Paturo Kahopoana
13
1 Mombepokaahi liliukau hadua hai hadua nodo topohalalu. 2 Hangangaa nipopehupehe tauna au moliu i soumi, lawi bara niisa mole malaekatohe pae. Lawi arahe au mampopehupe tauna au moliu i sounda, rapehangu manusia, mole malaekari!3 Hangangaa mokatuinaokau rangami au i lalu tarunggu. Hangangaa nihalea kaparinda nodo worikau ratarunggu hihimbela hai ihira. Hai nitulungihe tauna au rapopeahi-ahi anti pepoinalainda. Hangangaa nihalea kamaparinda nodo worikau au rapopeahi-ahi hihimbela hai ihira.
4 Ope-ope tauna hangangaa mampeulai ada posamboko. Ada iti inee nilingkai. Lawi tauna au mebualosi hai au mobabehi babehia merikai, batenda ina nahuku Pue Ala.
5 Inee worikau mohaoki liliu doi. Nipokatana apa au ara irikamu. Lawi ara lolitana Pue Ala au manguli:
“Barako Kupalehi,
hai barako Kukabaha.”
6 Ido hai maroho lalunta, hai tauli:
“Pue motulungina, barana langa.
Bara kupokalanga apa au rababehiana tauna.”*
7 Hangangaa nikatuinao liliuhe tadulakomi au mopahaweamokau Ngkorana Pue Ala. Nipeita noumba tuwonda hawe i kapatenda, hai nipeulai pepoinalainda. 8 Yesu Kerisitu bara tebaliki; Ia himbela pea hangkoia, ide-ide, hawe i hae-haena.
9 Mewali ineekau mampeulai paturo wou au mepakanawo hai au mosisala hai pepoinalainta, nodo ada hai palia i paande. Lawi ada iti bara moanti katuwo maroa. Aginami tapakaroho lalunta hangko i kabulana laluna Pue Ala, lawi iti au moanti katuwo maroa irikita. 10 Irikita, ara au meliu kamaroana hangko i ada agama Yahudi. Irikita, arami popenombata au mohompo salanta, hai tadulako mpenomba au mampeulai ada agama Yahudi barahe molambi kiranda hangko i popenombata iti.a 11 Hangkoia ane hambaa binata rasambale mohuru dosa, wahena naanti Tadulako Mpenomba Mahile i lalu Hologa Malelaha Ntepuu, agaiana watana raanti lao i raoa wanua hai rahuwe duuna mewali awu. 12 Nodo wori Yesu raanti lao i raoa babaka wanua hai rapapate bona waheNa mopamalelaha tauna bosa. 13 Mewali halalu, nodo Yesu au raanti lao i raoa wanua bona rakakabosai tauna, ikita wori hangangaa mokabahake hinangka au hangko i dunia ide, hai meula peake i Yesu, kehapirike rakakabosai. 14 Lawi i lalu dunia ide, bara ara paidaa roonta; Mohaokike paidaa au ina mai.
15 Mewali, halalu, anti kanatulunginta Yesu, hangangaa mohuhu liliuke popenombata i Pue Ala. Popenombata iti, lempona petoianta au mampomahile hangaNa. 16 Ineekau mokabaha babehiami au maroa. Hangangaa motulungikau rangami, lawi itimi popenomba au napokatana Pue Ala.
17 Nipeulaimi hawanda tadulakomi hai mengkorukau irihira. Lawi ihira au mokadipura katuwomi, hai au hangangaa mohanaihe Pue Ala kana i pobagonda. Nipeulai hawanda bona matanahe mobago. Ane bara nipeulai hawanda, ina masusa lalunda, hai ane nodo barapi ina ara pobunduana irikamu.
18 Kiperapi bona nipekakaea liliungkai. Kiisa kabulana lalungki, lawi i paka-pakana kipeinao mobabehi liliu au manoto. 19 Kuperapi mpuu bona nipekakaea wongkoia bona holigana mesule irikamu.
Kahopoa sura
20 Mekakaena i Pue Ala, pongka roa ngkatuwo au mopakaroho podandiNa au mopahintuwuke hai Ia hawe i hae-haena, melempo i wahena Amputa Yesu au rapapate hai au Napatuwo hule hangko i kapate, hai Naangka mewali Toporewu au meliu kamaroana irikita dimbaNa. 21 Kuperapi bona handa kaNaparewaimi i hinangkana au maroa bona peisakau mobabehi peundeaNa. Kuperapi bona anti pohintuwuta hai Yesu Kerisitu, Pue Ala mobago i lalunta bona Napokatana mpuuke. Tatoiami Pue Yesu hawe i hae-haena. Amin.
22 Halalu-halalu, kuperapi bona nipehadingi maroa-roa ide paturongku, nauri ihi surangku ide sosoe pea.
23 Bona niisa wori: halalunta Timotiu rakabahami hangko i tarunggu. Ane polo hawe inde, kuporanga lao mosondakikau.