Tiiti 1

Ukalaata uwa Paavhuli kwa

Tiiti

UPaavhuli akumulamuha uTiiti

¹ Ukalaata uno nsimvile neene ne Paavhuli, umuvhomvi wa Mulungu, umutumwa wa Yeesu Chilisiti. Ansonteleziizye kuuti avhantu vha Mulungu, vhe avhasevile wuuyo, vhavhe nu lwitiho. Havhili vhavhumanye uvhwanalyoli vhwonti vhwe vhukuleeta ulujendo lwe luhondeeye ku minso ga Mulungu. ² Ulwitiho nu vhumanyinsanyo vhwa vhwanalyoli vhunuuvhwo vikusimishizya ku lusuuvhilo kuuti vhahavhwaje uvhulanzi uvhwa shiima shiima. Mwe mu havhaliilizyo he insi yonti yáshiili kupelwa, uMulungu ávhiisile ulufingwi kuzya vhulanzi vhunuuvhwo, havhili uweene atakuyanga ilenga. ³ Lwe, ahavhaliilizyo haakwe he ápanzile haafiha, ahavhamanyisya avhantu izwi lyakwe kwi dala ilya kulumbiilila kwane. UMulungu uMuposhi wiitu wuuyo we álajiziizye kuuti ndumbililaje.

⁴ Iwe Tiiti, nkukusimbila ziniizi, we mwana waane nalyoli mu lwitiho lwe tuli nalwo. UTaata uMulungu nu Muposhi wiitu uYeesu Chilisiti vhakufwilaje uvhwila, nu kuukupa uvhutehamu.

Imbombo ya Tiiti mu Kileete

⁵ Zye nákulesheeye panaapo pa Kileete, zyámile kuuti ulingaanye zyonti zye zyásyalilishiiye, nu kuvhavhiiha avhasongo mu vivhanza ivwa mu nkaaya zyonti, inza vwe nákulajiziizye. ⁶ Wonti we akwanzilwa kuvha wusongo wa shivhanza, akwanzilwa kuuti vhatamuyangaje imbiivhi naazimo. Avhe nu mushi wooka vhweleele. Avhaana vhaakwe vhakwanzilwa kuuti vhavhanje nu lwitiho, vhatalongwaje kuuti vhali na mabaado poosye ulujendo uluvhiivhi. ⁷ Umwimiilizi uno atakwanzilwa kuuti vhamuyangaje imbiivhi naazimo, mwe akuvha asavhuliilwe nu Mulungu kuvhomba imbombo yaakwe. Atavhanje muntu wa mabaado, atavhanje nu mulaha papiipi. Havhili, atavhanje wushimwela, atavhanje wiivho, atavhanje nu lupapilo ulwa mpiiya. ⁸ Nkandi akwanzilwa kuuti avhe muntu we mutesi ku vhajeni. Avhe we akuzisungwa zye nyinza. Avhe we ali nu luvhaatiho, nu kuvhomba zye zihondeeye ku minso ga Mulungu. Avhe muntu umufinjile we akuyishindiha. ⁹ Avhe we akugalema amazwi aga nalyoli, inza vwe ásambiliiye, inga avhagomwaje avhanji ku nsambiilizyo ingolosu, avhapootaje vhe vhakuzidindanjizya.

¹⁰ Mwe kuli avhantu avhinji vhe vhatakushindiha insambiilizyo izyo, inkaani aVhachilisiti vhamo vhe vhafumile mu Vhayuuda. Vhakuhomeelezya amaata gaavho na mazwi gaavho kwe kuyanga izya vhuwelewele nu kuhopelana. ¹¹ Vhanaavho vhakwanzilwa kuuti vhavhadindile amalomu gaavho. Mwe vhakusambiilizya amazwi ge gatahondeeye, vhakunanganya ulwitiho lwa nkaaya inyinji izya Vhachilisiti. Ge gakuvhaazya vhanaavho avhagulugulu kuvhomba ganaago, kuuti vhalonchelaje muumwo impiiya!

¹² AVhakilete vhanaavho, wooka mu vhakuvhwi vhaavho áyanzile átili, “AVhakilete vhakuyanga izya malenga amanda gonti, vhali ngati vihanu ivihali ivivhiivhi, vhaliipo avhahata vhe vhakulya ku vhupafu.” ¹³ Amazwi ganaago ge gáyanziilwe kuli vhuuvho ga nalyoli. Pe vhwevhulo, uvhahalapile nkaani kuuti vhagomaje mu lwitiho. ¹⁴ Havhili, vhahondeeye kuuti vhaleshe kutejeelezya utulumbe twa Vhayuuda, ni ndajizyo zye zisimviilwe na vhantu vhe vhakuvhuhaana uvhwanalyoli. ¹⁵ Ku vhantu vhe vha nalyoli ku minso ga Mulungu, shitaliipo ishintu naashimo she shingavhavhiiha kuvha vhahandamanu. Ileelo, ku vhantu vhe vhahandamanu, na vhe vhatakumwitiha uYeesu Chilisiti, ivintu vwonti ku kwavho vikuvha vihandamanu. Injeele zyavho ni nsiivho zyavho zyonti zikuvha nkandamanu. ¹⁶ Vhakuyiyanjila kuuti vhamumanyile uMulungu, nkandi leelo vhakumuhaana mu lujendo lwavho. Vhakumuviitisya nkaani havhili vhatakumushindiha, vhatali nu lujendo ulwinza naalumo lwe luhondeeye.