2
Zye zihondeeye ku vhantu vha shivhanza
1 Ileelo iwe Tiiti, uvhasambilizyaje avhantu amazwi ge gakuhondelana ni nsambiilizyo izya vhulanzi. 2 Avhanaavuli avhagoosi, uvhasambilizyaje kuuti vhavhanje vhantu vhe vhakuyishindiha ku mushinzi nu luvhaatiho. Vhagomaje mu lwitiho, mu shikunzi nu vhujimbiilizu.
3 Vhoope avhantanda avha shisongo, uvhasambilizyaje kuuti vhayisunjiilile, inza vwe yihondeeye ku vhantu vha Mulungu, vhatavhanje vhagulugulu, havhili vhatavhanje vhe vhashimwela. Nalyoli vhahondeeye kusambiilizya zye nyinza, 4 inga vhavhasambiilizye avhalindu, kuuti vhavhasungwaje avhalume vhaavho na vhaana vhaavho. 5 Havhili, vhavhe nu luvhaatiho mu vhufinjile vhwonti. Vhavhombaje imbombo izya mu nyumba zyavho, vhavhombaje inyinza nu kuvhashindiha avhalume vhaavho. Vhavhombaje vhwevhulo kuuti Izwi lya Mulungu litayangwaje havhiivhi ku lujendo lwavho.
6 Vhoope avhalumendo, uvhasambilizyaje kuuti vhayidindaje mu mbiivhi. 7 Iwe weneewe uvhombaje ahinza mu zyonti, ufishile kuvha shiholanyo ishinza kuli vhuuvho. Mu havhaliilizyo he ukusambiilizya avhantu, uvhasambilizyaje mu vhwanalyoli, shisita kusuufwa. 8 Amazwi gaaho gavhe ga nalyoli, inga mu havhaliilizyo he avhantu vhakulinga kuuti vhakudinde, vhahapotwaje izwi ilya kutuliga, pe vhahasupilaje.
9 Avhazya, uvhasambilizyaje kuuti vhavhashindihaje avhapiti vhaavho mu zyonti, nu kuvhahondezya. Lwe avhapiti vhaavho vhakuvhavhuuzya zimo, vhatadalinkanaje naavho. 10 Vhatiivhaje ishintu naashimo ku vhapiti vhaavho. Vhalolesyaje ulujendo ulwa kusuuvhilwa kuli zyonti, kuuti ku lujendo lwavho lwonti vhazivhiishe insambiilizyo zya Mulungu uMuposhi wiitu zivhe zya kuhondezya.
11 Uvhasambilizyaje ziniizyo, mwe uMulungu alolesiizye uvhwila uvhwa vhuposhi vhwakwe ku vhantu vhonti. 12 Uvhwila vhunuuvhwo vhukutusambiilizya kuzileha zyonti zye te zya Mulungu, nu lupapilo ulwa mu nsi. Lwe tukutendama mu havhaliilizyo iha, tuyishindihaje, tuvhanje swe vhanalyoli, nu kuvhomba zye zikumuhondezya uMulungu. 13 Tutendamaje vhwevhulo lwe tukuguliilila kukwinza kwa Yeesu Chilisiti mu vhushindamu uvhupiti, we Muposhi wiitu nu Mulungu wiitu umupiti. Ulu lwe lusuuvhilo lwitu lwe lukuutupa uluseshelo. 14 UYeesu we áyifumwizye kunongwa zyitu kuuti atutuule kufuma mu vhutalamalandu vhwonti, nu kutuzelufwa tuvhe swe vhantu vhaakwe vhe vhakuyifumwa ku mute kuvhomba inyinza.
15 Amazwi ganaaga ge uvhasambilizyaje avhantu. Uvhagomwaje amooyo, nu kuvhasoha ku vhudandamazu. Utahiitishe kuuti pavhe umuntu wonti uwa kukusuufwa.