Ukalaata uwa Paavhuli kwa
Filimooni
Uvhwandilo
Ukalaata uno ásimviilwe nu mutumwa uPaavhuli kwa muntu we vhahatinji uFilimooni (1, 19, 21). Yikuloleha kuuti uFilimooni ahatendamaga mu nkaaya iya Kolosaayi (Vhakolosaayi 4:9). Umuntu uyo áamile wu dumbwe, havhili áamile na vhazya. UFilimooni áamile Muchilisiti, mu nyumba yaakwe mwe vhahavhungaanaga aVhachilisiti (2). UPaavhuli nu Filimooni vhámanyiine nkaani.
UPaavhuli ásimvile ukalaata uno lwe áali mu jeela ukwo ku Luumi, umwaha uwa 62 ishi, kufuma kupaapwa uChilisiti. Ásimvile ukalaata uno kuzya muzya wa Filimooni, we vhahatinji uOniseemu. Umuzya uyo áyiivile ivintu vimo kwa Filimooni (18), ahavhembeluha. Pisinda ahahomaana nu Paavhuli. Pe uPaavhuli ahamulumbiilila Izwi iLyinza ilya Yeesu Chilisiti, woope ahapinduha (10).
Mu maaha igo umuzya inga avhembelushila kwa mupiti waakwe, ileelo inga aalemwa, isunde lyakwe lyámile kumugoga. Pe uOniseemu ahanzaga kugaluha kwa mupiti waakwe uFilimooni. UPaavhuli ahaamupa uOniseemu ukalaata kuuti, atwale kwa Filimooni. Mwe ukalaata uyo, uPaavhuli ahamulaavha uFilimooni amuposheele uOniseemu, inza vwe umuntu uwa mumwakwe, havhili wamwavho mwa Chilisiti (16).