Sura au rapakatu i hantobu toSarani au rahangahe to
Ibarani
Ngkorana Pue Ala au napahaweake AnaNa
1
1 Hangkoia, bosa belana Pue Ala mongkora i toiorunta. LolitaNa rapahawe nabi-nabi, hai ngkaia pakana rara Napake mopaturohe toiorunta. 2 Agaiana i alo-alo au ina hawe hangko damani alo pebotusi i kahopoa dunia, lolitana Pue Ala napahaweake AnaNa. Hai AnaNa itimi au Napopatoa mampopewali dunia hai hinangka ihina. Iami au Napakanoto Pue Ala mampoampu hinangkana au ara. 3 Hangko Iria tongawa peawana tuwona Pue Ala. Hangko i Yesu moitake poantina hai kuasana Pue Ala. Ia au mokadipura hinangkana au ara hai lolitaNa au makuasa. Ia au mohuhu wataNa rapapate bona mobahoi manusia hangko i dosanda. Hai roo indo, mengkaoremi lao i suruga mohuda ntanda i koanana Pue Ala i lalu poparentaNa. 4 Ia molambi kuasa hai pebila au meliu hangko i ope-ope malaeka, lawi hangaNa au nawei Pue Ala meliu katebilana pane hanga au raweihe malaeka.Yesu meliu kamahilena tuwoNa hangko i malaeka
5 I malaeka, Pue Ala bara hambela mopahawe lolita ide:
“Oiomi AnaNgku,
Alo ide KupoanamoKo.”*
Hai Pue Ala bara wori mololita i hadua malaeka node:
“Iko ina NapoumaNa,
hai Ia ina Kupoana.”*
6 I tempona Pue Ala motudu AnaNa au haduduana mai i dunia, node lolitaNa:
“Ope-ope malaekaNgku hangangaa menombahe Iria.”*
7 Hai idemi au napahawe Pue Ala kana i malaeka:
“Pue Ala mopakanoto bagona malaekaNa.
Malaeka iti topekadipuraNa
au rapandiri nodo himburu hai rore api.”*
8 Agaiana Pue Ala mampololita kana i AnaNa, nauli node:
“Oio Pue Ala, kadatuamu bara mokahopoa;
Oio moparenta i lalu kahintimba.
9 MoundeKo kanoto
hai mokahihiKo dake.
Idomi hai natawiKo Pue Ala au Nupenombai,
hai lana
tanda kaNapileiMu,
au melumbu hangko i himadaMuhe.”*
10 Nauli wori node:
“O Pue, hangkoia Nuhuami arii dunia,
langi Nubabehimi hai taieMu.
11 Ope-ope iti ina tuna, agaiana batenaKo ara liliu;
ope-ope iti ina maluso nodo hampi.
12 Hambela tempo ina Nuromo hai Nutende.
Ina Nupahuru hai dunia au wou.
Agaiana Oio mia-mia peaKo,
katuwoMu bara ina mokahopoa.”*
13 Bara hambela Pue Ala mololita i malaeka nodo au Napahawe i AnaNa, node:
“MohudamoKo ntanda i koanaNgku,
duuna Kupopengkoruhe
ope-ope iwaliMu Irio”*
14 Bara hambela, lawi malaeka iti topobagoNa peahe Pue Ala au Natudu motulungi hai mokadipura tauna au ina molambi katehorema.