3
Ulujendo ulwa Shichilisiti
1 Uvhakumbusyaje avhantu kuuti vhayisyaje ku vhimiilizi na vhapiti vha nsi, nu kuvhashindiha. Vhavhanje vhayisengiinye kuvhomba imbombo zyonti inyinza. 2 Patahaavhe avhantu vhe vhakuligana, havhili avhiivho, nkandi vhajimbaje nu kulolesya uvhutonsu ku vhantu vhonti.
3 Ku havhaliilizyo he hátuusile naaswe nyeene twámile swe vhasita njeele, vhasita mushinzi. Inza vwe twáhopeliilwe, tuhalemwaga ni mpapilo amavhiila mu mavhiila. Tuhazilanaga nu kulolelana umwone, tuhapatwaga nu kuvhapata avhanji.
4 Ileelo ku vhusililishilo, “UMulungu uMuposhi wiitu ahalolesya uvhwinza vhwakwe ni shikunzi, 5 kuuti atuposhe. Te kuuti iswe twámile nu lujendo ulwinza ndaali, nkandi átuposile ku uvhwila vhwakwe vhweleele. Ahatupoha kwi dala lya kutuzelufwa uvhutalamalandu vhwitu, ahatupaapa ishipwa, nu kutuvhiiha ishipwa kwi dala ilya Mupepo uMufinjile. 6 UMulungu átwitiliziizye uMupepo uMufinjile ku vhwinji kutuushila kwa Yeesu Chilisiti, uMuposhi wiitu. 7 Mwe muumwo tuhondeeye ku minso gaakwe ku vhwila vhwakwe, ahatuvhiiha kuvha swe vhaana vhaakwe swe tukusuuvhila kuposheela uvhulanzi uvhwa shiima shiima.”a 8 Ilyo lizwi lya nalyoli. Nkwanza kuuti uhomelezyaje ku vhe vhakumwitiha uMulungu, kuuti vhayifumwe nkaani kuvhomba imbombo inyinza. Mwe pe amazwi igo minza havhili gakuvhaavwa avhantu vhonti.
9 Pooka naago, uyidindilaje amadali aga vhuwelewele, kutaha amazina wooka wooka aga vhasookulu vhe vhahafwa, utadalinkanaje ku gaala ge gali mu ndajizyo, utavhanje nu vhulumaluma. Mwe ganaago gonti gatakuvhavhoosya naashimo, ga shaaha vhweleele! 10 Umuntu wonti we akulumanya avhantu, umusohaje, poosye luvhili lwonti. Inga atakusaajila, umwefwaje mu shivhanza. 11 Umanyile ahinza kuuti umuntu inza wunuuyo ananjisile, akuvha mutala malandu, ayilonzile wuuyo weeka.
Amazwi aga kulagana
12 Nkwanza kusyala ku nkaaya iya mu Nikopoli mu havhaliilizyo aha lupepo. Na havhaliilizyo he ndimusonteelezya uAlitema pamo uTikiiko ku kwaho, uhinze naluvhiilo ku Nikopoli, kuuti tuhomaane kunuuko. 13 Uvhombe ku mute wonti kumwavwa uApoolo nu Zenasi, ula we akuvhalonjela avhantu, kuuti vhatahasovhelwe ishintu naashimo lwe vhakushuula. 14 Avhantu vhiitu vhasambililaje zye vhahondeeye ku mbombo inyinza, kuuti vhavhapanje avhantu avhanji ivintu vwe vhakwanza. Pe avhantu vhiitu kwe vhahondezyaje avhanji mu vhuyo vhwavho.
15 Avhamwintu vhonti vhe tuli pooka vhakukulamuha. Niiwe, utulamushile aVhachilisiti avhamwitu mu Kileete vhe vhatusungwilwe. Uvhwila vhwa Mulungu vhuvhe pooka niimwe mwenti.