Mepoinalai liliuke, mantahake i lalu kapari
12
1 Halalu! Peisa tauli: ope-ope tauna au maroho pepoinalainda iti motolelikike hai mosabiki katuwonta. Ido hai kuhuweki lalunta bona tatende ope-ope au doko mohomboki raranta meula i Pue. Ikita ide nodo tauna au momberiri. Hangangaa tatende dosanta au montimihike, hai mantahake moula rara au napakanotoake Pue Ala. 2 Hangangaa mokamatake Yesu au mobungkahimi rara pepoinalainta hai au mopahandai pepoinalainta. Lawi Ia mantaha liliu i lalu kapari duuna mate i kau mombehape. KapateNa iti mepakaea ntepuu. Agaiana nauri nodo, bara Napailalu, Nahuhu pea wataNa rapaku i kau mombehape, lawi Napeinao molambi katana i bokona. Ide-ide mohudami ntanda i koanana kadera kadatuana Pue Ala i suruga.3 Nipeita halalu noumba kamaparina Yesu molindo tauna kadake au mosapuaka wataNa, hai kahopoana Ia rapapate. Mewali halalu, hangangaa nipekiri liliu noumba kamantahana Yesu i lalu kapari bona datikau malede hai masusa lalumi. 4 Lawi ikamu raewa worikau tauna au kadake, agaiana i lalu pombealami moewa dosa, bara manikau rapapate nodo Yesu. 5 Hai inee naliu inaomi paturona Pue Ala irikamu anaNa, au manguli,
“Anangku, nipailalu maroa paturona Pue,
hai inee koi inaomi ane Nakambaroakau.
6 Lawi Pue Ala mokambaroa ope-ope tauna au Napokaahi,
hai mokarumpui ope-ope tauna au Napoana.”*
7 Ane molambikau kapari, hangangaa mantahakau. Niimba peami paturo ba pekambaroa hangko i Umami au i suruga. Pue Ala mopaturokau nodo hadua uma mopaturo hai mokambaroa anana. Lawi bara ara anangkoi au bara nakambaroa umana. 8 Ope-ope tauna au napoana Pue Ala, batena Nakambaroa. Mewali, ane rapana barakau nakambaroa Pue Ala, lempona barakau Napoana. 9 Ikita ope-ope rakambaroamoke umanta i dunia, hai tabilahe. Apa mani Umanta au Ampu inaonta. Ane Nakambaroake, hangangaa mengkoru mpuuke alana molambike katuwo maroa. 10 Tosaenta i dunia mopaturoke bahangkia pea parena kamahaena. Paturonda iti, ara hokana, lawi raweike lolita moula apa au maroa i peitanda. Agaiana Pue Ala mopaturoke bona molambike apa au maroa bona malelahake nodo Ia. 11 Tanganta rapaturo ba rakambaroa, mapari lalunta. Agaiana ane paturo iti tapeulai, maroa katuwonta, hai manoto babehianta.
12 Ido hai ineekau mampomalea mampopolumao babehia au maroa. Nipakaroho pepoinalaimi au malede. 13 Hangangaa nipakaroho peulami i Pue bona ane ara mani i olomi au bata-bata lalunda, barahe ina manawo, agaiana kamaroho-rohoari pepoinalainda.a
14 Hangangaa nipari-pari mohintuwu hai ope-ope tauna. Nipari-pari wori bona malelaha tuwomi, lawi tauna au bara malelaha tuwona bara ina moita Pue. 15 Mainga-ingakau dati ara rangami au mousuli hangko i Pue Ala hai mosapuaka ahiNa. Maroa-roakau datihe ara tauna au hawe mewali rasu i olomi, hai kahopoana mopakarugi pohintuwumi alana bosa tauna teanti i lalu dosa. 16 Nipamaroa-roa babehiami bona datikau ara au mebualosi ba mobabehi babehia au merikai. Ineekau ara au bara meula i peundeana Pue Ala nodo Esau hangkoia, lawi ia bara moholoi pewatina Pue Ala hangko i katowutuna. Kirana au katouana nahumba hangko i umana anti katowutuna, napobaluri i adina, naintolohi pea hai hantabo paande. 17 Niisato noumba tuntukana. Roo indo, Esau mampeinao molambi hule pewati iti hangko i umana, agaiana barapi rawei. Nauri moteria mamperapi pewati iti, barapi ara rara mopakaroa kanawoana.
Hangangaa mampehadingike Ngkorana Pue Ala
18 Halalu, ide-ide ane mohungkukikau Pue Ala bara himbela hai to Isaraeli. Hangkoia Pue Ala mongkora i to Isaraeli hangko i Bulu Sinai i kaNaweinda AturaNa. Bulu iti, bulu biasa au peisa rapetobo. Tanganda to Isaraeli molindo bulu iti, moitamohe api au lolaa, rambu, gawu au makaindi, hai himburu kebuu. 19-20 Mohadimohe pomoni tatamburu au maoni hai ara wori hambua wotu au mololita irihira masisimbuku, Nauli, “Apa pea au moiho bulu ide hangangaa rawatui duuna mate, maroa binata ba tauna.” I temponda mohadi lolitana Pue Ala, langamohe hai rauli, “Kiperapi bona wotu iti ineemi mololita irikami, lawi langa wongkamia.” 21 Apa au ralindo to Isaraeli iti mewulungai mpuu. Mogalori Musa, nauli wori, “Langana hai moradana.”
22 Halalu, barakau mohungkuki bulu au nodo. Agaiana ide-ide molindomokau Bulu Sion hai wanua Yerusale au i suruga, au napaidai Pue Ala au tuwo. Molindokau isabuna malaeka au moguluhe i lalu katana-tana. 23 Hawemokau i poguluanda ananahe Pue Ala au towutu au teukimi hanganda i lalu suruga. Hawemokau i Pue Ala au mobotusi kara-karanda ope-ope tauna. Molindomokau tanoananda tauna au manoto babehianda hangkoia hai au rapamalelahamohe i peitana Pue Ala. 24 Hawemokau i Yesu, au mewali nente, au mopakaroho dandina Pue Ala au wou au mopahintuwu manusia hai Pue Ala. I tempona Yesu rapapate, mabubumi waheNa. Hai waheNa iti masuli hangko i wahena Habeli hangkoia.b
25 Maroa-roakau, ineekau hawe moae Pue, au mongkorami irikita. To Isaraeli hangkoia, barahe mampoinalai lolitana Pue Ala au mongkora irihira i Bulu Sinai, hai batenda rahuku. Apa mani ikita au mohadi lolitana Pue Ala au mongkora irikita hangko i suruga. Ane tasapuaka NgkoraNa, batena barake tekabaha hangko i pehukuNa. 26 I tempona Pue Ala mongkora i to Isaraeli i Bulu Sinai, wotuNa mampopoenggo dunia. Agaiana ide-ide, ara dandiNa au manguli: “Hambela maniNa ina mampopoenggo dunia ide duuna magero. Hai bara pea dunia au Kupopoenggo agaiana langi wori.” 27 NgkoraNa au manguli “hambela mani”, lempona Pue Ala ina mampopoenggo hai mogero dunia au Napopewali ide, lawi dunia ide bara mantaha hawe i hae-haena. Mewali, i alo au ina mai, Pue Ala ina mogero hinangkana bona apa au bara peisa moenggo, iti pearai au tetida.