Ukalaata uwa Paavhuli kwa
Filimooni
1
UPaavhuli akumulamuha uFilimooni
1 Ukalaata uno nsimvile neene ne Paavhuli. Ne nkunziilwe kuzya kulumbiilila Izwi lya Yeesu Chilisiti. Pooka nu wamwitu uTiimoti, tukukusimbila we Filimooni, we muvhomvi uwamwitu unkundwa. 2 Havhili tukuvhasimbila na vhantu avha shivhanza vhe vhakuvhungaana mu nyumba yaaho, pooka nu mwana wiitu umulindu uAfiya, nu wamwitu uAlikiipo, umusikaali uwamwitu mu mbombo ya Mulungu.
3 Uvhwila vhuvhe ni mwe nu vhutehamu vhwe vhukufuma kwa Mulungu uTaata wiitu nu Mwene uYeesu Chilisiti.
UPaavhuli akumulaavhila uFilimooni
4 Amanda gonti ge nkumulaavha uMulungu, nkukukumbuha iwe nu kumusalifwa ku zyaho. 5 Mwe nkwivwa inongwa zya lwitiho lwaho kwa Mwene uYeesu ni shikunzi shaaho ku vhantu vhonti avha Mulungu. 6 Nkumulaavha uMulungu kuuti uvhutuulano vhwaho pooka niiswe, vhukwavwaje kutuulana kuuti uzimanyaje inongwa zyonti inyinza zye tuzyazile mwa Chilisiti. 7 Wamwitu, ishikunzi shaaho isho shimpiiye uluseshelo nkaani nu kungomwa umwoyo, mwe usansamusiizye amooyo aga vhantu vha Mulungu.
UPaavhuli akumulaavhila uOniseemu uvhwila
8 Inza she nitishililwe mwa Chilisiti, kukulajizya ku vhudandamazu zye uhondeeye kuvhomba. 9 She poosye zili vhwevhulo, kuyanga kwane kuvhe kwi dala ilya kukulaavha mu shikunzi. Ine ne Paavhuli, ne mugoosi, nkunziilwe mu jeela kuzya Yeesu Chilisiti, 10 nkulambiilizya kuzya mwana waane uOniseemu.a Mu havhaliilizyo he nkunziilwe apa na manyoloolo, avha mwana waane mu lwitiho. 11 Mu havhaliilizyo he ahakuvhembeluha ataamile muntu we ahondeeye ku kwaho, ileelo ishi avha muntu we ahondeeye ku kwaho, na ku kwane ahondeeye.
12 Pe nkumugalusya ku kwaho, uweene ali ngati mwoyo waane ine. 13 Naasungwilwe asyale ipa niine, kuuti anavwaje gaala ge waamile unavwaje, mu havhaliilizyo he nkunziilwe kuzya Izwi iLyinza. 14 Ileelo litaliipo naalimo lye ngalivhomba shisita iwe kunitishila. Inga wanavwaga, kunaavwa kwaho kuvhe kwa lusungwo lwaho weneewe, pe kutahavhe kwi dala ilya kukuvijiilizya. 15 Pamo uOniseemu aheepa ku kwaho ukwo ku havhaliilizyo ahansi, inga utendame pooka nawo shiima. 16 Te ayiime muzya waaho vhweleele, nkandi kwavhe wamwitu unkundwa mwa Yeesu Chilisiti. Ine munkunzite nkaani, niiwe umukundaje nkaani ngati muntu uwa mumwaho havhili ngati wamwitu mwa Mwene.
17 Pe inga ukuyilola kuuti uli pooka niine, umuposheele ahinza inza vwe ungamposheela ine neneene. 18 Inga kuli limo lye ananzile ku kwaho, poosye inga ali nu mulandu ku kwaho, ine kwe nkulipe. 19 Ine ne Paavhuli nkusimba ziniizi neneene ni nyoovhe yaane, kuuti ine kwe nkulipe. Pooka niizyo, yitahondeeye inkukumbusye, iwe umanyile kuuti uli nu mulandu ku kwane uwa vhulanzi vhwaho. 20 Ishi wamwitu, unaavwe mwa Mwene wiitu, havhili usansamusye umwoyo waane mwa Chilisiti. 21 Nkukusimbila ukalaata uno, mwe pe nkusuuvhila kuuti uhanitishile ku gaala ge nakulaavha. Imanyile kuuti uhavhombe kuluusya na ganaago.
22 Pooka na ziniizyo, nkukulaavha unsenganizanye apa vhukaato. Mwe nkusuuvhila kuuti mu mpuuto zyinyu, uMulungu kwe atusatule mu jeela, pe ininze ku kwinyu kuvhatandaalila.
Amazwi aga kulagana