Ikalaata
ilya Yaakobu
Uvhwandilo
Umusimvi uwi kalaata ili wu Yaakobu we áamile wamwavho mu vhazuna vha Yeesu. Ahavhaliilizyo he ásimvile, uYaakobu áamile wusongo wa shivhanza sha mu Yelusaleemu. Kufumiilila nu vhwimiilizi vhwa mbombo ya shivhanza, uPaavhuli ámupiiye uYaakobu izina lya “lupanda” lwa shivhanza (Vhagalati 2:9), kwe kuuti umuntu we ishivhanza shikumusuvhaalila. Pisinda avhalugu vha Chilisiti vhámugozile kuzya lwitiho lwakwe kwa Yeesu Chilisiti. Vhámugozile mu mwaha uwa 62 kufuma kupaapwa kwa Yeesu Chilisiti.
UYaakobu ávhasimbiiye ikalaata ili aVhachilisiti aVhayuuda vhe vháshimbiiye kufuma ku Yelusaleemu. Vháshimbiiye ahavhaliilizyo he aVhayuuda vhe vhámuhaanile uChilisiti, vhámugozile uSiteefani (iMbombo izya Vhantumwa 7:54-8:3). AVhachilisiti ivho vhásatiine mu nsi ya Yuuda, mu Samaliya, mu Foenike, na mu Siiliya. Kuli izyo, uYaakobu ahavhiita “avhantu avha nkolo kumi na mbiili, vhe vhásatiine mu nsi zyonti.”
Mwi kalaata ili, uYaakobu akwanza kuvhagomwa mu lwitiho, nu kuvhasambiilizya vwe yikwanzilwa kuvhomba mu havhaliilizyo he vhahayimbaga (1:2-18; 5:7-11). Akuhomeelezya kuuti ulwitiho u lwa nalyoli lukuvha pooka ni mbombo inyinza (2:14-26). Akuvhasoha avhadumbwe (1:9-11; 5:1-6). Akuvhahaana aVhachilisiti kuuti vhaleshe kuvhanyalimpa avhantu vhamo (2:1-13), akuvhasoha ku vhutalamalandu vhwe vhakuvhuvhomba ku mili (3:1-12). Havhili akuvhahomeelezya vhaleshe kulwa (4:1-10), vhatahaavhe nu mwone, uvhupafu na malenga (3:13-18). Lwe vhakulaavha vhavhanje nu lwitiho nu kuvhalaavhila avhavhinu (5:13-20).