti kamolambimu katuwo maroa, moinda woriko iriko.)
20 Halalu, anti pohintuwuta hai Pue, kuperapi bona nupeulai wongkoia pamperapiku ide. Anti pohalalunta i lalu Kerisitu, nudoko hulemi Onesimus bona matana lalungku. 21 Moukina sura ide, lawi kupoinalai kaina nubabehiana apa au kuperapi. Hai kupoinalai apa au nubabehi batena melumbu hangko i apa au kuperapi.
22 Hai kuperapi wori bona nupasilolongaana haogu lincu i soumu, lawi kuharunga Pue Ala ina mohanai pekakaemi bona tekabahana hangko i tarunggu ide, alana peisakau kusondaki.
Tabea
23 Epafras, au ara hihimbela hai iko i lalu tarunggu anti pobagona mopahawe bambari kana i Kerisitu Yesu, mopakatu wori tabeana irikamu. 24 Tabeanda wori halalungku au hampopobago, iami Markus, Aristarkus, Demas hai Lukasi. 25 Amputa Yesu Kerisitu mowatikau ope-ope.
Hangko iriko
PAULU